17 އެޕްރީލް 2021 - 12:17
ބާސެލޯނާ (އޭޕްރީލް 17) - އެފްސީ ބާސެލޯނާގެ ކެޕްޓަން ލިއޮނެލް މެސީ ކޮންޓްރެކްޓް އާ ކުރުމަށް ކުރަން ޖެހޭ މަސައްކަތް ހިތްހަމަޖެހޭ ވަރަކަށް ކުރިއަށްދާ ކަމަށް، އެ ކުލަބުގެ ރައީސް ޔޮއާން ލަޕޯޓާ ވިދާޅުވެއްޖެ އެވެ.
ބާސެލޯނާ އާއެކު 2017 ގައި މެސީ އެންމެ ފަހުން ހެދި ކޮންޓްރެކްޓް ޖޫން 30 ގައި ހަމަވާނެ އެވެ. ބާސާގެ ރައީސް ކަމަށް ދެ ވަނަ ފަހަރަށް އިންތިހާބުވި ލަޕޯޓާގެ، އިންތިހާބީ އެއް ވައުދަކީ މެސީ ޓީމުގައި މަޑު ކުރުވުމެވެ. އެހެންނަމަވެސް އަދި މިހާތަނަށް އެކަމުގެ ގެރެންޓީ ބާސާ އަށް ލިބިފައެއް ނުވެ އެވެ.
"މެސީގެ ކޮންޓްރެކްޓް އާ ކުރުމަށް ކުރިއަށްދާ މަރުހަލާތައް ހިނގަމުން ދަނީ ހިތްހަމަ ޖެހޭ މިންވަރެއްގައި،" އެތުލެޓިކު ކުލަބު ބިލްބާއޯ އާ ދެކޮޅަށް ބާސާ މިރޭ ކުޅޭ ސުޕެނީޝް ކަޕްގެ ފައިނަލު މެޗު ބައްލާވާ ލެއްވުމަށް ސެވިއްޔާއަށް ފުރާވަޑައިގަތުމުގެ ކުރިން މީޑިއާ އާ ވާހަކަ ދައްކަމުން ލަޕޯޓާ ވިދާޅުވި އެވެ.
"މި ކުލަބުގެ ގާބިލުކަން ހުރި އެންމެ މަތީ ފެންވަރުގައި މެސީ ޓީމުގައި މަޑު ކުރުވުމަށް ކުރަން ޖެހޭ ހުރިހާ ކަމެއް އަހަރެން ކުރާނަން. މެސީ ހުރީ ވަރަށް ބޮޑަށް ހިތްހަމަ ޖެހިފައި އަދި އަހަންނަށް ގަބޫލު ކުރެވޭ ބާސާގައި ދެމިހުންނަން އޭނާ ބޭނުން ވާކަން."
ޓްރާންސްފާގެ ހަބަރުތައް ބުނާ ގޮތުން، މެސީގެ ކޮންޓްރެކްޓް އާ ކުރުވުމަށް ބާސާއިން ވަނީ ފުރަތަމަ ހުށަހެޅުން މި ހަފުތާގައި ހުށަހަޅާފަ އެވެ. ލަޕޯޓާ ގަބޫލު ކުރާ ގޮތުގައި މި ސީޒަންގައި ބާސާއަށް ލިބޭ ކާމިޔާބަކީ މެސީ ކޮންޓްރެކްޓް އާ ކުރުމަށް ލިބޭނެ އިތުރު ބާރެކެވެ.
މިދިޔަ ސީޒަންގެ ޗެމްޕިއަންސް ލީގް ކުއާޓާ ފައިނަލުގައި، ބަޔަން މިޔުނިކް އަތުން ކުރިމަތިވި 8-2 ގެ ލަދުވެތި ނަތީޖާއަށް ފަހު މެސީ ވަނީ ބާސާ ދޫކޮށްލަން ބޭނުންވާ ކަން ހާމަ ކޮށްފަ އެވެ. އެހެންނަމަވެސް އޭނާ ކުލަބު ދޫކޮށްލުމުގެ ހުއްދާ ދޭން އޭރު އޮތް ބޯޑުން ދެކޮޅު ހެދުމުން ބާސާގެ އޭރުގެ ރައީސް ޖޯސެފް މާރިއާ ބާޓޮމެއު އާ މެސީ އާ އޮންނަ ގުޅުން ވަރަށް ބޮޑަށް ގޯސްވި އެވެ.