03 ފެބުރުއަރީ 2021 - 16:01
އެމްޕީއެލް ސަރަހައްދުގައި ކޮންޓެއިނާއެއް ހުސްކުރަން ވަދެ އުޅެނިކޮށް އޭގެ ތެރޭ އޮތް ބިއްލޫރި ޕެލެޓް ފުރޮޅާލައި ތާށިވެގެން ލިބުނު އަނިޔާތަކަށް ފަރުވާ ދެނިކޮށް މިދިޔަ މަހު މަރުވި މީހާ ލިޓަސް އަށް ދައްކަން ޖެހިފައި އޮތް ދަރަންޏެއް އެތަނުން މާފުކޮށްދީފި އެވެ.
މަރުވި ނ. ލަންދޫ ފޭރުގަސްދޮށުގެ އަބްދުﷲ އާސިމް ލިޓަސް އަށް ފައިސާ ދައްކަންޖެހިފައި އޮތީ ނެގި ސައިކަލަކަށް ފައިސާ ނުދެއްކުމުން ސިވިލް ކޯޓުން ކުރި ކުރި ހުކުމަކާ ގުޅިގެންނެވެ.
ލިޓަސް އިން ވަނީ އަބްދުﷲގެ ދަރަނި މާފުކޮށްދިންކަން "މިހާރު" އަށް ކަށަވަރުކޮށްދީފަ އެވެ. ނަމަވެސް ފައިސާގެ އަދަދެއް ނުބުނެ އެވެ.
އެ ކުންފުނީގެ ސީނިއާ ސޭލްސް އެންޑް މާކެޓިން މެނޭޖަރު އާސިފް ރަޝީދު ވިދާޅުވީ އެމްޕީއެލް ސަަރަހައްދުގައި ހިނގި އެކްސިޑެންޓުގެ ޚަބަރު ލިބުމާއެކު، ޒަޚަމްވި މީހާގެ އާއިލާ އަށް ގުޅައި ދަރަނި މާފުކޮށްދޭން ނިންމިކަން އަންގައި ދަރަނި މާފުކޮށްދީފައިވާކަން ކޯޓަށް މިހާރު އަންގާފައިވާނެ ކަމަށެވެ.
އާސިމް މަރުވީ ބިއްލޫރި ޕެލެޓު ވެއްޓުމުގެ ސަބަބުން ލިބުނު ސީރިއަސް އަނިޔާތަކަށް ފަރުވާދެމުން ދަނިކޮށް މިދިޔަ މަހުގެ 16 ވަނަ ދުވަހު އެވެ.