08 މާޗް 2021 - 16:41
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގައި މަސައްކަތް ކުރާ ހުރިހާ އަންހެން މުވައްޒަފުންނަށް ކޮންމެ މަހަކު އެއް ދުވަހުގެ ހާއްސަ ޗުއްޓީއެއް ދޭން ނިންމައިފި އެވެ.
އަންހެނުންގެ ދުވަހުގެ ތަހުނިޔާ ކިޔައި އެޗްޑީސީން ކޮށްފައިވާ ޓްވީޓްގައި ބުނީ އެ ކުންފުނީގެ މެނޭޖިން ޑިރެކްޓަރު ސުހެއިލް އަހުމަދުގެ އިސް ނެންގެވުމަށް، "ކަނބަލުންގެ ޗުއްޓީ" ގެ ނަމުގައި ހާއްސަ މެޑިކަލް ލީވްއެއް ދޭން ނިންމާފައިވާ ކަމަށެވެ. މިއަދު ފާހަގަކުރާ އަންހެނުންގެ ދުވަހާ ގުޅުވައިގެން ގެނައި މި ބަދަލާ އެކު އެ ކުންފުނީގައި މަސައްކަތް ކުރާ ކޮންމެ އަންހެން މުވައްޒަފަކަށް ވެސް ކޮންމެ މަހަކު އެއް ދުވަހުގެ ޗުއްޓީއެއް ލިބޭނެ އެވެ.
އެޗްޑީސީގައި މިވަގުތު 166 އަންހެން މުވައްޒަފުން މަސައްކަތް ކުރެ އެވެ. އެޗްޑީސީއަކީ މިފަދަ ގޮތަކަށް އަންހެން މުވައްޒަފުންނަށް ހާއްސަކޮށްގެން ކޮންމެ މަހަކު ހާއްސަ މެޑިކަލް ލީވްއެއް ދޭން ނިންމި ފުރަތަމަ ކުންފުންޏެވެ.
އެޗްޑީސީން ބުނީ މި ފަދަ ނިންމުމެއް ނިންމީ ބައިނަލްއަގްވާމީ އަންހެނުންގެ ދުވަހާ ގުޅިވައިގެން އެކުންފުނިން ފެށި ހާއްސަ ކަމެއް ކަމަށެވެ. އަންހެނުންގެ ދުވަހާ ގުޅިގެން އެ ކުންފުނީގެ އަންހެން މުވައްޒަފުންނަށް ހާއްސަކޮށް އެޗްޑީސީން ވަނީ އިސްޓިޓިއުޓް ފޯ ވެލްނެސް އެޑިއުކޭޝަނާ ގުޅިގެން އޮންލައިންކޮށް ހާއްސަ ސެޝަނެއް ވެސް ކުރިއަށް ގެންގޮސްފަ އެވެ.