02 ފެބުރުއަރީ 2021 - 00:43
ހުޅުމާލޭ ޖަލުން މިއަދު ގައިދީއަކު ޕޮޒިޓިވްވުމާ ގުޅިގެން އެ ޖަލު ލޮކްޑައުންކޮށްފައިވާ ކަމަށް ކަރެކްޝަނަލް ސާވިސް އިން ބުނެފި އެވެ.
އުމުރުން 56 އަހަރުގެ ގައިދީ ޕޮޒިޓިވްވުމާ ގުޅިގެން އެ މީހާ މިހާރު ވަނީ ކަރަންޓީން ފެސިލިޓީއަކަށް ބަދަލުކޮށްފައި ކަމަށް ކަރެކްޝަންސް އިން މިރޭ ކުރި ޓްވީޓެއްގައި ބުންޏެވެ. ހުޅުމާލޭ ޖަލުން ގައިދީއަކު ޕޮޒިޓިވްވި ގޮތެއް ކަރެކްޝަންސް އިން ނުބުނެ އެވެ.
ހުޅުމާލޭ ޖަލުން ކޮވިޑް ފެނުމާ ގުޅިގެން ކޮންޓެކްޓް ޓްރޭސް ކުރުމުގެ މަސައްކަތް ފަށާފައިވާ ކަމަށް ޖަލުތަކާ ބެހޭ އިދާރާ އިން ބުންޏެވެ.
ރާއްޖޭގައި ކޮވިޑް ކޭސްތައް ވަރަށް ބޮޑަށް ދަށަށް ދިޔުމަށް ފަހު މިދިޔަ މަހުން ފެށިގެން ވަނީ ކޭސްތައް އިތުރުވާން ފަށައިފަ އެވެ. އެގޮތުން މިއަދަކީ މި ފަހުން އެންމެ ގިނަ މީހުން ޕޮޒިޓިވްވި ދުވަހެވެ. މާލެ ސަރަހައްދުން 159 މީހުންނާ އެކު މުޅި ރާއްޖެ އިން މިއަދު ވަނީ 215 މީހުން ޕޮޒިޓިވްވެފަ އެވެ. ރިސޯޓުގެ ގޮތުގައި ތަރައްގީކުރަމުން އަންނަ ރަށްތަކުން 27 މީހަކާއި ރިސޯޓްތަކުން 20 މީހުން ވެސް ކޮވިޑަށް މިއަދު ޕޮޒިޓިވްވި އެވެ. މީހުން އުޅޭ ރަށްތަކުން ކޮވިޑް ޖެހިފައި ވަނީ އަށް މީހުންނެވެ.
ރާއްޖެއިން މިހާތަނަށް 16،056 މީހުންނަށް ކޮވިޑް ޖެހިފައިވާ އިރު އެ ބަލީގައި ވަނީ 52 މީހުން މަރުވެފަ އެވެ. ރާއްޖޭގައި ކޮވިޑްގެ އެކްޓިވް ކޭސްތަކުގެ އަދަދަކީ 1,814 އެވެ. ހޮސްޕިޓަލްތަކުގައި އެޑްމިޓްކޮށްގެން މިހާރު ދަނީ 184 މީހަކަށް ފަރުވާ ދެމުންނެވެ.
ކޮވިޑުން ދިފާއުވުމަށް ރާއްޖޭގައި މިއަދު ވަނީ ވެކްސިން ދޭން ފަށައިފަ އެވެ. ފުރަތަމަ ދުވަހު ވަނީ 282 މީހުންނަށް ވެކްސިން ދީފަ އެވެ.