19 އެޕްރީލް 2021 - 11:28
ނޭޕަލްސް (އޭޕްރީލް 19) - މޮޅުވުމުގެ ޓްރެކެއްގައި ދަމަހައްޓަމުން އައި އިންޓަ މިލާންގެ ރޭހަށް ނަޕޯލީން ނިމުން ގެނެސްފި އެވެ.
ޖެހިޖެހިގެން 11 މެޗުން މޮޅުވި، އިންޓައާ ދެކޮޅަށް ނަޕޯލީ ރޭ ކުޅުނު މެޗު އެއްވަރު ކުރީ 1-1 ންނެވެ. ނަޕޯލީގެ އަމިއްލަ ދަނޑު، ޑިއޭގޯ އާމަންޑޯ މެރަޑޯނާ ސްޓޭޑިއަމްގައި ކުޅުނު މެޗުގައި އެންމެ ފުރަތަމަ ލީޑު ނެގީ ވެސް ނަޕޯލީންނެވެ.
އެ ޓީމުގެ ލަނޑަކީ އިންޓަގެ ކީޕަރު ސާމިރު ހަންޑަނޯވިޗް އަތުން ބައިކޮޅަށް ވަން ލަނޑެކެވެ. ނަޕޯލީގެ ލޮރެންޒޯ އިންސީނިއާ ގޯލު ކުރިމައްޗަށް ހުރަސް ކޮށްދިން ބޯޅަ ހަންޑަނޯވިޗް ހިފަން އުޅުމުގެ ތެރޭގައި އޭނާގެ އަތުން ބޯޅަ ދޫވެގެން ގޮސް ވަނީ އަމިއްލަ ގޯލަށެވެ. ދެ ވަނަ ހާފުގައި ކްރިސްޓިއަން އެރިކްސަން އިންޓަ އަށް ނަތީޖާ ހަމަހަމަ ކޮށްދިނެވެ.
އެޓަލާންޓާ އަތުން ބަލިވެ، ކުރިން ތާވަލުގެ ތިން ވަނައިގައި އޮތް ޔުވެންޓަސް، ވަނީ ހަތަރު ވަނައަށް ވެޓިފަ އެވެ. އެޓަލާންޓާ 1-0 އިން މެޗު ކާމިޔާބުކޮށް މިހާރު ތިން ވަނައިގައި އޮތީ އެ ޓީމެވެ. އެޓަލާންޓާގެ ލަނޑު މެޗުގެ ފަހު ކޮޅު ކާމިޔާބު ކުރީ ރުސްލާން މިލިނޮވްސްކީ އެވެ.