25 ފެބުރުއަރީ 2021 - 14:33
މެޑިކަލް ވިސާ ސިސްޓަމަށް ދިމާވެފައިވާ މައްސަލަ ކުރިއަށް އޮތް ދެ ތިން ދުވަސް ތެރޭގައި ހައްލުވާނެ ކަމަށް އިންޑިއާ ހައި ކޮމިޝަނުން މިއަދު ބުނެފި އެވެ.
ވިސާ އަށް އެދި ފޯމު ހުށަހެޅުމަށް ދޫކުރާ ނަމްބަރު ސިސްޓަމުގައި މައްސަލައެއް ދިމާވެ، ނަމްބަރު ހޯދުމަށް ކިޔޫގައި އެތައް އިރަކު މަޑުކުރަން ޖެހިފައިވާ ކަމުގެ ޝަކުވާ މި ދެ ދުވަހު ވަނީ ބޮޑުވެފަ އެވެ. އަދި ހައިކޮ ކޮމިޝަން ކުރިމަތީގައި ބަޔަކު އިށީނދެ ތިބެ ކިޔޫގައި ތިބި ފޮޓޯތަކެއް ވެސް ސޯޝަލް މީޑިއާގައި ވަނީ ދައުރުވެފަ އެވެ.
އެކަމާ ގުޅިގެން ހައި ކޮމިޝަނުން ބުނީ ޓޯކެން ސިސްޓަމަށް ދިމާވި މައްސަލައިގެ ސަބަބުން ވިސާ އަށް ފޯމު ހުށަހަޅާ ފަރާތްތަކަށް ދިމާވެފައިވާ ދަތިތައް ފާހަގަކުރެވިފައިވާ ކަމަށެވެ.
އެކަމަށް ހައްލު ހޯދުމަށް މަސައްކަތް ކުރަމުން އަންނަ ކަމަށާއި ކުރިއަށް އޮތް ދެ ތިން ދުވަހުގެ ތެރޭގައި ހައްލެއް ލިބޭނެ ކަމަށް ހައި ކޮމިޝަނުން ބުންޏެވެ.
ކޮވިޑް-19 ގެ ބަލިމަޑުކަމާ ގުޅިގެން އިންޑިއާގެ ބޯޑަރުތައް ވަނީ ބަންދުކޮށްފަ އެވެ. ނަމަވެސް ރާއްޖެ އާއި އިންޑިއާއާ ދެމެދު އޮތް ގާތް ގުޅުމުގެ ސަބަބުން ދިވެހިންނަށް އިންޑިއާ އަށް ބޭހަށް ދިއުމަށް މިދިޔަ އަހަރުގެ ޖޫން މަހުން ފެށިގެން ވަނީ ހުޅުވާލައިފަ އެވެ.
މިހާތަނަށް 5،000 މެޑިކަލް ވިސާ ދޫކޮށްފައިވާއިރު މި އަހަރު މިހާތަނަށް އެކަނި ވެސް 2،000 މެޑިކަލް ވިސާ ދޫކޮށްފައި ވެ އެވެ.
"ވިސާ އަށް ފޯމު ހުށަހަޅާ ފަރާތްތަކަށް ކުރިމަތިވެފައިވާ ދަތިތަކާ މެދު ހިތާމަކުރާ ހާލު، ވީ އެންމެ އަވަހަކަށް މި މައްސަލަ އަށް ސްޓްރީމްލައިން ހައްލެއް ފޯރުކޮށްދެވޭނެ ކަމުގެ ޔަގީންކަން އަރުވަމެވެ،" ހައި ކޮމިޝަނުން ބުންޏެވެ.