08 ނޮވެމްބަރ 2016 - 19:32
ވޮޝިންޓަން (ނޮވެމްބަރު 8) - މުޅި ދުނިޔެ ވެސް އިންތިޒާރު ކުރަމުންދާ އެމެރިކާގެ ރިޔާސީ އިންތިޚާބުގެ ވޯޓުލުން އެ ގައުމުގެ ގިނަ ސްޓޭޓްތަކުގެ ގަޑިން ހެނދުނު 6 ޖެހުމާ އެކު (ރާއްޖޭ ގަޑިން ހަވީރު 4 ޖެހުމާ އެކު) ފަށައިފި އެވެ. ނަމަވެސް އޭގެ ކުރިން ވަނީ ރޭ ދަންވަރު ނިއު ހެމްޝަޔާގެ ވަރަށް ބައިމަދު ތިން ޓައުނެއްގައި ވޯޓުލާ ނަތީޖާ ވެސް އިއުލާންކޮށްފަ އެވެ.
އެންމެ ފުރަތަމަ ވޯޓުލީ ސިޔާސީ ފަރާތްތަކުގެ ތެރޭގައި ޑިމޮކްރެޓިކް ކެންޑިޑޭޓް ހިލަރީ ކްލިންޓަނާއި ފިރިކަލުން ބިލް ކްލިންޓަން ހިމެނިވަޑައިގަންނަވަ އެވެ. ދެ ބޭފުޅުން ވެސް ވޯޓު ދެއްވީ ނިއު ޔޯކުގަ އެވެ. ޑިމޮކްރެޓިކް ރަނިން މޭޓް ޓިމް ކޭން ވޯޓު ދެއްވީ ވާޖީނިއާގަ އެވެ.
އިންތިޚާބުގެ ކެމްޕޭން، ވާދަވެރި ދެ ކެންޑިޑޭޓުން އިއްޔެ ނިންމަވާލެއްވިއިރު އާލީ ވޯޓިންގައި 45 މިލިއަނަށް ވުރެ ގިނަ މީހުން ވޯޓުދީފައިވެ އެވެ.
އިންތިޚާބުގެ އެންމެ ފަހުގެ ޚިޔާލު ހޯދުންތައް ދައްކާ ގޮތުން ވެސް ކުރީގައި އުޅުއްވަނީ ހިލަރީ އެވެ. އެމެރިކާގައި އެންމެ ފަހުން 2012 ވަނަ އަހަރު ބޭއްވި އިންތިޚާބުގައި 50 ސްޓޭޓުގެ ނަތީޖާ ލަފާކޮށްގެން ދިމާކޮށްފައިވާ މަޝްހޫރު ނޭޓް ސިލްވާ އިން ބުނީ ހިލަރީ އިންތިޚާބު ކާމިޔާބު ކުރާނެ ކަމުގެ 71.6 ޕަސެންޓް ފުރުސަތު ބޮޑު ކަމަށެވެ. ބީބީސީގެ އެންމެ ފަހުގެ ޚިޔާލު ހޯދުންތަކުން ވެސް 48-44 ޕަސެންޓުން ކުރީގައި އުޅުއްވަނީ ހިލަރީ އެވެ.
ވޯޓުލާން ފެށުމުގެ ކުރިން ޑިޕާޓްމަންޓް އޮފް ހޯމްލޭންޑް ސެކިއުރިޓީން ވަނީ ގައުމުގެ ހުރިހާ ހިސާބެއްގައި ވެސް ވޯޓިން ސިސްޓަމުގެ "ސައިބާ ހައިޖީން" ޓެސްޓް ހަދައިފަ އެވެ. އެއީ ސައިބާ ހަމަލާއެއް ދީފާނެ ކަމުގެ އިންޒާރުތައް ލިބުމާ ގުޅިގެންނެވެ.
އެމެރިކާގެ ވެސްޓް ކޯސްޓުގައި ވޯޓުލުން އިރު އޮއްސި 6 ޖަހާއިރު ނިމުމާ އެކު ނަތީޖާ ލިބެން ފަށާނެ ކަމަށް ބެލެވެނީ މިރޭ އެމެރިކާ ގަޑިން 9 ޖަހާއިރު (ރާއްޖޭ ގަޑިން މާދަމާ ހެނދުނު 10) ޖަހާއިރު އެވެ.