06 އެޕްރީލް 2021 - 21:33
ރާއްޖޭގައި މިދިޔަ ފެބްރުއަރީ މަހު ފެށި ވެކްސިން ޕްރޮގްރާމުގެ ދަށުން، އާބާދީގެ 57 ޕަސެންޓް މީހުންނަށް ކޮވިޑް-19 އިން ރައްކާތެރިވާން ބޭނުންކުރާ ވެކްސިން ދީފި ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބުނެފި އެވެ.
އުމުރުން ދުވަސްވީ މީހުންނަށް އިސްކަންދީގެން ވެކްސިން ޖަހަން ފެށި ނަމަވެސް، 18 އަހަރުން މަތީގެ އެންމެންނަށް ވެކްސިން ޖެހުމުގެ ފުރުސަތު ފަހުން ދިނެވެ. އެޗްޕީއޭ އިން މިރޭ ޓްވިޓާ މެދުވެރިކޮށް ބުނީ، ވެކްސިން ޖެހުމަށް ޝަރުތު ހަމަވާ މީހުންގެ ތެރެއިން، އާބާދީގެ 57 ޕަސެންޓު މީހުން ވެކްސިންގެ ފުރަތަމަ ޑޯޒް ޖަހާފައިވާ ކަމަށެވެ.
މިހާތަނަށް 251،139 މީހުންނަށް ކޮވިޑް ވެކްސިންގެ ފުރަތަމަ ޑޯޒް ޖަހާފައިވާ އިރު، އޭގެ ތެރެއިން ގިނަ މީހުން ޖަހާފައި ވަނީ އިންޑިއާގައި އުފައްދާ ކޮވިޝީލްޑް ވެކްސިނެވެ. ނަމަވެސް ޗައިނާ އިން އުފެއްދި ސައިނޮފާމް ވެކްސިންގެ ފުރަތަމަ ޑޯޒް ޖަހަން ވެސް މިހާރު ވަނީ ފަށައިފަ އެވެ.
ކޮވިޝީލްޑް ވެކްސިން ޖަހަން ފެށި ފަހުން އަށް ހަފްތާ ފާއިތުވެފައި ވާތީ، އެ ވެކްސިންގެ ދެވަނަ ޑޯޒް ޖެހުމުގެ މަސައްކަތް ވެސް މިހާރު ވަނީ ފަށައިފަ އެވެ. މިހާތަނަށް 5،753 މީހުންނަށް ދެވަނަ ޑޯޒް ޖަހައިދީފައި ވެ އެވެ. އޭގެ ތެރޭގައި އަށް ހަފްތާ ހަމަ ނުވި ނަމަވެސް، ޒަރޫރީ ބޭނުމެއްގައި ރާއްޖެއިން ބޭރަށް ދާން ޖެހޭ މީހުން ވެސް ހިމެނެ އެވެ.
ކޮވިޑް-19 އަށް ޕޮޒިޓިވްވާ މީހުންނާއި އެކްޓިވް ކޭސްގެ އަދަދު މި ދުުވަސްވަރު ގިނަ ނަމަވެސް، ހޮސްޕިޓަލުގައި އެޑްމިޓްކޮށްގެން ފަރުވާ ދޭން ޖެހޭ މީހުންގެ އަދަދު ނިސްބަތުން ދަށެވެ. މިވަގުތު 3،059 މީހުން ކޮވިޑަށް ފަރުވާ ހޯދަމުން އަންނަ އިރު، ހޮސްޕިޓަލުގައި އެޑްމިޓްކޮށްގެން ފަރުވާ ދެނީ 90 މީހުންނަށެވެ.