14 ނޮވެމްބަރ 2016 - 05:58
ރާމްބޯގެ ނަމުން މަޝްހޫރު ހޮލީވުޑްގެ އެކްޓަރު ސިލްވެސްޓަ ސްޓެލޯންގެ އެއްވެސް އަންހެން ދަރިއަކު އެކްޓް ކުރުމުގެ ޝައުގުވެރި ކަމެއް ނެތް ކަމަށާއި ފިލްމު ކުޅުމުގެ އެއްވެސް ހިޔާލެއް ނެތް ކަމަށް އެ މީހުން ބުނެފި އެވެ.
ސްޓެލޯން، 70، ގެ ފަސް ކުދިންގެ ތެރޭގައި ހިމެނޭ ތިން އަންހެން ކުދިން ކަމަށްވާ ސޯފިއާ 20، ސިސްޓީން، 18، އަދި ސްކާލެޓް، 14، ބުނީ ބައްޕަގެ ފިޔަވަޅު މަތިން ހިނގުމުގެ ޝައުގުވެރި ކަމެއް އެއްވެސް ވަރަކަށް ނެތް ކަމަށެވެ.
އެހެންވެ އެކްޓް ކުރުމާ ދޭތެރޭ ދުވަހަކު ވެސް ނުވިސްނާ ކަމަށް އެ ތިން ބެއިން ބުންޏެވެ.
ސޯފިއާ، ސްކާލެޓް އަދި ސިިސްޓީން އަށް މިހާރު ވަނީ އާ ޝަރަފެއް ވެސް ލިބި، ތާރީހުގެ ތެރެއަށް ވަދެފަ އެވެ. އެއީ މިސް ގޯލްޑެން ގްލޯބް 2017 އަށް ތިން ބެއިން ވެސް ހޮވުމާ ގުޅިގެންނެވެ.
އެކަން ހޮލީވުޑް ފޮރިން ޕްރެސް އެސޯސިއޭޝަން (އެޗްއެފްޕީއޭ) އިން ވަނީ މިދިޔަ ބުރާސްފަތި ދުވަހު އިއުލާން ވެސްކޮށްފަ އެވެ. މިއީ އެއްބަނޑު އެއްބަފާ ތިން ބެއިން މިސް ގޯލްޑެން ގްލޯބަށް ހޮވުނު ފުރަތަމަ ފަހަރު ވެސް މެ އެވެ.
ނޫސްވެރިންނާ ވާހަކަ ދައްކަމުން ސިސްޓީން ބުނީ އެކްޓް ކުރުމަކީ އޭނާ އެއްގޮތަކަށް ވެސް ކުރާ ހިތްވާ ކަމެއް ނޫން ކަމަށެވެ.
"އެހެންވެ އެއީ އަހަރެން ކުރާނެ ކަމެއް ނޫން،" މޮޑެލްއެއްގެ ގޮތުގައި މަސައްކަތް ކުރަމުން އަންނަ ސިސްޓިން ބުންޏެވެ.
ސޯފިއާ ބުނީ ކެމެރާގެ ކުރިމަތިން އޭނާ ނުފެނުނު ނަމަވެސް ބައްޕަ އާ އެކު ކެމެރާގެ ފަހަތުން ފެނިދާނެ ކަމަށެވެ.
"އަހަރެން އަބަދު ވެސް ބައްޕަ އާ އެކު މަސައްކަތް ކުރާ ހިތްވޭ. އެކަމަކު އެއީ ކެމެރާގެ ފުރަގަހުގައި،" ސޯފިއާ ބުންޏެވެ.