04 މެއި 2021 - 11:49
މާލެ ސަރަހައްދުގެ ސްކޫލުތައް އެއް ހަފުތާ އަށް ބަންދުކޮށް، އޮންލައިންކޮށް ކިޔަވައިދޭން ނިންމައިފި އެވެ.
އެޑިއުކޭޝަން މިނިސްޓްރީން މިއަދު ބުނީ ކޮވިޑު-19 ގެ ކޭސްތައް އިތުރުވަމުންދާތީ މާދަމާ އިން ފެށިގެން އަންނަ ހަފުތާގެ ބުދަ ދުވަހާ ހަމައަށް އެލްކޭޖީން ފެށިގެން ގްރޭޑް 12އާ ހަމައަށް ކިޔަވައިދޭން ހަމަޖައްސާފައިވަނީ އޮންލައިންކޮށް ކަމަށެވެ.
ނަމަވެސް އެ މުއްދަތުގައި އިމްތިހާނުތައް ކުރިއަށް ގެންދާނެ ކަމަށް ބުންޏެވެ.
މިއީ، ބަލީގެ ހާލަތު ގޯސްވުމުން މި އަހަރު ސްކޫލުތައް ބަންދުކުރި ދެ ވަނަ ފަހަރެވެ. މިދިޔަ ޖެނުއަރީ 10 ގައި ސްކޫލުތައް ފަށައި މަހެއްގެ ތެރޭގައި ވަނީ އޮންލައިންކޮށް ކިޔަވައިދޭން ޖެހިފަ އެވެ. އެ އަށް ފަހު ހުރިހާ ގްރޭޑަކަށް ހުޅުވާލައިގެން އަލުން ކިޔަވައިދޭން ފެށީ މިދިޔަ މަހުގެ އެއް ވަނަ ދުވަހު އެވެ.
ކޮވިޑާ ގުޅިގެން މިދިޔަ އަހަރު ވެސް މާލެ ސަރަހައްދުގެ ސްކޫލުތައް އެތައް ފަހަރަކު ބަންދުކުރި އެވެ.
ސްކޫލުތަކުގެ އިތުރުން މާދަމާ އިން ފެށިގެން ސަރުކާރުގެ އޮފީސްތައް ވެސް ބަންދުވާނެ ކަމަށް ސަރުކާރުން ރޭ ވަނީ ބުނެފަ އެވެ. އަދި ރޭގަނޑު 12 އިން ފެށިގެން ފަތިހު 4:00 އަށް މާލެ ސަރަހައްދުގައި ވެހިކަލް ދުއްވުން މަނާވާނެ އެވެ.