12 ނޮވެމްބަރ 2016 - 05:49
ބިލިއަނަރު ޑޮނަލްޑް ޓްރަމްޕް އެމެރިކާގެ ރައީސް ކަމުގެ މަގާމަށް ފައި ނެންގެވުމާ އެކު ވެސް އޭނާގެ ޕްލޮޕް ފިލްމެއްގެ ވާހަކަ މީޑިއާ އަށް ތިލަވި އެވެ. ކަން ދިމާކުރި ގޮތުން އެއީ ރާއްޖޭގައި ވެސް ބައެއް މަންޒަރުތައް ނަގާފައިވާ ފިލްމެކެވެ. މިއީ އެ ވާހަކަ އާކޮށްލަން ރަނގަޅު ވަގުތެކެވެ. ޓްރަމްޕަކީ މިހާރު އެމެރިކާގެ އިންތިޚާބީ ރައީސް އެވެ.
އެ ފިލްމަކީ ޖޯން ޑެރެކް ޑައިރެކްޓް ކުރި "ގޯސްޓްސް ކާންޓް ޑޫ އިޓް" އެވެ. ރާއްޖޭގެ އިތުރުން ސްރީ ލަންކާ އާއި އެމެރިކާގައި މަންޒަރުތައް ނަގާފައިވާ މި ފިލްމު ކުޅެފައި ވަނީ 1989 ވަނަ އަހަރު އެވެ.
ޒުވާން އަންހެނަކު، އުމުރުން ދުވަސްވީ މީހަކާ ކައިވެނިކޮށްގެން ދިމާވާ މައްސަލަތަކަކާއި ފިރިހެން މީހާ އަމިއްލަ އަށް މަރުވެ، އޭނާގެ ރޫހު އެނބުރި އަންނަން ޒުވާން ފިރިހެނަކު މަރާލާ ވާހަކައެއްގެ މައްޗަށް ކުޅެފައިވާ މި ފިލްމުގައި ޓްރަމްޕްގެ ރޯލު ވަރަށް ކުޑަ އެވެ.
ރާއްޖޭން އއ. ތޮއްޑޫ ނަގާފައިވާ މަންޒަރުތަކަކާއި އެހެން ބައެއް ތަންތަނުގައި ނަގާފައިވާ މަންޒަރުތަކެއް ވެސް ފެނެ އެވެ. ފިލްމުގެ އެއް ޕްރޮޑިއުސަރު، ސްރީ ލަންކާގެ ޗަންދްރަން ރަތުނަމް ބުނެފައިވާ ގޮތުގައި ރާއްޖޭގައި މަންޒަރުތައް ނެގީ ތޮއްޑޫގަ އެވެ. އެކަމަކު ރާއްޖޭގެ ރިސޯޓެއް ކަމަށް ބެލެވޭ ތަނެއްގައި ވެސް ބައެއް މަންޒަރުތައް ނަގާފައިވެ އެވެ.
"ޖޯން ޑެރެކް މި ފިލްމުގައި ހަމަ ސީދާ ޓްރަމްޕަށް ހާއްސަކޮށްގެން ބައެއް ލިޔުނީ. އަހަރެމެން އެ މަންޒަރު ނެގީ ޓްރަމްޕް ޓަވަރުގެ ބޯޑް ރޫމްގަ. އެ ޝޫޓިން އޮތީ އެންމެ ދުވަހަކު. އެއީ ވަރަށް އުފާވެރި ތަޖުރިބާއެއް،" ޗަންދްރަންއާ ހަވާލާދީ ލަންކާގެ ޑެއިލީ މިރާގައި ބުނެފައިވެ އެވެ.
ޓްރަމް ލައްވާ ކުޅުނު މަންޒަރުތައް ކަމުނުދާތީ އަލުން ޝޫޓްކުރަން ޖެހުނު ކަމަށާއި އެއްވެސް ޝަކުވާއެއް ނެތި އެ ބައިތައް ޓްރަމްޕް އަލުން ކުޅުއްވި ކަމަށް ވެސް ޗަންދްރަން ބުނެފައިވެ އެވެ.
އޭރުގެ މަޝްހޫރު ތަރިންނާ އެކު ކުޅުނު މި ފިލްމު ވީ ބޮޑު ފްލޮޕަކަށެވެ. އެންމެ ފީކަޅާ ފިލްމުތަކުގެ ކެޓަރީގައި ހިމެނި، ކަމުނުދާ ފިލްމުތަކަށް ދޭ ގޯލްޑެން ރާސްބެރީ އެވޯޑްސްގައި ޓްރަމްޕަށް، އެންމެ ފީކަޅާ ސަޕޯޓިން އެކްޓަރުގެ މަގާމު ލިބުނެވެ.