21 ފެބުރުއަރީ 2021 - 14:58
މޮސްކޯ (ފެބްރުއަރީ 21) - ދޫނި ރޯގާގެ އާ ސްޓްރެއިނެއް ކަމަށްވާ، އެޗް5އެން8 ފުރަތަމަ ފަހަރަށް ރަޝިޔާ އިން ރިޕޯޓްކޮށްފި އެވެ.
އޮފިޝަލުން ބުނީ ރަޝިޔާގެ ދެކުނުގެ ޕޯލްޓްރީ ޕްލާންޓެއްގައި މަސައްކަތް ކުރާ ހަތް މީހަކަށް ދޫނި ރޯގާގެ އާ ސްޓްރެއިން ޖެހިފައިވާ ކަމަށެވެ.
"އެކަމަކު އެ ހަތް މީހުންގެ ހާލު ވެސް ރަނގަޅު،" ޕަބްލިކް ހެލްތު އޮފިޝަލް ވިދާޅުވި އެވެ.
އޭނާ ވިދާޅުވީ ބަލި ފެތުރުން ކޮންޓްރޯލް ކުރުމަށް އެކަށީގެންވާ ފިޔަވަޅުތައް އަޅާފައިވާ ކަމަށެވެ. އަދި އިންސާނުންގެ ފަރާތުން އެކެއްގެ ގައިން އަނެކެއްގެ ގަޔަށް އެ ބަލި ފެތުރޭކަމުގެ ހެއްކެއް ލިބިފައި ނެތް ކަމަށް ވިދާޅުވި އެވެ. ރަޝިޔާ އިން ދޫނި ރޯގާގެ އާ ސްޓްރެއިން ފެނުނުކަން މިހާރު ވަނީ ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯ އަށް އަންގައިފަ އެވެ.
ރަޝިޔާ އިން މިހާރު ދަނީ ދޫނި ރޯގާގެ އެ ސްޓްރެއިން ދެނެގަތުމުގެ ޓެސްޓް ސިސްޓަމްތައް ހަދަމުންނެވެ.
ދޫނި ރޯގާގެ އެހެން ސްޓްރެއިންތައް މީގެ ކުރިން އިންސާނުންނަށް ޖެހި ފުރާނައަށް ނުރައްކާވެފައިވެ އެވެ. އެކަމަކު މިއީ އެޗް5އެން8 ސްޓްރެއިން އިންސާނުންނަށް ވާސިލް ވެގެން ރިޕޯޓްކުރި ފުރަތަމަ ފަހަރެވެ.