09 މާޗް 2021 - 22:40
މިދިޔަ 24 ގަޑިއިރު ތެރޭ ކޮވިޑް-19 އަށް ޕޮޒިޓިވްވި 115 މީހުންނާ އެކު މިހާތަނަށް ރާއްޖޭން މި ބައްޔަށް ޕޮޒިޓިވްވި މީހުންގެ އަދަދު 21،000 އަށް ވުރެ އިތުރުވެއްޖެ އެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނި ގޮތުގައި މިދިޔަ 24 ގަޑިއިރު ތެރޭ 3،877 ސާމްޕަލް ޓެސްޓު ކުރި އޭގެ ތެރޭގައި ގިނައީ މާލޭ ސަރަހައްދުން ބަލި ޖެހުނު މީހުންނެވެ. އެއީ 98 އެވެ. މީހުން ދިރިއުޅޭ އެހެން ރަށްތަކުން ފަސް މީހުން ޕޮޒިޓިވްވި އިރު، ރިސޯޓުތަކުން 12 މީހަކަށް ބަލި ޖެހުނެވެ.
މި މީހުންނާ އެކު މިހާރު ވަނީ ރާއްޖޭން ކޮވިޑް ޖެހުނު މީހުންގެ އަދަދު 21،034 އަށް އަރައިފަ އެވެ.
ހޮސްޕިޓަލްތަކުގައި އެޑްމިޓްކޮށްގެން ފަރުވާ ދޭ މީހުންގެ އަދަދު އިއްޔެ 179 ގައި ހުރުމަށް ފަހު މިއަދު ވަނީ 165 އަށް ދަށްވެފަ އެވެ.
ކޮވިޑްގައި މިހާތަނަށް 64 މީހުން މަރުވެފައި ވާއިރު، އެކްޓިވް ކޭސްތަކުގެ އަދަދަކީ 2،535 އެވެ.
ކޮވިޑްގެ ތިން ވަނަ ރާޅާ ކުރިމަތިވެފައިވާއިރު، ބަލި އަދިވެސް ކޮންޓްރޯލެއް ނުވެ އެވެ. ބަލިން ރައްކާތެރިވުމަށް ގިނަ ފިޔަވަޅުތަކެއް، މާލެ އާއި ރަށްރަށުގައި މިހާރު ވަނީ އަޅައިފަ އެވެ.