16 ނޮވެމްބަރ 2016 - 05:51
ފިލްމީ ތަރިން ޑައިރެކްޝަނަށް ނިކުތުމަކީ އާ ކަމެއް ނޫނެވެ. އޮސްކާ އާއި ގޯލްޑެން ގްލޯބް އަދި ބަފްތާ އެވޯޑް ވެސް ހާސިލްކޮށްފައިވާ ޒުވާން ބަތަލާ ބްރީ ލާސަން ވެސް މި މަސައްކަތުގައި ނިކުމެއްޖެ އެވެ.
މިދިޔަ އަހަރު ނިކުތް "ރޫމް" އާއި 2012 ގައި ރިލީޒް ކުރި "21 ޖަމްޕް ސްޓްރީޓް" ފަދަ ފިލްމްތައް ކުޅެފައިވާ ލާސަން، 27، މި ވަނީ އޭނާ ޑައިރެކްޓް ކުރާ ފުރަތަމަ ފީޗާ ފިލްމް އިއުލާންކޮށްފަ އެވެ.
މި ފިލްމަކީ ސަމަންތާ މެކްލެންޓްރޭގެ އޮރިޖިނަލް ސްކްރީންޕްލޭއަކަށް ބިނާކޮށް ހަދާ ކޮމެޑީ ފިލްމް "ޔުނިކޯން ސްޓޯރް" އެވެ.
މީގެ ކާސްޓުންނަށް ވެސް ނަގައިފައި ވަނީ އާދައިގެ އެކްޓަރުންނެއް ނޫނެވެ. އޭގެ ތެރޭގައި ސެމުއެލް އެކް ޖެކްސަން، ޖޯން ކްސަކް އަދި ބްރެޑްލީ ވައިޓްފޯޑް ހިމެނެ އެވެ.
ސެމުއެލްއަކީ ލާސަންގެ ކުރިއަށް ހުރި ފިލްމުތަކުގެ ތެރެއިން އަންނަ އަހަރުގެ މާޗް 10 ގައި ރިލީޒް ކުރާ "ކޮންގް: ސްކަލް އައިލެންޑް" ގެ ކޯ-އެކްޓަރެކެވެ. އެހެންވެ ސެމްއެލް ޑައިރެކްޓް ކުރުމަކީ ލާސަން އަށް މާ އުނދަގޫ ކަމަކަށް ނުވާނެ އެވެ.
އަނެއްކޮޅުން ގިނަ ބަޔަކު އޭނާއަކީ މޮޅު ބަތަލާއެއްގެ ގޮތުގައި ދެކޭތީ، ޑައިރެކްޝަނަށް ލާސަން ނިކުންނާނީ އެވަރުގެ ޒިންމާއެއް ވަރަށް ފުރިހަމަ އަށް ނެގޭނެ ކަމުގެ ޔަގީންކަން އޮވެގެން ކަމަށް ގިނަ ބަޔަކު ގަބޫލު ކުރެ އެވެ. އޭނާ މީގެ ކުރިން ވަނީ ބައެއް ކުރު ފިލްމްތައް ޑައިރެކްޓް ކުރުމުގައި އަތް ގާތްކޮށް ދީފަ އެވެ.
އެހެންވެ "ޔުނިކޯން ސްޓޯރް" އަކީ އާދައިގެ ފިލްމަކަށް ނުވާނެ އެވެ. މިއަށް އިންތިޒާރު ކުރަން ޖެހޭ ސަބަބުތަކެއް އެބަ ހުއްޓެވެ.
ފިލްމުގެ މަސައްކަތް ލޮން އެންޖަލިސްގައި މިހާރު ވަނީ ފަށައިފަ އެވެ. "ޔުނިކޯން ސްޓޯރް" ޕްރޮޑިއުސް ކުރަނީ ހާކިއުލެސް ފިލްމް ފަންޑާއި ރިއާ ފިލްމްސް ގުޅިގެންނެވެ.
"ޔުނިކޯން ސްޓޯރް" ރިލީޒް ކުރާނެ ތާރީހެއް އަދި އިއުލާނެއް ނުކުރެ އެވެ.