14 ނޮވެމްބަރ 2016 - 17:24
މާލޭގައި މި ފަހަކަށް އައިސް މާރާމާރީތައް އިތުރުވެ، ގިނަ ބަޔަކު ހައްޔަރު ކޮށްފައި ވިޔަސް އެއީ ގޭންގުތަކުން ހިންގާ މާރާމާރީތަކެއް ކަމެއް ބުނަން އަދި އަވަސް ކަމަށް ފުލުސް އޮފީހުން ބުނެފި އެވެ.
މިދިޔަ އަންގާރަ ދުވަހުގެ ރޭ މަރުތޭލަ އާއި ތޫނު ހަތިޔާރު ބޭނުން ކޮށްގެން މާރާމާރީ ހިންގައި ދެ މީހަކު ޒަހަމް ކޮށްލާފައިވާ އިރު ރޭ އިރާކޮޅު ވެސް ޒުވާނަކަށް ތޫނު އެއްޗަކުން ހަމަލާދީ ވަނީ ޒަހަމް ކޮށްލައިފަ އެވެ. އޭޑީކޭ ހޮސްޕިޓަލުގެ އައިސީޔޫގައި މިހާރު ފަރުވާ ދެމުން އަންނަ 18 އަހަރުގެ އެ ޒުވާނާގެ ހާލު ވަރަށް ސީރިއަސް އެވެ.
މި ދެ މާރާމާރީއާ ގުޅިގެން ޖުމްލަ ފަންސާހަކަށް މީހަކު ވަނީ ހައޔަރު ކޮށްފަ އެވެ. އޭގެ ތެރެއިން 20 މީހުން ހައްޔަރު ކުރީ ރޭގެ މާރާމާރީއާ ގުޅިގެންނެވެ.
ފުލުހުންގެ ސްޕޯކްސްޕާސަަން، ސުޕްރިންޓެންޑެންޓް އަހުމަދު ޝިފާން ވިދާޅުވީ ކައިރި ކައިރީގައި ދެތިން މާރާމާރީ ހިންގައި ބަޔަކު ޒަހަމްކޮށްލި މައްސަލަ މިހާރު ތަހުގީގު ކުރަމުން އަންނަ ކަމަށާއި ތަހުގީގު ކުރިއަށް ދާތީ މިއީ ގޭންގު މާރާމާރީއެއް ކަމަށް ބުނަން އަދި އަވަސް ކަމަށެވެ.
"އަޅުގަނޑުމެންނަކަށް އަދި ނޭނގެ އެ މީހުން (މާރާމާރީ ހިންގި) މޯޓިވްއެއް އަދި އެކަން ކުރީ ކީއްވެ ކަމެއް ބުނާކަށް." ޝިފާން ވިދާޅުވި އެވެ
އޭނާ ވިދާޅުވީ މާރާމާރީއާ ގުޅިގެން މިހާރު ހައްޔަރު ކުރަމުން ދަނީ އެކަމަށް ތުހުމަތު ކުރެވޭ މީހުންނާއި އެ ފަދަ ކަމެއް ތަކުރާރުވިޔަ ނުދިނުމަށް ރައްކާތެރިވުމުގެ ގޮތުން ހައްޔަރު ކުރަން ޖެހޭ މީހުން ކަމަށެވެ.
އަންގާރަ ދުވަހުގެ ރޭ ހިންގި މާރާމާރީއާ ގުޅިގެން 25-30 މީހަކު ފުލުހުންގެ ބެލުމުގެ ދަށަށް ގެންދިޔަ ނަމަވެސް އެ އެންމެން ވަނީ އޭގެ ތިން ދުވަސް ފަހުން ދޫކޮށްލައިފަ އެވެ.
ޝިފާން ވިދާޅުވީ މި ފަދަ މާރާމާރީތައް ހިންގަން ފެށުމުން ގިނަ މީހުން ގަބޫލު ކުރަނީ އެއް ގުރޫޕެއްގެ މީހުން އަނެއް ގުރޫޕުގެ މީހަކަށް ބަދަލު ހިފުމުގެ ގޮތުން ހަމަލާ ދެނީ ކަމަށާއި އެކަމަކު ބައެއް ފަހަރަށް މިއީ ހަމައެކަނި ދެ މީހެއްގެ ދެމެދުގައި ހިނގާ މާރާމާރީއަކަށް ވެސް ވާ ކަމަށެވެ.
އޭނާ މިހެން ވިދާޅުވި ނަމަވެސް، މިދިޔަ އަންގާރަ ދުވަހުގެ ރޭ އިބްރާހީމީ މިސްކިތް ކައިރީގައި ހިނގި މާރާމާރީގައި ސައިކަލެއްގައި ދިޔަ ދެ މީހަކަށް ހަމަލާދިނީ މަގުމަތިން ދިޔަ ގުރޫޕެކެވެ. އަދި ރޭގެ މާރާމާރީއާ ގުޅިގެން 20 މީހެއްގެ އިތުރުން ތިން ސައިކަލެއް ފުލުހުންގެ ބެލުމުގެ ދަށަށް ގެންދިޔުމުން މިއީ ގިނަ ބަޔަކު ބައިވެރިވެގެން ހިންގި ކަމެއް ކަމަށް ބެލެވެ އެވެ.
މާލޭގައި އަނެއްކާ ވެސް މާރާމާރީ އާއްމު މިވީ، އެ ފަދަ ކަމެއް ނުހިނގާތާ ގިނަ ދުވަސްތަކަކަށް ފަހު އެވެ. އެކަމަކު މިދިޔަ ޖޫން މަހުގެ ތެރޭގައި ހިންގި ގޭންގު މާރާމާރީތަކުގައި 14 އަހަރުގެ ދެ ކުއްޖަކު ވަނީ މަރާލައިފަ އެވެ.