25 އެޕްރީލް 2021 - 15:33
އިންޑިއާ މީހުން އެހެން ގައުމަކަށް ވަޒީފާއަށް ދިއުމަށް ރާއްޖެ، ކަރަންޓީނު މަރުކަޒެއްގެ ގޮތުގައި ބޭނުންކުރަމުން އަންނާތީ އިދިކޮޅު ޕްރޮގްރެސިވް ކޮންގްރެސް ކޯލިޝަނުން މިއަދު ކަންބޮޑުވުން ފާޅުކޮށްފި އެވެ.
ކޮވިޑްގެ ބަލިމަޑުކަމުގައި ދުނިޔޭގެ އެންމެ ގޯސްކޮށް މިހާރު އޮތް އިންޑިއާގެ މީހުންނަށް، ސައުދީ އަރަބިއްޔާ އާއި ގަތަރާއި ޔޫއޭއީ ފަދަ ގައުމުތަކަށް ސީދާ ދިއުމުގެ ހުއްދައެއް ނޯވެ އެވެ. އެ މީހުން އެ ގައުމުތަކަށް ދާން ޖެހެނީ 14 ދުވަހުގެ ކަރަންޓީނެއްގައި ތިބުމަށް ފަހު އެވެ. އެހެންވެ، އެ ގައުމުގެ ގިނަ ބަޔަކު އަންނަނީ 14 ދުވަހުގެ ކަރަންޓީނުގެ މުއްދަތު ހަމަކުރަން ރާއްޖެއަށެވެ.
އެކަމުގެ ކަންބޮޑުވުން ފާޅުކޮށް އިދިކޮޅުން ބޭއްވި ނޫސްވެރިންގެ ބައްދަލުވުމެއްގައި ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވީ އިންޑިއާ މީހުންގެ ކަރަންޓީނު "މަރުކަޒު" އަކަށް ރާއްޖެ ހެދުމަކީ ވަރަށް ކަންބޮޑުވާ ކަމެއް ކަމަށެވެ. އެގޮތުން ރާއްޖޭގެ ރައްޔިތުން ބޮޑު ބިރުވެރިކަމެއްގެ ތެރެއަށް ވައްޓާލަނީ އެހެން ބައެއްގެ ފައިދާއަށްޓަކައި ކަމަށް އަބްދުއްރަހީމް ވިދާޅުވި އެވެ.
"އެހެންވީމަ މިކަމުގެ ކަންބޮޑުވުން އިންތިހާއަށް އެބަ އޮތް. އަދި މީގެ ނުރައްކާތެރިކަން ދިވެހި ރައްޔިތުންނަށް އެކި ގޮތްގޮތުން، އެކި ސިފަ ސިފައިގައި ފޯރަމުން އެބަދޭ،" އަބްދުއްރަހީމް ވިދާޅުވި އެވެ.
އޭނާ ވިދާޅުވީ އިންޑިއާގައި ކޮވިޑްގެ އާ ވެރިއެންޓެއް ފެތުރެމުންދާ ދަނޑިވަޅެއްގައި އެ ގައުމުގެ ރައްޔިތުން ދުނިޔޭގެ އެހެން ގައުމުތަކަށް ވަޒީފާ އަދާކުރަން ދިއުމަށް، ކަރަންޓީނުގެ މަރުކަޒެއްގެ ގޮތުގައި ރާއްޖެ ބޭނުންކުރުމުން ރަށްރަށުގައި ކޮވިޑް ފެތުރެން ފަށާފައިވާ ކަމަށެވެ.
"އެންމެ ބޮޑު ނުރަައްކަލަކީ ޕީސީއާރު ޓެސްޓުން ވެސް އަދި މިހާތަނަށް، ދެނެނުގަނެވޭ ވޭރިއަނެއްޓެއް މިއީ. މި ވަގުތު ވެސް ވަރަށް ގިނަ ރަށްރަށަށް، އަޅުގަނޑު ނިސްބަތްވާ ހައްދުންމަތީ ފޮނަދޫ ވެސް މިހާރު ވެސް އޮތީ މޮނިޓަރިންގެ ހާލަތުގައި. މި ދެންނެވި ސަބަބުން މިހާ ހިސާބަށް ގޮސްފައި،" އަބްދުއްރަހީމް ވިދާޅުވި އެވެ.
އޭނާ ވިދާޅުވީ ދިވެހި ރައްޔިތުންނަށް ވުރެ ބޮޑަށް މި ސަރުކާރުން އިސްކަން ދެނީ އިންޑިއާ މީހުންނަށް ކަމަށެވެ. އެކަމަކީ ބިރުވެރިކަމެއްގެ ގޮތުގައި ފާހަގަކުރައްވަމުން އަބްދުއްރަހީމް ވިދާޅުވީ ރައީސް އިބްރާހީމް މުހައްމަދު ސޯލިހު ވެރިކަން ކުރައްވަން އުޅުއްވަނީ ކޮން ގައުމެއްގެ ރައްޔިތުންނަކަށްތޯ ސުވާލު އުފެދޭ ކަމަށެވެ.
އަބްދުއްރަހީމްް ވަނީ ރާއްޖޭގައި ކޮވިޑް ފެތުރެން ފެށީ ވެސް ސަރުކާރުގެ ނާގާބިލް ކަމުން ކަމަށް ވިދާޅުވެފަ އެވެ. އެގޮތުން ރާއްޖެއިން ކޮވިޑް ފެތުރުމުގެ ކުރިން އިދިކޮޅުން ފިޔަވަޅު އެޅުމަށް ގޮވާލި ނަމަވެސް، އެކަމަށް އިޖާބަދީފައި ނުވާ ކަމަށް އޭނާ ވިދާޅުވި އެވެ.
އަވަށްޓެރި އިންޑިއާގެ ކޮވިޑްގެ ހާލަތު ގޯސްވެފައިވާތީ ބައެއް ގައުމުތަކުން ވަނީ އެގައުމަށް ދަތުރުކުރުން ހުއްޓާލައިފަ އެވެ. އެވަރުން ވެސް ރާއްޖެއިން އެއްވެސް ފިޔަވަޅެއް ނާޅައި ކަމަށް ބުނެ ސަރުކާރަށް ފާޑުކިޔަމުންދަނިކޮށް އެޗްޕީއޭ އިން މިއަދު ވަނީ ބައެއް ފިޔަވަޅުތައް އަޅައިފަ އެވެ.
އެޗްޕީއޭ އިން ވަނީ ރާއްޖޭގެ ގެސްޓް ހައުސްތަކާއި މީހުން ދިރިއުޅޭ ރަށްރަށުގައި ހުރި ސިޓީ ހޮޓާތަކުގައި އިންޑިއާ ޓޫރިސްޓުން ބޭތިއްބުން މަނާކޮށްފަ އެވެ.