26 ޖެނުއަރީ 2021 - 07:23
މީޑިއާގެ ސަމާލުކަން ވަރަށް ބޮޑަށް ލިބި މަޝްހޫރުވި "ސޯފިއާ" ހިއުމަނައިޑް ރޮބޮޓް ވިޔަފާރި އުސޫލުން އުފައްދައި ވިއްކަން ފަށާނެ ކަމަށް އެ އުފެއްދި ކުންފުނި ހޭންސަން ރޮބޯޓިކްސް އިން ބުނެފި އެވެ.
ހޮންކޮންގުގެ ކުންފުންޏަކުން އުފެއްދި "ސޯފިއާ" ވެގެން ދިޔައީ ގައުމެއްގެ ރަށްވެހިކަން ވެސް ލިބުނު ފުރަތަމަ ރޮބޮޓަށެވެ. މޫނުމަތިން އިންސާނަކާ ވަރަށް ވައްތަރުކޮށް އަދި އިންސާނެއްގެ "ހުރިހާ ސިފަތަކެއް" ލިބިގެންވާ ގޮތަށް ތައްޔާރުކުރި ރޮބޮޓަށް ރަށްވެހިކަން ދިނީ ސައުދީ އަރަބިއްޔާއިންނެވެ. އަދި ސޯފިއާ އަކީ ޔޫއެންޑީޕީ އިން ފުރަތަމަ ފަހަރަށް، އިންސާނެއްގެ ބަދަލުގައި ރޮބޮޓަކަށް "އިނޮވޭޝަން ޗެމްޕިއަން" ގެ ޓައިޓްލް ދިން ރޮބޮޓް ވެސް މެ އެވެ.
ހޭންސަން ރޮބޯޓިކްސް އިން ބުނީ އަހަރުގެ ފުރަތަމަ ކުއާޓަރުގައި ރޮބޮޓް އުފެއްދުމުގެ މަސައްކަތް ފުޅާކުރާނެ ކަމަށާއި މި ފަހަރު ކުރިއަށް ގެންދާ މާސް ޕްރޮޑަކްޝަނުގެ ތެރޭ ހަތަރު މޮޑެލްއެއްގެ ރޮބޮޓް ހިމެނޭނެ ކަމަށެވެ. އޭގެ ތެރޭގައި "ސޯފިއާ" މޮޑެލްގެ ރޮބޮޓްގެ އިތުރުން ހޭންސަން ރޮބޯޓިކްސްގެ ސީއީއޯ ޑޭވިޑް ހޭންސަންގެ ނަމާ ގުޅުވައިގެން އުފައްދާ "ހޭންސަން" ރޮބޮޓް ވެސް ހިމެނެ އެވެ.
އެ ކުންފުނިން ބުނި ގޮތުގައި ރޮބޮޓް އުފެއްދުމުގެ މަސައްކަތް ފުޅާކުރަން ނިންމީ މިދިޔަ އަހަރު ކުރިމަތިލާން ޖެހުނު ކޮވިޑް-19 ގެ ބޮޑު ބަލިމަޑުކަމާ އެކު، އިންސާނުންގެ ބަދަލުގައި އެކި މަސައްކަތްތައް ކުރަން މިހާރު ކުރިއަށް ވުރެ މާ ބޮޑަށް ރޮބޮޓްގެ ދައުރު ބޮޑުވެފައި މުހިންމުވާތީ އެވެ.
"ސޯފިއާ އާއި ހޭންސަން ވާނީ ރޮބޮޓްގެ ދުނިޔޭގައި ވަރަށް ތަފާތު އުފެއްދުންތަކަކަށް. މި އެއްޗެހި މަސައްކަތްކުރާ ވައްޓަފާޅި އިންސާނުންނާ ވަރަށް އެއްގޮތް ވާނެ،" ޑޭވިޑް ވިދާޅުވި އެވެ. "އަދި މިއީ ރޮބޮޓިކް އިންޑަސްޓްރީ އަށް ބޮޑު ބަދަލެއް ގެނުވާނެ ކަމެއް."
އޭނާ ވިދާޅުވި ގޮތުގައި މި އަހަރުގެ ތެރޭގައި ސިއްހީ ދާއިރާގެ މަސައްކަތްތަކަށް ހާއްސަކޮށްގެން ވެސް "ގްރޭސް" ކިޔާ ރޮބޮޓެއް ނެރޭނެ އެވެ. މިދިޔަ އަހަރު ތަރައްގީކުރުމުގެ މަސައްކަތް ފަށާފައިވާ އެ ރޮބޮޓް ނެރޭނެ ދުވަހެއް ވިދާޅެއް ނުވެ އެވެ.
"ރިޓެެއިލާއި އެއާލައިން އިންޑަސްޓްރީއަށް ވެސް ހާއްސަ ރޮބޮޓްތަކެއް ނެރޭނަން.،" ޑޭވިޑް ވިދާޅުވި އެވެ. "ޖުމްލޮށް ބުނަންޏާ ހުރިހާ ދާއިރާއެއްގެ މަސައްކަތްތަކަށް ވެސް ފިޓްވާ ކަހަލަ ޒަމާނީ ރޮބޮޓްތަކެއް ނެރުން އަމާޒަކީ."
ހޭންސަން ރޮބޯޓިކްސް އިން ބުނިގޮތުގައި މި އަހަރުގެ ތެރޭގައި ހާހުން ގުނައިލެވޭ އަދަދަކަށް ރޮބޮޓްތައް އެ ކުންފުނިން ވިއްކާނެ އެވެ.
"ސޯފިއާ" އުފެއްދުމުގައި އެހީތެރިވި ސޯޝަލް ރޮބޯޓިކްސް ޕްރޮފެސަރު ޖޮއާން ހޫން ވިދާޅުވި ގޮތުގައި މި ޒަމާނަށް ބޭނުން ވަނީ އިންސާނުން ކުރާ ހުރިހާ މަސަައްކަތެއް ދާދި އެއްގޮތަށް ކުރެވޭ ކަހަލަ ރޮބޮޓްތަކެވެ. އަދި އެކަމަށް ވާސިލުވާން ބޭނުންވާ ޓެކްނޮލޮޖީ އަދިވެސް އޮތީ ތަރައްގީކުރުމުގެ މަރުހަލާގައި ކަމަށް ވިޔަސް، މަންޒަރު ފެންނަނީ ވަރަށް އުޖާލާކޮށް ކަމަށް ވިދާޅުވި އެވެ.
"ދިމާވެދާނެ ހާއްސަ ހާލަތްތަކުގައި އަހަރެމެންނަށް މަސައްކަތްކޮށްދެވޭ ކަހަލަ ރޮބޮޓްތަކެއް މިހާރު ބޭނުން ވަނީ،" އޭނާ ވިދާޅުވި އެވެ.
ހޮންކޮންގްގެ ޕޮލިޓެކްނިކް ޔުނިވަސިޓީގައި މަސައްކަތްކުރައްވާ ޕްރޮފެސަރު ޖޮއާން ވިދާޅުވި ގޮތުގައި ކޮވިޑް-19 ގެ ބަލިމަޑުކަމަކީ އިންސާނުންނަށް އެތައް ފިލާވަޅެއް ލިއްބައި ދީފައިވާ ކަމަށެވެ. ހާއްސަކޮށް އިންސާނުންގެ އާންމު ދިރިއުޅުމަށް އެރި ބުރުލާއި ދަތިތަކުގެ ސަބަބުން ޓެކްނޮލޮޖީގެ ބޭނުންތެރިކަން ކިހާ ބޮޑުކަން ގިނަ ބަޔަކަށް މިހާރު އިހުސާސްކުރެވިފައިވާ ކަމަށް ވިދާޅުވި އެވެ.
"އެހެންވީމާ ޓެކްނޮލޮޖީ އާއި ރޮބޮޓް ފަދަ ވަސީލަތްތަކާ ނުލައި އަހަރެމެންނަށް ދެނެއް ނޫޅެވޭނެކަން މިހާރު އޮތީ ކަށަވަރުވެފައި،" ޖޮއާން ވިދާޅުވި އެވެ.
މި ފަހަކަށް އައިސް ދުނިޔޭގެ ބޮޑެތި ކުންފުނިތަކުން އަންނަނީ އެތަންތަނުގެ މަސައްކަތް އޮޓޮމޭޓެޑްކޮށް، ރޮބޮޓް ފަދަ ވަސީލަތްތައް ބޭނުންކުރާ މިންވަރު ވެސް ވަރަށް ބޮޑަށް އިތުރުކުރަމުންނެވެ. އިންޓަނެޝަނަލް ފެޑެރޭޝަން އޮފް ރޮބޯޓިކްސް (އަައިއެފްއާރް) ގެ ތަފާސްހިސާބުތައް ދައްކާ ގޮތުން 2018 އާއި 2019 ގައި ޕްރޮފެޝަނަލް މަސައްކަތްތައް ކުރާ ރޮބޮޓްގެ ވިޔަފާރި 32 ޕަސަންޓަށް އިތުރުވެފައިވެ އެވެ. އެއީ ފައިސާ އިން އަގުކުރާ ނަމަ 11.2 ބިލިއަން ޑޮލަރުގެ ވިޔަފާރި އެވެ.