17 ފެބުރުއަރީ 2021 - 14:09
ސޯލް (ފެބްރުއަރީ 17) - އެމެރިކާގެ ފައިޒާ ކުންފުނިން، ކޮރޯނާވައިރަހަށް އުފެއްދި ވެކްސިންގެ ޓެކްނޮލޮޖީ ހެކްކުރަން ނޯތު ކޮރެއާ އިން މަސައްކަތްކޮށްފައިވާ ކަމަށް ސައުތު ކޮރެއާގެ އިންޓަލިޖެންސް އޮފިޝަލުން ބުނެފި އެވެ.
އެމެރިކާގެ ފާމަޝޫޓިކަލް ކުންފުނިން އެއްވެސް ޑޭޓާއެއް ނޯތު ކޮރެއާ އަށް ވަގަށް ނެގުނު ކަމެއް އަދި ނޭނގެ އެވެ. ނަމަވެސް ފައިޒާ ވެކްސިން ހެކްކުރަން ނޯތު ކޮރެއާ އިން އުޅުނުކަން ސައުތު ކޮރެއާގެ ނޭޝަނަލް އިންޓަލިޖެންސް އެޖެންސީން ވަނީ ގާނޫނު ހަދާ މަޖިލީހުގެ މެންބަރުންނަށް ކިޔައިދީފަ އެވެ.
ކޮރޯނާވައިރަހުގެ އެއްވެސް ކޭސްއެއް ނޯތު ކޮރެއާ އިން ފެނުނު ކަމަށް ރިޕޯޓްކޮށްފައެއް ނުވެ އެވެ. ޗައިނާ އިން ކޮރޯނާވައިރަސް ފެނުނުތާ ކުރީކޮޅު ނޯތު ކޮރެއާ އިން ވަނީ، ޖެނުއަރީ މަހު ބޯޑަރު ބަންދުކޮށްފަ އެވެ.
އޮކްސްފޯޑް/އެސްޓްރަޒެނެކާގެ ދެ މިލިއަން ޑޯޒުގެ ވެކްސިނަށް އެ ގައުމުން ވަނީ އޯޑަރު ދީފަ އެވެ.
ފައިޒާ ހިމެނޭ ގޮތަށް ނުވަ ކުންފުންޏަކުން މައުލޫމާތު ހެކްކުރަން ނޯތު ކޮރެއާ އާއި ރަޝިޔާގެ ގްރޫޕްތަކަކުން މަސައްކަތްކޮށްފައިވާ ކަމަށް މައިކްރޯސޮފްޓުން ނޮވެމްބަރު މަހު ވަނީ ބުނެފަ އެވެ. މައުލޫމާތު ހެކްކުރަން ނޯތު ކޮރެއާ އިން އުޅުނީ ޒިންކް ސީރިއަމް އަދި ރަޝިޔާގެ ފޭންސީ ބިއާ ނަމަކަށް ކިޔާ ގްރޫޕަކުން ކަމަށް ވެސް ބުނެފައިވެ އެވެ.
އެއްވެސް ގައުމެއްގެ ވެކްސިން ރިސާޗުން މައުލޫމާތު ވަގަށް ހޯދަން މަސައްކަތް ނުކުރާ ކަމަށް ރަޝިޔާ ސަރުކާރުން ވަނީ ބުނެފަ އެވެ.