16 ނޮވެމްބަރ 2016 - 13:25
އެމްއެމްޕީއާރުސީގެ ޚިޔާނާތުގެ މައުލޫމާތުތަކެއް އާންމުކުރި މައްސަލާގައި އަށް މަހުގެ ޖަލު ހުކުމެއް އިއްޔެ އިއްވި ގާސިމް އަބްދުލްކަރީމް އަދިވެސް ކަރެކްޝަނަލް ސާވިސާ ހަވާލު ނުކުރާ ކަމަށް ކަރެކްޝަންސް އިން ބުނެފި އެވެ.
އެމްއެމްޕީއާރުސީގެ ޚިޔާނާތުގެ 1.22 ބިލިއަން ރުފިޔާ އެސްއޯއެފް ކުންފުނީގެ އެކައުންޓަށް ޖަމާކޮށް އެ ފައިސާ ދައުރުކުރި ގޮތުގެ ބޭންކް ސްޓޭޓްމަންޓް އާންމުކުރި މައްސަލާގައި ބީއެމްއެލްގެ ކުރީގެ މުވައްޒަފު ގާސިމް އަށް މަހާއި 12 ދުވަހަށް ޖަލަށްލާން އިއްޔެ ހުކުމް ކުރިއިރު އޭނާ ބަންދުގައި ހުންނަތާ އަށް މަހަށް ވުރެ ގިނަ ދުވަސް ވަނީ ވެފަ އެވެ. އެހެންވެ އޭނާ ވަގުތުން ދޫކޮށްލަން އޭނާގެ ވަކީލް ވަނީ ކަރެކްޝަންސްގައި އެދިފަ އެވެ.
ކަރެކްޝަންސްގެ ތަރުޖަމާނު ވިދާޅުވީ ގާސިމް އަދިވެސް ކަރެކްޝަންސްއާ ހަވާލު ނުކުރާ ކަމަށާއި އޭނާގެ ވަކީލް އެދިފައި އޮތް އެދުމާ މެދު ގޮތެއް ނިންމޭނީ ގާސިމް ކަރެކްޝަންސްއާ ހަވާލު ކުރުމުން ކަމަށެވެ.
އިއްޔެއާ ހަމައަށް ގޭ ބަންދުގައި ހުރި ގާސިމް ކަރެކްޝަންސްއާ ހަވާލު ކުރުމުގެ މަސައްކަތް ކުރަމުންދާ ކަމަށް ފުލުހުންގެ މީޑިއާ އޮފިޝަލް ވިދާޅުވި އެވެ.
އެ މައްސަލައިގެ ތުހުމަތުގައި ގާސިމް މިދިޔަ ފެބްރުއަރީ މަހު ހައްޔަރުކޮށް ހަތަރު މަހެއްހާ ދުވަސް ފުލުހުން ބަންދުގައި ބެހެއްޓުމަށް ފަހު އޭނާ ގޭ ބަންދަށް ބަދަލުކުރީ މިދިޔަ ޖުލައި މަހު އެވެ. ބަންދުގައި ހުރި މުއްދަތު ހުކުމުގެ މުއްދަތުން އުނިކުރަން ޖެހޭތީ ގާސިމްގެ ވަކީލް ވިދާޅުވެފައިވަނީ ގާސިމްގެ ހުކުމުގެ މުއްދަތު މިހާރު ހަމަވެފައިވާ ކަމަށާއި އޭނާ ވަގުތުން ދޫކޮށްލަން ޖެހޭ ކަމަށެވެ.
ގާސިމަށް އުފުލި ދެ ދައުވާ ސާބިތުވެގެން އޭނާގެ މައްޗަށް އެ ހުކުމް އައިއިރު އެ މައްސަލާގައި އޭނާ އަމަލުކުރި ގޮތުން އިންޓަނޭޝަނަލް އެންޓި ކޮރަޕްޝަން އެވޯޑަށް އޭނާ ވަނީ ނޮމިނޭޓްވެފަ އެވެ.