26 ފެބުރުއަރީ 2021 - 15:54
އިދިކޮޅު ކޯލިޝަން، ޕީޕީއެމާއި ޕީއެންސީން މާލޭގައި މިއަދު ބާއްވަން އުޅޭ އެއްވުން ހުއްޓުވަން ރައްޔިތުން މަޖިލީހުގެ ހޯރަފުށީ ދާއިރާގެ ކުރީގެ މެންބަރު މުހައްމަދު އިސްމާއިލް އާއި ޑީއާރްޕީގެ ކުރީގެ ލީޑަރު ކާނަލް މުހައްމަދު ނަޝީދު ހައްޔަރުކޮށްފި އެވެ.
ފުލުހުން ތުހުމަތުކުރާ ގޮތުގައި މުހައްމަދު އިސްމާއިލާއި ކާނަލް ނަޝީދަކީ އެއްވުން ރޭވުމުގައި އިސްކޮށް ތިއްބެވި ދެ ބޭފުޅުންނެވެ.
ޕްރޮގްރެސިވް ކޯލިޝަންގެ ތަރުޖަމާނު ހީނާ ވަލީދު ވިދާޅުވީ މި ދެ ބޭފުޅުން ހައްޔަރުކޮށްފައި ވަނީ ޕީޕީއެމް އޮފީސް ދޮރުމަތިން ކަމަށެވެ. މި ދެ ބޭފުޅުން ހައްޔަރުކުރީ މިއަދު ބޭއްވުމަށް ހަމަޖެހިފައިވާ ސުލްހަވެރި މުޒާހަރާ ނުފަށަނީސް ކަމަށް ހީނާ ވިދާޅުވި އެވެ.
"ފުލުހުން ދަނީ ޕާޓީ އޮފީހަށާއި ކައިރީ ރެސްޓޯރަންޓުތަކަށް ވަންނަ މީހުންނަށް ވެސް ހުރަސް އަޅަމުން،" ހީނާ ވިދާޅުވި އެވެ.
ފުލުހުން ބުނިގޮތުގައި ދެ މީހަކު ހައްޔަރުކުރީ އެޗްޕީއޭގެ ގައިޑްލައިނާ ޚިލާފަށް އަދި ސުލްހަވެރިކަމާ އެކު އެއްވެ އުޅުމުގެ މިނިވަންކަމުގެ ގާނޫނާ ޚިލާފަށް ކުރިއަށް ގެންދަން މަސައްކަތްކުރާ އެއްވުމެއް ބޭއްވިޔަ ނުދިނުމުގެ ބޭނުމުގަަ އެވެ.
މާލޭގައި ހަލުވިކަމާ އެކު ކޮވިޑް-19 ފެތުރޭތީ އެޗްޕީއޭ އިން އަޅާފައިވާ ރައްކާތެރިކަމުގެ ފިޔަވަޅުތަކާ ޚިލާފަށް މަގުތަކަށް ނުކުމެއްޖެ ނަމަ ހުއްޓުވާނެ ކަމުގެ އިންޒާރު ފުލުހުންނާއި ހޯމް މިނިސްޓްރީން ވެސް އޮތީ ދީފަ އެވެ.
މުހައްމަދު އިސްމާއިލް ހައްޔަރުކުރުމުން ޕީއެންސީގެ ލީޑަރު އަބްދުއްރަހީމް އަބްދުﷲ (އަދުރޭ) ވަނީ ސަރުކާރަށް ފާޑުވިދާޅުވެފަ އެވެ.
އިދިކޮޅުން މިއަދު މުޒާހަރާކުރަން ނިންމި "ކޮބާ މަގޭ ފްލެޓް" ހޭޝްޓެގާ އެކީގައި ކުރެއްވި ޓުވީޓެއްގައި އަދުރޭ ވިދާޅުވި ގޮތުގައި ހައްޔަރުކޮށް ބިރުދައްކައިގެން މުޒާހަރާ ނުހުއްޓުވޭނެ އެވެ. އެއީ މުހައްމަދު އިސްމާއީލް ވެސް ބިރުގަނެ ޖެހިލުންވާނެ ކަމެއް ނޫން ކަމަށާއި މީހުން ހައްޔަރުކުރިއަސް ސަރުކާރު ފެއިލްނުވާ ކަމަކަށް ނުވާނެ ކަމަށް ވިދާޅުވި އެވެ.
އިދިކޮޅުގެ އިސް ދެ ބޭފުޅަކު ހައްޔަރުކޮށް، ރަޔަޓު ގިޔަރުގައި ތިބި ފުލުހުންގެ ޓީމުތައް އަންނަނީ ޕީޕީއެމް އޮފީސް ދޮރުމަތީގައި ހަރަކާތްތެރިވަމުންނެވެ.