01 އެޕްރީލް 2021 - 12:20
ދެ ދަރިންނާއި ބަލި ފިރިމީހާއާ އެކު ދިރިއުޅެމުން އަންނަ އާސިޔަތު އާސިމާ އާމްދަނީ ހޯދަމުން އައީ ރެސްޓޯރަންޓެއްގައި ޑެލިވަރީގެ ހިދުމަތް ދީގެންނެވެ. ބަލި ހާލަތު ހުރި ގޮތުން ފިރިމީހާ އަށް މާ ބޮޑު އާމްދަނީއެއް ނުލިބޭތީ، ދިރިއުޅުމުގެ ހުރިހާ ކަމެއް ބިނާވެފައި އޮތީ، އާސިޔަތު އަށް މަހަކު ލިބޭ 5،000ރ. އަށެވެ. އެކަމަކު ފިރިމީހާ ކޮވިޑަށް ޕޮޒިޓިވް ކަމަށް ބުނެ، އެޗްޕީއޭ އިން ދިން ނުބައި ނަތީޖާއަކާ އެކު، އޭނާ މިހާރު ހުރީ ވަޒީފާ ގެއްލި، ފައިސާ ލިބޭނެ އިތުރު ގޮތެއް ވެސް ނެތި ގޮތް ހުސްވެފަ އެވެ.
"ކުރިއަށް އޮތީ ރޯދަ މަސް. އެކަމަކު އަތުގައި ނެތް އެކައްޗެއް ވެސް،" އުމުރުން 49 އަހަރުގެ މަންމަ ބުންޏެވެ.
އާސިޔަތު ބުނިގޮތުގައި މީހަކަށް ހަދިޔާކުރި އެއް ކިޑްނީއާ އެކު، ކޮވިޑްގެ ބަލިމަޑުކަމުގައި އޭނާގެ ފިރިމީހާ އުޅުނީ ވަރަށް ބަލައިގެންނެވެ. މިދިޔަ އަހަރު ވަރަށް ބޮޑަށް ބަލިވުމާ އެކު، އޭނާއަކަށް މިހާރު ބުރަ މަސައްކަތެއް ވެސް ނުކުރެވެ އެވެ. އެކަމަކު މަސައްކަތް ހޯދަން ގިނަ ވަގުތު ބޭރުގައި އުޅެން ޖެހޭތީ، ރައްކާތެރިވުމަށް ގިނަ ގިނައިން ރެންޑަމް ސާމްޕަލް ނެގި އެވެ. އާސިޔަތުގެ ބަހުން ނަމަ، މާލެއިން އެންމެ ގިނައިން ސާމްޕަލް ނަގާ އެކަކަށް އޭނާގެ ފިރިމީހާ ވާނެ އެވެ.
އޭނާ ކޮވިޑަށް ޕޮޒިޓިވްވި ކަމަށް ދެއްކީ ވެސް އެހެން ނެގި ސާމްޕަލްއަކުންނެވެ. އެ ދުވަހު މަގުމަތީގައި އުޅެނިކޮށް، އެޗްޕީއޭ އިން ގުޅައި ކޮވިޑަށް ޕޮޒިޓިވްވި ކަމަށް ބުންޏެވެ. އެއްވެސް އަލާމާތެއް ނެތުމާ އެކު، އޭނާ އެކަން އަދިވެސް ޔަގީންކުރުމަށް، ގެއަށް ދިޔަ މަގުމަތީގައި އިތުރު ސާމްޕަލެއް ނެގި އެވެ. އެއީ މި މަހުގެ 17 ވަނަ ދުވަހެވެ.
އޭގެ ނަތީޖާ ނުލިބުނު ނަމަވެސް އާސިޔަތުގެ ފިރިމީހާއާ އެކު މުޅި އާއިލާ ގޭގައި ކަރަންޓީނުވި އެވެ. އެކަހެރިވެގެން ތިބި އިރު މަސައްކަތަށް ނުކުންނަން، އޭނާ ވަޒީފާ އަދާކުރާ ރެސްޓޯރަންޓުން ވަރަށް ގުޅި އެވެ. އެކަމަކު އެއީ އެހެން މީހުންނަށް ވެސް ނުރައްކާވެދާނެ ކަމަކަށް ވެދާނެތީ އެކަމާ ދެކޮޅު ހެދުމުން، ފަސް ވަނަ ދުވަހު، އާސިޔަތު ވަޒީފާއިން ވަކިކުރި އެވެ. ދަރިފުޅުގެ މޮކް ޓެސްޓު ހިނގަމުން ދިޔަ ނަމަވެސް، ކަރަންޓީނުގައި ހުންނަން ޖެހުމުން އެ ވެސް ގެއްލުނީ އެވެ.
ފިރިމީހާގެ ބަލި ރަނގަޅުވެ، އާއިލާގެ ކަރަންޓީނުގެ މުއްދަތު ހަމަވީ ކަމަށް އެޗްޕީއޭ އިން އެންގީ މިދިޔަ މަހުގެ 28 ވަނަ ދުވަހު އެވެ. އަަދި ޖެހިގެން އައި ދުވަހު ހާލު ބަލާ ޕޯޓަލް ޗެކްކުރި އިރު، 17 ވަނަ ދުވަހު ފިރިމީހާ ނެގި ސާމްޕަލްގެ ނަތީޖާ ފެންނަން އޮތެވެ: ނެގެޓިވް އެވެ. މިއޮތް ހުރިހާ ދުވަހު އެ މީހުން ގޭގައި ކަރަންޓީނުވެ ތިބީ، ނުބައި ނަތީޖާއަކަށް ބަލައިގެންނެވެ.
އާސިޔަތު ގަބޫލުކުރާ ގޮތުގައި އެހެން ދިމާވީ އެޗްޕީއޭގެ ފަރުވާކުޑަކަމުންނެވެ. އޭގެ ސަބަބުން އޭނާގެ ވަޒީފާ ގެއްލި، ދަރިފުޅުގެ ކިޔެވުން ވެސް ގެއްލުނީ އެވެ. ރޯދަ މަސް ބޯމަތިވި އިރު، އަތުގައި އެންމެ ރުފިޔާއެއް ވެސް ނެތް ކަމަށާއި ގޭގައި ކާނެ އެކައްޗެއް ވެސް މި ވަގުތު ނެތް ކަމަށް އޭނާ ބުންޏެވެ.
އެޗްޕީއޭގެ ނުބައި ނަތީޖާއާ އެކު ކުރިމަތިވި ހިތާމަ އޭނާ އެ އިދާރާއާ ހިއްސާކުރި އެވެ. އެތަނުން އެންގީ ކަރަންޓީނުގެ ސަބަބުން ވަޒީފާއިން ވަކިނުކުރެވޭނެ ކަމަށާއި މައްސަލަ ހުށަހަޅަން ވަޒީފާއާ ބެހޭ ޓްރައިިބިއުނަލް އަށް ގުޅުމަށެވެ. އެތަނުން ގުޅުމުން ބުނީ މައްސަލަ ބެލޭނީ ލޭބާ މިނިސްޓްރީ އަށް ކަމަށެވެ.
"ލޭބާ މިނިސްޓްރީ އަށް ގުޅިތަނުން އަޅުގަނޑުގެ ފޯނުން ލާރި ހުސްވެއްޖެ. ދެން ކިހިިނެއްތޯ ހަދާނީ؟ ކީއްތޯ ވާނީ މި ފަދަ މައްސަލަތައް ފަސޭހައިން ބެލޭނެ އިންތިޒާމުތައް ހަމަޖައްސާފައި ހުންނަ ނަމަ،" އާސިޔަތު ބުންޏެވެ.
މާލޭގެ ރައްވެއްސަކަށް ވިޔަސް، އާސިޔަތުގެ އާއިލާ އުޅެނީ 10 ފޫޓުގެ ކުޑަ ކޮޓަރިގަނޑެއްގަ އެވެ. ފެނާއި ކަރަންޓު ބިލް ދައްކަނީ އޭނާ އަށް ލިބޭ މަދު ފައިސާކޮޅުންނެވެ. ކޮވިޑްގެ ބަލިމަޑުކަމުގެ ކުރިން ނެގި ސައިކަލަށް ފައިސާ ނުދެއްކި، އޮތީ ކޯޓަށް ގެންދާ ހިސާބުގަ އެވެ. ނުކުޅެދުންތެރިކަން ހުންނަ ކުޑަކުއްޖެއް ގޮވައިގެން އުޅޭއިރު އެ އާއިލާގެ ނިކަމެތިކަން ބޮޑެވެ. އެކަމަކު އެ މީހުންގެ އެންމެ ބޮޑު ހިތާމައަކީ، ބައެއްގެ ފަރުވާ ކުޑަކަމުން ދިމާވި ހިތްދަތިކަމުގައި އެއްވެސް ބަޔަކު ޒިންމާ ނުނެގުމެވެ.
"ދެން އަޅުގަނޑު މިއުޅެނީ ކުރިއަށް އޮތް އިންތިހާބުގައި ވޯޓު ފޮއްޓެއް ކައިރީ އިންނަން ފޯމު ލައިގެން. އެތަނުން އެއްޗެއް ލިބުނިއްޔާ މި ރޯދަ މަހު ކެވޭނީ ވެސް،" އާސިޔަތު ބުންޏެވެ.