03 މާޗް 2021 - 07:55
އިންޑިއާގައި އަބަދު ވެސް އެންމެ ބޮޑު އެއް މައްސަލަ ކަމަށްވާ ދަނޑުވެރިންގެ ހިތްދަތި ދިރިއުޅުމުގެ ވާހަކަ ކިޔައިދޭ ފިލްމެއް ހަދަން ޑައިރެކްޓަރު އޯމް ޕްރަކާސް މެހެރާ ނިންމައިފި އެވެ.
މިކަން ކަށަވަރުކޮށް ދީފައި ވަނީ އޭނާގެ "ރަންގް ދެ ބަސަންތީ" އާއި "ދިއްލީ 6" ގެ ސްކްރީން ރައިޓަރު ކަމްލޭޝް ޕާންޑޭ އެވެ. ޕިންކްވިލާ އަށް އޭނާ ބުނީ ފިލްމުގެ ސްކްރީންޕްލޭގެ މަސައްކަތް މިހާރު ވަރަށް ބާރަށް ކުރިއަށްދާ ކަމަށާއި ދަނޑުވެރިންނާ ގުޅުން ހުރި ވަރަށް ގިނަ އިޝޫތައް ފިލްމުގައި ކިޔައިދޭނެ ކަމަށެވެ.
މިދިޔަ އަހަރު ވެސް އިންޑިއާގައި އެންމެ ހޫނުވީ ދަނޑުވެރިންގެ މައްސަލަ އެވެ. އެގޮތުން ދިގުދެމިގެން ދިޔަ ސިލްސިލާ މުޒާހަރާރަކެއް ސަރުކާރުގެ ސިޔާސަތިތަކާއި ގާނޫނުތަކާއި ގަވައިދުތަކާ ދެކޮޅަށް އެތައް މަހެއް ވަންދެން ކުރިއަށް ގެންގޮސްފައިވެ އެވެ. އެ މުޒާހަރާތަކުގައި އެތައް ބަޔަކު މަރުވެ، އެތައް ބަޔަކު ހައްޔަރު ވެސްކޮށްފައިވެ އެވެ.
"އަހަރެންގެ ސްކްރިޕްޓް މިހާރު އޮތީ އެންމެ ފަހު ފަހު މަރުހަލާގައި. ދަނޑުވެރިންނަށް ބިނާކޮށް މީތި ގެނެސްދިން ނަމަވެސް މީގެ އިޝޫ އަކީ މިހާރު ދަނޑުވެރިންނަށް ދިމާވާގެން އުޅޭ މައްސަލަތަކެއް ނޫން. ޖުމްކޮށް ކުރީއްސުރެ ފެށިގެން ވެސް ދަނޑުވެރިންނަށް ހުރި މައްސަލަތައް ފިލްމުގައި ދައްކުވައި ދޭނީ." ކަމްލޭޝް ބުންޏެވެ.
ކަމްލޭޝް ބުނީ ދަނޑުވެރިންނަށް ބިނާކޮށް ހަދާ ފިލްމުގެ މަސައްކަތް މެހެރާ ފަށާނީ މިހާރު ގެނެސްދޭން ތައްޔާރުވަމުން އަންނަ ފިލްމު "ތޫފާން" އިން އަތްދޫކޮށްލުމަށް ފަހު އެވެ. ފަރުހާން އަޚްތަރު ބޮކްސިންތެޅުންތެރިއެއްގެ ރޯލު ކުޅެފައިވާ އެ ފިލްމަކީ ކުރިން މިދިޔަ އަހަރުގެ އޮކްޓޯބަރުގައި ގެނެސްދޭން ރޭވި ފިލްމެކެވެ. އެކަމަކު ކޮވިޑް-19 އާ ހެދި އެކަން ނުވެ، ފިލްމު މި އަހަރަށް ފަސްކުރި ނަމަވެސް އަދި ވަކި ތާރީހެއް ނުނިންމަ އެވެ.
ފަރުހާނާ އެކު 2013 ގައި "ބާގް މިލްކާ ބާގް" ގެނެސްދިން މެހެރާ، 57، އަކީ ބޮލީވުޑްގެ އެންމެ ހުނަރުވެރި ޑައިރެކްޓަރުންގެ ތެރެއިން އެކެކެވެ. އޭނާ އެންމެ ފަހުން ގެނެސްދިން ފިލްމަކީ 2019 ގެ "މޭރޭ ޕިޔާރޭ ހޯމް މިނިސްޓަރު" އެވެ.