21 މާޗް 2021 - 17:52
މި މާޗު މަހުގެ މިހާތަނަށް ރާއްޖެ އަށް އެންމެ ގިނަ ޓޫރިސްޓުން އައި ދުވަހަކަށް އިއްޔެ ވެެއްޖެ އެވެ.
އާންމު ގޮތެއްގައި ވެސް ކޮންމެ ހަފުތާއެއްގެ ހޮނިހިރާއި އާދިއްތަ ދުވަހަކީ އެންމެ ގިނަ އަދަދަކަށް ޓޫރިސްޓުން އަންނަ ދުވަހެވެ. މި މަހުގެ ވެސް މިދިޔަ ތިން ހަފުތާގެ ހޮނިހިރު އަދި އާދިއްތައިގައި 4،000 އަށް ވުރެ ގިނަ ޓޫރިސްޓުން ޜާއްޖެ އައިސްފައިވެ އެވެ.
ތަފާސްހިސާބުތަކަށް ބަލާއިރު ރާއްޖެ އަށް އިއްޔެ ވަނީ 4،500 ޓޫރިސްޓުން އައިސްފައި ވެ އެވެ. އެހެންވެ، މިއީ މިހާތަނަށް މި މަހުގެ ރެކޯޑެވެ.
މި އަހަރު އެންމެ ގިނަ ޓޫރިސްޓުން އައިސްފައިވަނީ މިދިޔަ މަހު އެވެ. އެ މަހު ރާއްޖެ އަށް 96،000 ޓޫރިސްޓުން އައިސްފައިވެ އެވެ. މި އަހަރުގެ މިހާތަނަށް 255،000 ޓޫރިސްޓުން ވަނީ އައިސްފަ އެވެ.
ސަރުކާރުގެ އަމާޒަކީ މި އަހަރު 1.5 މިލިއަން ޓޫރިސްޓުން ގެނައުމެވެ. މިވަގުތު ރާއްޖެއަށް އެންމެ ގިނަ ޓޫރިސްޓުން އަންނަނީ އިންޑިއާ އާއި ރަޝިޔާއިންނެވެ. އެކަމަކު، ކޮވިޑްގެ ހާލަތު އައުމުގެ ކުރިން ރާއްޖެ އަށް އެންމެ ގިނަ ޓޫރިސްޓުން އަންނަނީ ޗައިނާ އާއި ޔޫރަޕްގެ ގައުމުތަކުންނެވެ.
ކޮވިޑް ވެކްސިން ދިނުމާއެކު ގައުމުތަކުން ލުއިތައް ދޭން ފެށުމުން ރާއްޖެ އަށް އަންނަ ޓޫރިސްޓުން ވަރަށް ބޮޑަށް އިތުރުވާނެ ކަމަށް އެ ދާއިރާގައި އިސްކޮށް ހަރަކާތްތެރިވާ ކުންފުނިތަކުން ލަފާކުރެ އެވެ.
މިވަގުތު ރާއްޖޭގެ 45،000 އެނދު ޓޫރިސްޓުންނަށް ހުޅުވައިލައިވާ އިރު މިއީ ރާއްޖޭގައި ހުރި އެނދުގެ 94 ޕަސެންޓެވެ. ރާއްޖޭގެ ބެޑް ކެޕޭސިޓީގެ 76 ޕަސެންޓު ހިއްސާކުރަނީ ރިސޯޓުތަކެވެ.