10 މާޗް 2021 - 19:22
ރައްޔިތުންނަށް ވެވަޑައިގަތް ވައުދު ފުއްދެވުން ނޫން އެހެން ވިސްނުމެއް މި ވަގުތު ނެތް ކަމަށާއި އެކަން ފުރިހަމަނުކޮށް ދެ ވަނަ ދައުރަކަށް ވިސްނުމަކީ ކުރަން ހެޔޮވާނެ ކަމެއްގެ ގޮތުގައި ދެކެވަޑައިނުގަންނަވާ ކަމަށް ރައީސް އިބްރާހިމް މުހައްމަދު ސޯލިހް މިއަދު ވިދާޅުވެއްޖެ އެވެ.
ރައީސް އޮފީހުގައި ވާޗުއަލްކޮށް ބޭއްވި ނޫސްވެރިންގެ ބައްދަލުވުމުގައި، ވެރިކަމުގެ ދެ ވަނަ ދައުރަކަށް ކުރިމަތިލައްވާނަންތޯ ނޫސްވެރިއަކު ސުވާލުކުރުމުން ރައީސް ވިދާޅުވީ އެމަނިކުފާނަށް މި ވަގުތަށް މުހިއްމީ ތަރައްގީގެ ކަންކަމާއި ރައްޔިތުންނަށް ވެވަޑައިގަތް ވައުދުތައް ފުއްދެވުން ކަމަށެވެ.
އެމަނިކުފާނު ވިދާޅުވީ ވެރިކަމަށް ވަޑައިގަތުމަށް ފަހު ޖެހިގެން އަންނަ ދުވަހުގެ ވިސްނުމަކީ ދެ ވަނަ ދައުރަކަށް ކުރިމަތިލެއްވުން ކަމަށް ނިންމަވައިފި ނަމަ ކޮންމެ މަޝްރޫއެއް ހިންގާނީ ތާއީދު ލިބޭނެ ގޮތްތަކަށް ބަލައިގެން ކަމަށެވެ. އެކަމަކު އެމަނިކުފާނު ކަންކަން ކުރައްވަނީ ވެރިކަމަށް ކުރިމަތިލައްވާ ވިސްނެވުމުގައި ނޫން ކަމަށް ވިދާޅުވި އެވެ.
"އަޅުގަނޑު މި މަސައްކަތް ކުރަނީ ވީ ވައުދުތައް އިހަށް ފުއްދޭތޯ. އެ ނޫން ވިސްނުމެއް އަޅުގަނޑުގެ ނެތް. ވެރިކަމުގެ ވާހަކަ ދައްކަން އަޅުގަނޑު ހެޔޮނުވާނެ ވީ ވައުދުތައް ނުފުއްދައިދީ، ރައްޔިތުން ގަބޫލެއް ނުކުރާނެ،" ރައީސް ވިދާޅުވި އެވެ.
ރައީސް ވިދާޅުވި ގޮތުގައި ތަަރައްގީވަމުން އަންނަ އަދި ރާއްޖެ ކަހަލަ ވަރަށް ގިނަ މަޝްރޫއުތަކެއް ހިންގަން ހުންނަ ގައުމެއްގައި ދިގު މުއްދަތެއްގެ ރަނގަޅު ގައުމީ ސިޔާސަތެއް ނެތިއްޖިއްޔާ ފަސް އަހަރުގެ މުއްދަތު އެކަށީގެންވާ ކަމަކަށް ގަބޫލެއް ނުކުރެއްވެ އެވެ. އެއީ ސަރުކާރު ބަދަލުވާ ކޮންމެ ފަހަރަކު އެއް ސިޔާސަތުން އަނެއް ސިޔާސަތަށް ބަދަލުވުމަކީ ސަރުކާރަށް ބޮޑު ގެއްލުންތަކެއް ލިބޭ ކަމަކަށް ވާތީ ކަމަށެވެ.
މިސާލެއް ޖައްސަވަމުން ވިދާޅުވީ ކުރީގެ ރައީސް އަބްދުﷲ ޔާމީންގެ ވެރިކަމުގައި ލާމަރުކަޒީ ނިޒާމް އެމަނިކުފާނު ގަބޫލުނުކުރެއްވި ކަމަށެވެ. ޔާމީން ވިސްނުންފުޅު ގެންގުޅުއްވީ މާލެއަށް އެންމެން ޖަމާކުރައްވައި މާލޭގައި ހުރިހާ ހިދުމަތެއް ދެއްވަން ކަމަށް ރައީސް ވިދާޅުވި އެވެ.
ބޯހިޔާވަހިކަމާއި ސިއްހީ ހިދުމަތާއި ތަރައްގީގެ އެހެން މަޝްރޫއުތައް ކަމުގައި ވިޔަސް އެ ވިސްނެވުމުގައި މާލެ އަށް ޖަމާކޮށްފައިވާ ކަމަށެވެ. ނަތީޖާއަކީ ރަށްރަށުން އަތޮޅުތަކުން މީހުން މިތަނަށް ޖަމާވާން މަޖުބޫރުވުން ކަަމަށް އެމަނިކުފާނު ވިދާޅުވި އެވެ.
ރައީސް ވިދާޅުވި ގޮތުގައި މި ސަރުކާރުން ގަބޫލުކުރަނީ ކުރީގެ ވެރިކަމާ މުޅިން އިދިކޮޅަށް ރާއްޖެ ތަރައްގީ ކުރެވޭނީ ލާމަރުކަޒުކޮށްގެންނެވެ. އެހެންވެ ތަރައްގީގެ ހުރިހާ މަޝްރޫއެއް ރަށްތަކުގައި އަލުން ފަށަން ޖެހުނީ ކަމަށް ވިދާޅުވި އެވެ.
"އެންމެން ގަބޫލުކުރާ ތަރައްގީގެ ސިޔާސަތެއް ނެތި ފަސް އަހަރުން ފަސް އަަހަރުން ބަދަލުކުރަން ވެއްޖިއްޔާ ވަަރަށް ބޮޑެތި ގެއްލުންތަކެއް ލިބޭނެ. އެހެންނެއް ނޫން، ސިޔާސީ ގޮތުން ބަލާއިރުގައި އަޅުގަނޑު ގަބޫލުކުރަނީ ފަސް އަހަރަކީ ދިގު މުއްދަތެއް ކަަމަށް ވެރިކަން ކުރަން،" ރައީސް ވިދާޅުވި އެވެ.
އެމަނިކުފާނު ވިދާޅުވީ ރިޔާސީ ދައުރެއް ފަސް އަހަރަށް އޮތުމަކީ އޮންނަން ޖެހޭނެ ގޮތް ކަމަކަށެއް ދެކެވަޑައިނުގަންނަވާ ކަމަށެވެ. އެކަމަކު އެންމެންނަށް ގަބޫލުކުރެވޭ ތަރައްގީގެ ސިޔާސަތުތަކެއް، އެއީ ސަރުކާރު ބަދަލުވިޔަސް ބަދަލުނުވާނެ ކަންތައްތަކަކަށް ވާން ޖެހޭ ކަމަށް ވިދާޅުވި އެވެ.
"އެހެން އެކަން ނުވެއްޖިއްޔާ ގައުމަށް ބޮޑެތި ގެއްލުންތައް ކުރިމަތިވޭ، މިހާރު ވެސް ކުރިމަތިވަމުން މިދަނީ،" ރައީސް ވިދާޅުވި އެވެ.
ވެރިކަމަށް ހަމަ ވަޑައިގަތުމާ އެކު ޖެހިގެން އަންނަ ދުވަހުގެ ނިންމުމަކީ ދެ ވަނަ ދައުރަކަށް ކުރިމަތިލެއްވުން ކަމުގައިވާ ނަމަ ރައްޔިތުންނަށް ޚިދުމަތް ނުކޮށްދެވޭނެ ކަމަށް ރައީސް ވިދާޅުވި އެވެ.
"އަޅުގަނޑު ވެރިކަމަށް އައިސް މިކުރާ ކަމަކީ ވެރިކަމަށް ވީ ވައުދުތައް ރައްޔިތުންނަށް ފުއްދޭތޯ ބެލުން،" ރައީސް ވިދާޅުވި އެވެ.