06 ފެބުރުއަރީ 2021 - 21:04
ނޭޕީޓޯ (ފެބްރުއަރީ 6) - މިއަންމާ އަށް ގެނައި އަސްކަރީ ބަޣާވާތާ ދެކޮޅަށް ރައްޔިތުން މަގުތަކަށް ނުކުންނަން ފެށުމުން އެ ގައުމުން އިންޓަނެޓުގެ ޚިދުމަތް ކަނޑާލައިފި އެވެ.
މިއަންމާގެ މައި ސިޓީ ޔަންގޫންގެ މަގުތަކަށް ނުކުތް މީހުން މިއަދު ވަނީ އަސްކަރިއްޔާ ފެއިލްވެއްޖެ ކަމަށާއި ޑިމޮކްރެސީ ކާމިޔާބު ހޯދައިފި ކަމަށް ގޮވައި އަޑު އުފުލައިފަ އެވެ. ޔަންގޫންގެ މަގުތައް ފުލުހުން ނުކުމެ ވަނީ ބަންދުކޮށްފަ އެވެ.
މިއަންމާ އިން އިންޓަނެޓް ބްލޮކްކޮށްފައި ވަނީ ޓްވިޓާ އާއި އިންސްޓަގްރާމް ބްލޮކްކުރިތާ ގަޑިއިރުތަކެއް ފަހުންނެވެ. އޭގެ އެއް ދުވަސް ކުރިން ވަނީ ފޭސްބުކް ބްލޮކްކޮށްފަ އެވެ. މިއަންމާ ސިފައިން ބުނެފައި ވަނީ ސޯޝަލް މީޑިއާގެ ވަސީލަތްތައް މެދުވެރިކޮށް ވަނީ މަގުތަކަށް މީހުން ނުކުތުމަށް ހިތްވަރުދީފައި ކަމަށެވެ.
ސިވިލް ސޮސައިޓީ ޖަމާއަތްތަކުން ވަނީ އިންޓަނެޓް މަނާކުރި ނަމަވެސް ޚިދުމަތް ދިނުމަށް އިންޓަނެޓް ޕްރޮވައިޑަރުންނާއި މޯބައިލް ނެޓްވޯކްތައް ހިންގާ ކުންފުނިތަކަށް ގޮވާލައިފަ އެވެ. އެމްނެސްޓީ އިންޓަނޭޝަނަލް އިން ވަނީ އިންޓަނެޓް ކަނޑާލުމަކީ "ވަރަށް ނުރައްކާތެރި ކުށެއްގެ" ގޮތުގައި ސިފަކޮށްފަ އެވެ.
ފެބްރުއަރީ 1 ގައި ބަޣާވަތް ގެނައުމަށް ފަހު ވެސް އަސްކަރިއްޔާ އިން ވަނީ މިއަންމާގައި އިންޓަނެޓް ކަނޑާލައިފަ އެވެ.
މިއަންމާގެ ބަޣާވާތާ ދެކޮޅަށް ރައްޔިތުން ފަށާފައިވާ މަދަނީ ބަސްނޭހުމުގައި ޓީޗަރުންނާއި ޑޮކްޓަރުން އަދި ނަރުހުން ވެސް މިހާރު ވަނީ ބައިވެރިވެފަ އެވެ.
ސިފައިން ބަޣާވާތްކޮށްފައި ވަނީ ނޮވެމްބަރު މަހުގެ އިންތިޚާބު ސައްހަ ނޫން ކަމަށް ބުނެ އެވެ. އެ އިންތިޚާބު ބޮޑުތަނުން ކާމިޔާބުކޮށްފައި ވަނީ ޑިމޮކްރެޓިކް ލީޑަރު އަން ސަން ސޫކީގެ ޕާޓީންނެވެ.
މިއަންމާގެ ބަޣާވާތް ކުށްވެރިކޮށް ބައެއް ގައުމުތަކުން ވަނީ އިންޒާރު ވެސް ދީފަ އެވެ. އދ. ސަލާމަތީ މަޖިލީހުން ވަނީ ސޫކީ ދޫކޮށްލުމަށް އަސްކަރިއްޔާ އަށް ގޮވާލައިފަ އެވެ. ނަމަވެސް ބަޣާވާތް ކުށްވެރި ކުރަން ސަލާމަތީ މަޖިލީހުން ފާހެއް ނުކުރި އެވެ. ސަބަބަކީ ދާއިމީ މެންބަރެއް ކަމަށްވާ ޗައިނާ ދެކޮޅު ހެދުމެވެ.