03 މާޗް 2021 - 08:29
މެންޗެސްޓާ (މާޗް 3) - އިނގިރޭސި ޕްރިމިއާ ލީގުގައި ރޭ ވުލްވްސް އަތުން 4-1 އިން މޮޅުވެ މެންޗެސްޓާ ސިޓީން ލީގުގެ އެއް ވަނައިގައި 15 ޕޮއިންޓަށް ލީޑުފުޅާކޮށްފި އެވެ.
ސިޓީ އެއް ވަނައިގައި އޮތީ 27 މެޗުން 65 ޕޮއިންޓާ އެކު އެވެ. ދެ ވަނައިގައި އޮތް މެންޗެސްޓާ ޔުނައިޓެޑަށް 26 މެޗުން ލިބިފައިވަނީ 50 ޕޮއިންޓެވެ. މިރޭ ޔުނައިޓެޑް ކުޅޭ މެޗުން ރަށުންބޭރުގައި ކްރިސްޓަލް ޕެލަސް އަތުން މޮޅުވެއްޖެނަމަ ސިޓީގެ ލީޑު 12 ޕޮއިންޓަށް ކުޑަވާނެ އެވެ. ސިޓީން ލީގުގައި ދެން އެންމެ އަވަހަށް ކުޅޭ މެޗުގައި އާދިއްތަ ދުވަހުގެރޭ އަމިއްލަ ދަނޑުގައި ނުކުންނާނީ ޔުނައިޓެޑާ ދެކޮޅަށެވެ.
ރޭގެ މެޗުގެ 15 ވަނަ މިނިޓްގައި ސިޓީން ލީޑުނެގީ ވުލްވްސްގެ ލެއޮންޑަ ޑެންޑޮންކާ އަތުން ބައިކޮޅަށް ވަން ގޯލަކުންނެވެ. މިއީ ރިޔާދު މާރޭޒް ނެގި ހުރަހެއް ދިފާއުކުރަން އުޅުމުގެ ތެރޭގައި ޑެންޑޮންކާ އަތުން ބައިކޮޅަށް ވަން ގޯލެކެވެ. ފުރަތަމަ ހާފު ނިމުމުގެ ކުރިން އައިމެރިކް ލަޕޯޓް ވަނީ ސިޓީ އަށް ދެ ވަނަ ލަނޑެއް ޖަހައިދީފަ އެވެ. އެކަމަކު ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު ނިންމީ އޮފްސައިޑް ކަމަށެވެ. މެޗުގެ 61 ވަނަ މިނިޓްގައި ވުލްވްސްގެ ކެޕްޓަން ކޮނާ ކޯޑީ ވަނީ އެ ޓީމަށް ނަތީޖާ ހަމަހަމަކޮށްދީފަ އެވެ.
ސިޓީން މޮޅުވި ގޯލުތައް ޖެހީ މެޗުގެ ފަހު ދިހަ މިނިޓާއި އިތުރު ވަގުތުގެ ތެރޭގަ އެވެ. މެޗުގެ 80 ވަނަ މިނިޓްގައި ކައިލް ވޯކާ ނަގައިދިން ހުރަހަކުން ގަބްރިއެލް ޖީސޫސް ސިޓީ އަށް ލީޑުނަގައިދިނެވެ. މި ގޯލު ބަލައިގަންނަން ނިންމީ ވީއޭއާރް އިން ބެލުމަށް ފަހު އެވެ. މެޗުގެ 90 ވަނަ މިނިޓްގައި ވުލްވްސްގެ އޮވެން އޮޓްސާވީ އަތުން ގެއްލުނު ބޯޅައެއް ހޯދައި މާރޭޒް ވަނީ ސިޓީގެ ތިން ވަނަ ގޯލެއް ޖަހައިފަ އެވެ. އިތުރު ވަގުތުގެ ފަހު މިނިޓްގައި ސިޓީގެ ހަތަރު ވަނަ ގޯލު ޖެހީ ޖީސޫސް އެވެ. އިލްކާއި ގުންޑޮގާން ޖެހި ޝޮޓެއް ވުލްވްސްގެ ކީޕަރު ރުއީ ޕެޓްރީޝިއޯ އަތުގައި ޖެހިފައި ނުކުތް ވަގުތު ޖީސޫސް ވަނީ ގޯލުގެ ތެރެއަށް ބޯޅަ ފޮނުވާލައިފަ އެވެ. މި ގޯލު ވެސް ބަލައިގަންނަން ނިންމީ ވީއޭއާރް އިން ބެލުމަށް ފަހު އެވެ.
މި މޮޅާ އެކު ސިޓީން ވަނީ ޖެހިޖެހިގެން 21 މޮޅު ހަމަކޮށްފަ އެވެ. ރޭގެ މެޗުން މޮޅަކާ އެކު ނިންމާލައި 28 މެޗު ބަލިނުވެ ހަމަކުރިއިރު، މިއީ ސިޓީގެ ކްލަބް ރެކޯޑެކެވެ. އަދި އެއްވެސް ވަގުތެއްގައި ސްކޯ އިން ފަހަތުގައި ނޯވެ އާސެނަލުން ޖެހިޖެހިގެން 19 މެޗު ނިންމާލި ރެކޯޑާ ވެސް ރޭ ސިޓީން ވަނީ ހަމަކޮށްފަ އެވެ.
ސިޓީގެ ކޯޗު ޕެޕް ގާޑިއޯލާ ބުނީ ސިޓީން މި ރެކޯޑްތައް ގާއިމްކުރިއިރު އޭނާ އެންމެ އުފާކުރާ ސަބަބަކީ ފިނި މޫސުމުގެ ބްރޭކެއް ވެސް ނެތި ގާތްގާތުގައި ގިނަ މެޗުތަކެއް ކުޅުނު ވަގުތެއްގައި މި ރެކޯޑް ހެދުމުންނެވެ.