21 ފެބުރުއަރީ 2021 - 07:28
އަޖޭ ދޭވްގަން އާއި ތައްބޫ މުހިއްމު ރޯލުތަކެއް ކުޅުނު ފިލްމު "ދުރިޝަމް" ގެ ސީކްއެލް ހަދަން ނިންމައި އަންނަ އަހަރު ފިލްމު ސިނަމާތަކަށް ގެންނަން އަމާޒު ހިފައިފި އެވެ.
މިދިޔަ އަހަރު މަރުވި ޑައިރެކްޓަރު ނިޝިކާންތު ކަމަތު 2015 ގައި ގެނެސްދިން "ދުރިޝަމް" އަކީ އާދައިގެ ދިރިއުޅުމެއް އުޅޭ އާއިލާއެއްގެ އަންހެން ކުއްޖަކަށް ޒުވާނަކު ބިރު ދައްކައި ބްލެކްމެއިލްކުރަމުން ދިޔަ މައްސަލައެއް ފަޅާއަރައި، އާއިލާގެ ތެރޭގައި ވަރަށް ސިއްރުވެރި ގޮތަކަށް އެ ޒުވާނާ މަރާލައި އޭނާގެ ހަށިގަނޑު ނައްތައިލުމުން އޭގެ ހަގީގަތް ހޯދަން ކުރާ މަސައްކަތް ވަރަށް ޝައުގުވެރި ގޮތަކަށް ކިޔައިދިން ފިލްމެކެވެ.
"ދުރިޝަމް" ގައި އަޖޭ އާއި ޝްރިޔާ ސަރަން ކުޅުނީ ދެ ކުދިންގެ މައިންބަފައިންގެ ރޯލެވެ. ތައްބޫ އަކީ އެ އާއިލާ އިން މަރާލާ ޒުވާނާގެ މަންމަ އަދި ފުލުހެކެވެ.
"ދުރިޝަމް" އަކީ 2013 ގައި ހަމަ އެ ނަމުގައި ގެނެސްދިން މަލަޔާޅަމް ފިލްމެއްގެ ރިމެކެކެވެ. މޯހަން ލާލު ލީޑް ރޯލު ކުޅުނު ފިލްމު ޑައިރެކްޓްކުރީ ޖީތޫ ޖޯސެފް އެވެ. އޭގެ ދެވަނަ ބައި މިހާރު ރިލީޒްކުރުމާ އެކު އޭގެ ރައިޓްސް ހޯދައިގެން އަޖޭ އާއި ތައްބޫއާ އެކު "ދުރިޝަމް 2" ގެ ހިންދީ ރިމެކް ގެނެސްދޭން ނިންމީ އެވެ. މީގައި ފެނިގެންދާނީ ކުރީގެ ފިލްމުގެ ވާހަކަ ދިގުމެމިގެންދާ ގޮތެވެ.
ފިލްމުގެ ރައިޓްސް ހޯދީ އަޖޭއާ ވަރަށް ގާތް ގުޅުމެއް އޮންނަ ޕްރޮޑިއުސަރު ކުމާރު މަންގަތެވެ. "ދުރިޝަމް" ގެ ޕްރޮޑިއުސަރަކީ ވެސް އޭނަ އެވެ.
"ދުރިޝަމް 2" ގެ ރައިޓްސް ހޯދުމަށް ފަހު، ފިލްމުގެ ޓީމުން މިހާރު އަންނަނީ އޭގެ ޝޫޓިން މި އަހަރުގެ ތެރޭގައި ފެށޭތޯ މަސައްކަތްކުރަމުންނެވެ. އަޖޭގެ އަތުގައި މި ވަގުތު ގިނަ ޕްރޮޖެކްޓްތަކެއް ހުރުމުން އަހަރުގެ ފަހުކޮޅު ޝޫޓިން ފެށޭނެ ކަމަށް ލަފާކޮށްފައިވެ އެވެ.
ބޮލީވުޑް ހަންގާމާ އިން ބުނީ "ދުރިޝަމް 2" ގެ ހިންދީ ރިމެކް ޑައިރެކްޓްކުރާނެ ކަމަށް ބެލެވެނީ އޭގެ ތަމަޅަ ދެ ފިލްމު ވެސް ޑައިރެކްޓްކުރި ޖީތޫ އެވެ. އޭނާ ކުރިން ވެސް ހިންދީ ފިލްމެއް ޑައިރެކްޓްކޮށްފައިވެ އެވެ. އެއީ 2019 ގައި ރިލީޒްކުރި ރިޝީ ކަޕޫރާއި އިމްރާން ހާޝިމީގެ "ދަ ބޮޑީ" އެވެ.
ރިޕޯޓްތައް ބުނާގޮތުން "ދުރިޝަމް" ގައި އަޖޭގެ އަންހެނުންގެ ރޯލު ކުޅުނު ޝްރިޔާ އާއި ދަރިފުޅުގެ ރޯލު ކުޅުނު އިޝިތާ ދައްތާ ވެސް ސީކްއެލް އިން ފެނުމުގެ ފުރުސަތު ބޮޑެވެ. އެކްޓަރު ވަތުސަލް ސޭތުގެ އަންހެން އިޝިތާ އަކީ ކަލާޒް އިން 2019-2020 އަށް ގެނެސްދިން ސިލްސިލާ "ބޭޕަނާ ޕިޔާރު" ގެ ބަތަލާ އެވެ. އަދު އޭނާ އަކީ ބޮލީވުޑްގައި މީގެ ތިން އަހަރު ކުރިން ޖިންސީ ގޯނާގެ މައްސަލަތައް ފެންމަތިކުރި ތަނޫޝްރީ ދައްތާހެ ކޮއްކޮ އެވެ.
އަޖޭ އާއި ޝްރިޔާ އަކީ މި އަހަރު ރިލީޒްކުރާ އެސްއެސް ރާޖަމޯލީގެ "އާރްއާރްއާރް" އިން އެކީގައި ފެންނާނެ ދެ ތަރިންނެވެ. އެކީގައި ކުރިން ވެސް ކާމިޔާބު ފިލްމުތަކެއް ކުޅެފައިވާ އަޖޭ އާއި ތައްބޫ އެންމެ ފަހުން އެކީގައި ފެނުނު ފިލްމަކީ 2018 ގެ "ދޭ ދޭ ޕިޔާރު ދޭ" އެވެ.