06 ފެބުރުއަރީ 2021 - 15:30
ޗައިނާ ސަރުކާރުގެ އެހީގައި ހެދި އަދި ބޮޑު މަރާމާތަކަށް ފަހު އަލުން ބޭނުންކުރަން ފަށަން ތައްޔާރުވެފައިވާ ފޮރިން މިނިސްޓްރީގެ އިމާރާތް، ރާއްޖޭގެ ކުރީގެ ފޮރިން މިނިސްޓަރު ފަތުހުﷲ ޖަމީލްގެ ހަނދާންތަކަށް ހާއްސަކޮށްފި އެވެ.
ރާއްޖޭގެ އިތުރުން ދުނިޔޭގައި ވެސް އެންމެ ދިގު މުއްދަތެއްގައި ފޮރިން މިނިސްޓަރުކަން ކުރެއްވި އަދި މީގެ އަށް އަހަރު ކުރިން އަވަހާރަވެފައިވާ ފަތުހުﷲގެ ނަންފުޅާ ގުޅުވައިގެން ފޮރިން މިނިސްޓްރީގެ އިމާރާތުގެ މިހާރުގެ ނަމަކީ "ފަތުހުﷲ ޖަމީލްގެ ބިލްޑިންގ" އެވެ.
ކުރީގެ ރައީސް މައުމޫން އަބްދުލްގައްޔޫމާ އެކު މިސްރުގެ އަޒުހަރު ޔުނިވަސިޓީން ކިޔަވާވިދާޅުވި ފަތުހުﷲ 1978 އިން ފެށިގެން ޖުލައި 14، 2005 އަށް، ޖުމްލަ 27 އަހަރު، ފޮރިން މިނިސްޓަރުކަން ކުރެއްވި އެވެ. ރާއްޖޭގެ ރައީސްގެ މަގާމާ ނޮވެމްބަރު 11، 1978 ގައި މައުމޫން ހަވާލުވެވަޑައިގަތް އިރު ވެސް، ފަތުހުﷲ އަކީ، ރައީސް އިބްރާހިމް ނާސިރު ސަރުކާރުގެ އެންމެ ފަހު ފޮރިން މިނިސްޓަރެވެ.
ޗައިނާ ސަރުކާރުން އިމާރާތްކޮށްދިން ފޮރިން މިނިސްޓްރީގެ އިމާރާތުގެ ބައެއް ތަންތަން ހަލާކުވާން ފެށުމުން، ޗައިނާ ސަރުކާރުގެ އެހީގައި އެތަން މަރާމާތުކުރުމުގެ މަސައްކަތް ފެށީ އޮގަސްޓް 2019ގަ އެވެ. އެ މަސައްކަތް މިހާރު ވަނީ ގާތްގަނޑަކަށް ނިމިފަ އެވެ.
ފޮރިން މިނިސްޓްރީ ވަގުތީ ގޮތުން ހިންގަމުން އަންނަނީ ހުޅުމާލެ ފެރީ ޓާމިނަލްގެ އިރުމަތީ ފަރާތުގައި އެމްޓީސީސީން އަލަށް ހެދި އިމާރާތެއްގަ އެވެ.
ފޮރިން މިނިސްޓަރުކަމުން އިސްތިއުފާ ދެއްވުމަށް ފަހު ފަތުހުﷲ ދިރިއުޅުއްވަމުން ގެންދެވީ ސިންގަޕޫރުގަ އެވެ. އަވަހާރަވީ ހިތުގެ އާލަސްކަންފުޅަށް ފަރުވާ ހޯއްދަވަމުން ގެންދަވަނިކޮށް އުމުރުފުޅުން 69 އަހަރުގަ އެވެ.
ފަތުހުﷲ އަކީ އެމެރިކާ އާއި އޭރުގެ ރޫސީ ވިލާތާ ދެމެދު ހިނގި "ފިނި ހަނގުރާމައި"ގެ ނާޒުކު ދުވަސްވަރު ރާއްޖޭގެ ބޭރުގެ ސިޔާސަތު، ވަކި ކޮޅަކަށް ނުޖެހި ކުރިއަށް ގެންދިއުމުގެ އެއް މޭސްތިރި އެވެ. އެ މަނިކުފާނުގެ ފޮރިން މިނިސްޓަރުކަމުގައި ދުނިޔޭގެ ފޮރިން ޕޮލިސީއަށް ބޮޑެތި ބަދަލުތަކެއް އައި ހާދިސާތައް ހިނގި އެވެ. އޭގެ ތެރޭގައި 1990ގެ ގަލްފު ހަނގުރާމަ އާއި އެމެރިކާ އަށް 2001 ގައި ދިން ޓެރަރިސްޓް ހަމަލާގެ އިތުރުން 2003 ގައި އިރާގާ ދެކޮޅަށް އެމެރިކާ އިން ފެށި ހަނގުރާމަ ހިމެނެ އެވެ.