12 ފެބުރުއަރީ 2021 - 21:42
އިދިކޮޅު ޕީޕީއެމް/ޕީއެންސީން މިއަދު ބޭއްވި މުޒާހަރާގައި، ކޮވިޑް-19 ކޮންޓްރޯލްކުރުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ކަނޑައަޅާފައިވާ ގައިޑްލައިންތަކާ ހިލާފަށް އަމަލުކޮށްފައިވާތީ އިލެކްޝަންސް ކޮމިޝަން (އީސީ)ގެ ރައީސް އަހުމަދު ޝަރީފް ހިތްހަމަނުޖެހުން ފާޅު ކުރައްވައި އިންޒާރު ދެއްވައިފި އެވެ.
މާލެ ސަރަހައްދުގައި ކޮވިޑް-19 ގެ ކޭސްތައް ރެކޯޑް މިންވަރަކަށް މައްޗަށް ގޮސްފައި ވަނިކޮށް މިއަދު ކުރި މުޒާހަރާގައި ގިނަ އަދަދެއްގެ މީހުން ބައިވެރިވި އެވެ.
އިދިކޮޅު ކޯލިޝަންގެ އިސް ބޭފުޅުންނާއި އެ ޕާޓީތަކުގެ ގިނަ ސަޕޯޓަރުން އެއްވެ، ފުލުހުންގެ ސަފުތައް ފަޅާލައި މުޒާހަރާކުރާ ކުރަމުންދާ ވީޑިއޯއެއް ރިޓްވީޓް ކުރައްވައި ޝަރީފް ވިދާޅުވީ ސިޔާސީ ޕާޓީތަކުން ވެސް އެޗްޕީއޭއިން އިއުލާންކޮށްފައިވާ ރައްކާތެރިކަމުގެ ފިޔަވަޅުތަކަށް އަމަލުކުރަން ޖެހޭނެ ކަމަށެވެ. އަދި އެ ވީޑިއޯއިން ފެނުނު މަންޒަރުތަކާ ގުޅިގެން، އެ މުޒާހަރާ އިންތިޒާމްކުރި ފަރާތްތަކުން ޖަވާބުދާރީވާން ޖެހޭނެ ކަމަށް ޝަރީފް ވިދާޅުވި އެވެ.
"މަގޭ ފްލެޓް ކޮބާ"ގެ ނަމުގައި އިދިކޮޅު ފަރާތްތަކުން މިއަދު ހަވީރުން ފެށިގެން ކުރިޔަށް ގެންދިޔަ މުޒާހަރާ ނިންމާލާފައި ވަނީ އިރުއޮއްސުނު އިރު އެވެ. އެ މުޒާހަރާގައި އެތައް ބަޔަކު ގައިގޯޅިކޮށް އަދި މާސްކް ނާޅައި ތިބުމުންނާއި އެއްތަނަށް އެއްވެ ތިބެ ކެއިންބުއިން ފަދަ ކަންކަން ވެސް ކޮށްފައި ވާތީ އާންމުންގެ ފާޑުކިޔުން ވެސް އަމާޒުވެފައިވެ އެވެ.
އެޗްޕީއޭގެ ގައިޑްލައިންތަކާ ހިލާފުވެގެން މީގެ ކުރިން ވެސް ޕީޕީއެމް ލީޑާޝިޕްގެ ބައެއް މެންބަރުން ވަނީ ފުލުސް އޮފީހަށް ހާޒިރުކޮށް ޖޫރިމަނާކޮށްފަ އެވެ. ނަމަވެސް އެ ބޭފުޅުން ދެކޭ ގޮތުގައި އެއީ އިދިކޮޅު ޕާޓީގެ ކެމްޕެއިނަށް ހުރަސް އަޅަން ކުރާ ކަމެކެވެ. އަދި މުޒާހަރާކުރަނީ ގާނޫނުއަސާސީން ލިބޭ ހައްގުގެ ބޭނުންކުރުމަށެވެ.