18 އެޕްރީލް 2021 - 14:31
ތެހެރާން (އެޕްރީލް 18) - އީރާންގެ މައި ނިއުކްލިއާ މަރުކަޒަށް ދިން ވަރުގަދަ ސައިބަ ހަމަލާގެ ފަހަތުގައި ހުރި މީހާ ހޯދާފައިވާ ކަމަށް ތެހެރާނުން ބުނެފި އެވެ.
ނަތަންޒް ނިއުކްލިއާ ސައިޓަށް ހަމަލާ ދިން ކަމަށް އީރާނުގެ ރަސްމީ ޓީވީން ބުނެފައި ވަނީ ރިޒާ ކަރީމީ ކިޔާ މީހެކެވެ. ހަމަލާ ދިންތާ ކުޑަ ވަގުތުކޮޅެއްގެ ތެރޭގައި އޭނާ އީރާނުން ފުރާފައިވާ ކަމަށް ވެސް ބުނެފައިވެ އެވެ. އީރާނުން ބުނެފައި ވަނީ އެއީ އިންޓަޕޯލުން ހޯދަން ބޭނުންވެފައިވާ މީހެއް ކަމަށެވެ. ނަމަވެސް އިންޓަޕޯލުން ބުނެފައި ވަނީ އެއީ ރަތް ލިސްޓުގައިވާ މީހެއްކަން ޔަގީންކޮށް ނުދެވޭނެ ކަމަށެވެ.
"އޭނާ ހައްޔަރުކޮށްގެން އީރާނަށް ގެނައުމުގެ މަސައްކަތް ދަނީ ކުރަމުން،" ޓީވީން ބުންޏެވެ.
ނަތަންޒް ނިއުކްލިއާ މަރުކަޒުގެ ޔުރޭނިއަމް ފައްކާކުރާ ބަޔަށް ދިން ވަރުގަދަ ސައިބަ ހަމަލާއެއްގެ ސަބަބުން އެ ތަނުން ވަނީ ކަރަންޓު ކެނޑި މައްސަލަތައް ދިމާވެފަ އެވެ. އީރާނުން ފުރަތަމަ ބުނެފައި ވަނީ އެ ހަމަލާގެ ފަހަތުގައި ވަނީ އިޒްރޭލް ކަމަށެވެ. އަދި ޔުރޭނިއަމް ފައްކާކުރާ މިންވަރު ވަނީ އިތުރުކޮށްފަ އެވެ.
އީރާނުގެ މައި ނިއުކްލިއާ މަރުކަޒަށް ހަމަލާ ނުދޭކަމަށް އިޒްރޭލުން ނުބުނެ އެވެ. އިޒްރޭލުގެ ޖާސޫސީ ފަރާތްތަކާ ހަވާލާދީ ޕަބްލިކް ރޭޑިއޯ އިން ބުނެފައި ވަނީ އެ ހަމަލާގެ ފަހަތުގައި ވަނީ މޮސާޑް ކަމަށެވެ.
އީރާނުން މިހާރު ވަނީ 60 ޕަސެންޓަށް ޔުރޭނިއަމް ފައްކާކުރާނެކަން އިއުލާންކޮށްފަ އެވެ. ނަމަވެސް ނިއުކްލިއާ އެއްބަސްވުމުގެ ދަށުން އީރާނަށް ހުއްދަ އޮންނަނީ 3.67 ޕަސެންޓަށް ޔުރޭނިއަމް ފައްކާ ކުރުމަށެވެ.
ސައިބަ ހަމަލާ ދިން އީރާނުގެ ނިއުކްލިއާ ފެސިލިޓީ ހުންނަނީ 50 މީޓަރު (165 ފޫޓް) ބިމު އަޑީގަ އެވެ. އީރާނުގެ ޕާލަމެންޓުގެ ރިސާޗް ސެންޓަރުގެ ވެރިޔާ އަލީ ރިޒާ ޒަކާނީ ވިދާޅުވީ ހަމަލާގެ ސަބަބުން ނިއުކްލިއާ މެޓީރިއަލް ރިފައިން ކުރާ ވަރަށް ގިނަ މެޝިންތައް ހަލާކުވި ކަމަށެވެ.