06 ފެބުރުއަރީ 2021 - 10:04
ކާމިޔާބު އެތައް ފިލްމެއް ކުޅެ އޮސްކާ އެވޯޑް ވެސް ހާސިލުކޮށްފައިވާ ހޮލީވުޑްގެ އެކްޓަރު ކްރިސްޓޯފާ ޕްލަމާ މަރުވެއްޖެ އެވެ.
ކެނެޑާ އަށް އުފަން އުމުރުން 91 އަހަރުގެ އެކްޓަރު ހުކުރު ދުވަހު މަރުވީ މުސްކުޅި ބަލީގަ އެވެ. އޭނާ މަރުވީ ކަނެކްޓިކަޓްގައި ހުންނަ އޭނާގެ ގޭގަ އެވެ.
ކްރިސްޓޯފާ އަކީ އޮސްކާ އެވޯޑްސްގެ ތާރީހުގައި މިހާތަނަށް އެކްޓިން އިން އޮސްކާއެއް ހާސިލުކުރި އެންމެ ދުވަސްވީ އެކްޓަރެވެ. އެއީ 2010ގެ "ބިގިނާޒް" އިން ލިބުނު އެންމެ މޮޅު ސަޕޯޓިން އެކްޓަރުގެ އޮސްކާ އެވެ. އެ އެވޯޑް ލިބުނު އިރު އޭނާގެ އުމުރަކީ 82 އަހަރެވެ. އުމުރުން 88 ގައި 2017ގައި ކުޅުނު "އޯލް ދަ މަނީ އިން ދަ ވޯލްޑް" އިން ބެސްޓް ސަޕޯޓިން އެކްޓަރުގެ އޮސްކާ ނޮމިނޭޝަނަންގައި ހިމެނުމާ އެކު އޭނާ ވީ އެ ބައިން ނޮމިނޭޓްވި އެންމެ ދުވަސްވީ އެކްޓަރަށް ވެސް މެ އެވެ.
ރިޑްލީ ސްކޮޓް ޑައިރެކްޓްކުރި އެ ފިލްމުން ކްރިސްޓޯފާ އަށް ފުރުސަތު ލިބުނީ ފިލްމުގެ ޝޫޓިން އެއްކޮށްހެން ނިމިފައި ވަނިކޮށް ލީޑް އެކްޓަރު ކެވިން ސްޕޭސީގެ މައްޗަށް ތުހުމަތުކުރެވުނު ޖިންސީ ގޯނާގެ ގިނަ މައްސަލަތަކާ ގުޅިގެން އޭނާ ފިލްމުން ވަކިކޮށް، އަލުން ޝޫޓްކުރަން ނިންމުމުންނެވެ. އެގޮތުން "އޯލް ދަ މަނީ އިން ދަ ވޯލްޑް" ގައި ސްޕޭސީ ކުޅުނު ޖޭ ޕޯލް ގެޓީގެ ބައި އަދާކުރީ ކްރިސްޓޯފާ އެވެ.
އޭނާގެ ކެރިއަރުގައި މަގުބޫލު އަދި މޮޅު އެތައް ފިލްމެއް ކުޅެފައިވާ އިރު ފާހަގަކޮށްލެވޭ ބައެއް ފިލްމުތަކުގެ ތެރޭގައި "ދަ ސައުންޑް އޮފް މިއުޒިކް" އާއި "ދަ ފޯލް އޮފް ދަ ރޯމަން އެމްޕަޔާ" އާއި "އަ ބިއުޓިފުލް މައިންޑް" އަދި "ދި އެކްސެޕްޝަން" ހިމެނެ އެވެ.
ކްރިސްޓޯފާ އެންމެ ފަހުން ބޮޑު ސްކްރީނުން ފެނުނީ 2019 ގަ އެވެ. އެ އަހަރު އޭނާ މުހިއްމު ރޯލުތަކެއް ކުޅުނު ތިން ފިލްމެއް ރިލީޒްވި އެވެ. އެއީ "ކްލިފްސް ފްރީޑަމް" އާއި "ނައިވްސް އައުޓް" ގެ އިތުރުން "ދަ ލާސްޓް ފުލް މެޝާ" އެވެ.
ފިލްމުތަކުގެ އިތުރުން ކްރިސްޓޯފާ އަކީ ޓީވީ ސިލްސިލާތައް ވެސް ކުޅުނު އެކްޓަރެކެވެ.
އެންމެ އަންހެން ދަރިޔަކު ހުރި ކްރިސްޓޯފާ ތިން ކައިވެންޏެއް ކުރި އެވެ. އޭނާގެ ދަރިފުޅު އަމަންޑާ ޕްލަމާ، 63، އަކީ ވެސް ބަތަލާއެކެވެ.
ކްރިސްޓޯފާގެ މަރާ ގުޅިގެން ވަރަށް ގިނަ ބަޔަކު ހިތާމަ ފާޅުކޮށް އާއިލާ އަށް ތައުޒިޔާ ކިޔަމުން އެބަ ގެންދެ އެވެ. އޭގެ ތެރޭގައި ކެނެޑާގެ ބޮޑުވަޒީރު ޖަސްޓިން ޓްރީޑޯ ހިމެނެ އެވެ.