12 ފެބުރުއަރީ 2021 - 08:52
ދޯހާ (ފެބްރުއަރީ 12) - ފްރާންސްގެ ފުލްބެކް ބެންޖަމިން ޕަވާޑް ޖެހި ލަނޑުން މެކްސިކޯގެ ޓިގްރެސް 1-0 އިން ބަލިކޮށް ޖަރުމަނުގެ ބަޔާނުން މިއުނިކުން ފީފާ ކްލަބް ވޯލްޑް ކަޕް ކާމިޔާބުކޮށްފި އެވެ.
ރޭގެ ކާމިޔާބީއާ އެކު ބަޔާނުން ވަނީ އެއް ސީޒަނެއްގެ ހަ ތަށި އުފުލާލައިގެން 2009 ވަނަ އަހަރު ބާސެލޯނާ ހަދާފައިވާ ރެކޯޑާ ހަމަކޮށްފަ އެވެ. ބަޔާނުން އެންމެ ފުރަތަމަ ކްލަބް ވޯލްޑް ކަޕް ކާމިޔާބުކުރީ 2013 ވަނަ އަހަރު އެވެ. އެ ފަހަރުގެ ފައިނަލުގައި ބަޔާން ވަނީ 2-0 އިން މޮރޮކޯގެ ރަޖާ ކަސަބްލަންކާ ބަލިކޮށްފަ އެވެ.
މި ފަހަރުގެ ފައިނަލަށް ބަޔާން ނުކުތްއިރު ދިމާވި އެންމެ ބޮޑު ގޮންޖެހުމަކީ ޓީމުގެ އެންމެ މުހިއްމު އެއް ކުޅުންތެރިޔާ ތޯމަސް މުލާ ކޮވިޑް-19 އަށް ޕޮޒިޓިވްވެ މި މެޗުގައި ނުކުޅެވުމެވެ. ބަޔާނަށް މި މެޗުގައި ޖެހި ހަމައެކަނި ގޯލު މެޗުގެ 59 ވަނަ މިނިޓްގައި ރޮބަޓް ލެވަންޑޯސްކީ ދިން ބޯޅައަކުން ކާމިޔާބުކުރީ ޕަވާޑް އެވެ.
ފުރަތަމަ ހާފުގައި ބަޔާންގެ ޔޯސުއާ ކިމިޗް ޖެހި ގޯލެއް ބަލައިނުގަންނަން ނިންމީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު އެވެ. އަދި ލެރޯއި ސާނޭ ޖެހި ބޯޅައެއް ވަނީ ގޯލުގެ ދަނޑިއަށް އަމާޒުވެފަ އެވެ.
ބަޔާންގެ ކޯޗުކަމާ 2019 ވަނަ އަހަރުގެ ނޮވެމްބަރު މަހު ހަންސީ ފްލިކް ހަވާލުވި ފަހުން އެ ޓީމު ކުޅުނު 68 މެޗުގެ ތެރެއިން 58 މެޗުން ވަނީ މޮޅުވެފަ އެވެ.
"އަހަރެންގެ އުއްމީދަކީ ކައިރި މުސްތަގުބަލެއްގައި ވެސް މެޗަކުން ބަލި ނުވުން. މި ތަށި (ކްލަބް ވޯލްޑް ކަޕް) ހޯދުމަކީ ހަގީގަތުގައި ވަރަށް ބޮޑު ސްޓޭޓްމަންޓެއް. ބަޔާންގެ މި އޮތް ޓީމަށް މަދުވެފައި އޮތީ ދުނިޔޭގެ ޗެމްޕިއަންކަމުގެ ޝަރަފް. މިހާރު އެކަން ވެސް ހާސިލްމިވީ. އަހަރެން މީގެ ހުރިހާ ކްރެޑިޓެއް ދޭނީ ކުޅުންތެރިންނަށް،" ރޭގެ މެޗަށް ފަހު ފްލިކް ބުންޏެވެ.
މެޗުން ބަލިވި މެކްސިކޯގެ ޓިގްރެސް އަކީ މި މުބާރާތުގެ ފައިނަލުގައި ކުޅުނު އުތުރު އެމެރިކާގެ ފުރަތަމަ ކްލަބް އެވެ. އަދި މިއީ މެކްސިކޯގެ ފުޓްބޯޅަ ތާރީހުގައި ވެސް އެ ގައުމުގެ ކްލަބަކުން ދުނިޔޭގެ ފެންވަރު މުބާރާތެއްގެ ފައިނަލުގައި ކުޅުނު ފުރަތަމަ ފަހަރު ވެސް މެ އެވެ.
މުބާރާތުގެ މޮޅު ކުޅުންތެރިޔަކީ ލެވަންޑޯސްކީ އެވެ. އެންމެ ގިނަ ލަނޑު ޖެހި ކުޅުންތެރިޔާގެ މަގާމާއި ދެ ވަނަ ކުޅުންތެރިއަކަށް ހޮވުނީ ޓިގްރެސްގެ ފްރާންސް ފޯވާޑް އަންދްރޭ-ޕިއެރޭ ޖީނަޗް އެވެ. ތިން ވަނަ ކުޅުންތެރިއާގެ ޓްރޮފީ ދިނީ ކިމިޗް އަށެވެ.