03 މެއި 2021 - 12:10
އެމްސްޓަޑަމް (03 މެއި) - މެންޗެސްޓާ ޔުނައިޓެޑްގެ އެގްޒެކެޓިވް މަގާމެއްގައި މަސައްކަތް ކުރަން ޝައުގުވެރިވާ ކަމަށް، އެ ޓީމުގެ ކުރީގެ ގޯލްކީޕަރު އެޑްވެން ވެން ޑަ ސާ ބުުނެފި އެވެ.
އަޔެކްސްގެ މިހާރުގެ ސީއީއޯ ވެން ޑަ ސާއާ، ޔުނައިޓެޑްގެ އެ މަގާމާ ގުޅުވަ އެވެ. ޔުނައިޓެޑްގެ އެގްޒެކެޓިވް ވައިސް ޗެއާމަންގެ މަގާމުގައި ހުރި އެޑް ވުޑްވާޑާ ޑިސެމްބަރަށް ފަހު ކްލަބުން ވަކި ވުމުން، އެ މަގާމަށް ވެންޑަސާ ގެންނަން މަސައްކަތް ކުރާ ކަމުގެ އަޑުތައް ވަނީ ފެތުރިފަ އެވެ. އެހެން ނަމަވެސް އެފަދަ އެއްވެސް ހުށަހެޅުމެއް މި ވަގުތު ލިބިފައި ނުވާ ކަމަށް ވެންޑަސާ ބުންޏެވެ.
"އެއީ އަހަންނަށް އާ ކަމެއް ނޫން އަހަރެންގެ ނަން އަބަދުވެސް އެ ކުލަބާ ގުޅުވައި ވާހަކަ ދެކެވޭނެ،" އީއެސްޕީއެންގައި ވާހަކަ ދައްކަމުން ވެން ޑަ ސާ ބުންޏެވެ.
ޔުނައިޓެޑާއެކު ހަތަރު އަހަރު ޕްރިމިއާ ލީގް ހޯދުމުގެ އިތުރަށް ޗެމްޕިއަންސް ލީގު ކާމިޔާބު ކުރި ކުރީގެ ކީޕަރު ބުނީ، އަޔެކްސް ނުވަތަ ޔުނައިޓެޑް ނޫން ކްލަބެއްގައި އޭނާ މަސައްކަތް ނުކުރާނެ ކަމަށެވެ. މި ވަގުތު ޔުނަައިޓެޑަށް ވުރެ އޭނާ ބޮޑަށް ވިސްނަނީ އަޔެކްސްގެ މަސައްކަތާ މެދުގައި ކަމަށް ވެން ޑަ ސާ ބުންޏެވެ.
"އަހަންނަށް އެ ކްލަބަކާ މެދު އިހްސާސް ނެތް ކްލަބެއްގައި އަހަރެން މަސައްކަތެއް ނުކުރާނަން. އަހަންނަށް މި ކަން ކުރެވޭނީ އަޔެކްސް ނުވަތަ ޔުނައިޓެޑްގައި. އެހެން ކްލަބެއްގައި އަހަންނަށް މަސައްކަތެއް ނުކުރެވޭނެ،" ވެން ޑަ ސާ ބުންޏެވެ.
"މިދިޔަ އަހަރުތަކުގެ ތެރޭ އަޔެކްސް ބިނާކުރެވުނު ގޮތް އަހަރެމެންނަށް ވަރަށް ހިތްހަމަޖެހޭ. އަހަރެމެން އަމާޒު ކަނޑައެޅީ 10 އަހަރު ތެރޭ ޔޫރަޕްގެ އެންމެ މައްޗަށް ދާން. އަހަރެމެން އެ ޓާގެޓަށް ވާސިލުވިން. އަހަރެމެން އެ މަސައްކަތް ކުރީ މުއްސަނދި އޯނަރެއް ނެތ އަދި ސަރުކާރަކުން ވެސް އެހީއެއް ނެތި."
ވެން ޑަ ސާ ވަނީ، އަޔެކްސްގެ ކޮންޓްރެކްޓް ދާދި ފަހުން އާ ކުރި އެ ޓީމުގެ ކޯޗް އެރިކް ޓޭން ހޭގް އެއްބަސްވުމާ ބެހޭގޮތުން ވާހަކަ ދައްކައިފަ އެވެ. ޓޭން ހޭގް އަޔެކްސްގެ ކޮންޓްރެކްޓް އާ ކުރީ ޓޮޓެންހަމްއިން އޭނާ ގެންދަން ޝައުގުވެރިކަން ފާޅުކޮށްފައި ވަނިކޮށެވެ. ވެން ޑަ ސާ ބުނީ، ޓޭން ހޭގް މަޑު ނުކުރާނެ ކަމުގެ ޔަގީންކަން ނެތް ނަމަ އޭނާއާ އެކު އާ އެއްބަސްވުމެއް ނުހެދީސް ކަމަށެވެ.