24 ޖެނުއަރީ 2021 - 22:21
ހއ.ހޯރަފުށީގެ ހަތް ބިމެއް ގެސްޓް ހައުސް ތަރައްގީކުރަން ދޫކުރުމަށް ރަށު ކައުންސިލުން އިއުލާނުކޮށްފި އެވެ.
ކައުންސިލް އިދާރާއިން ކޮށްފައިވާ އިއުލާނުގައި ވަނީ އެ ރަށުގެ ޓޫރިޒަމް ޒޯނުގައި ގެސްޓް ހައުސް އަޅަން ބޭނުންވާ ފަރާތްތަކަށް ބިޑް ހުށަހެޅުމުގެ ފުރުސަތު އަންނަ މަހުގެ 18 އާ ހަމައަށް ހުޅުވާލައިފައިވާ ކަމަށެވެ. މި ކަމާ ގުޅޭ ގޮތުން ބާއްވާ މައުލޫމާތު ދިނުމުގެ ސެޝަން އަންނަ މަހުގެ 3 ވަނަ ދުވަހު ވާޗުއަލްކޮށް ބާއްވަން ކައުންސިލުން ވަނީ ނިންމައިފަ އެވެ.
އެންމެ ފަހުން އެއާޕޯޓް ހުޅުވި ހޯރަފުށީގެ އިތުރުން އެހެން ބައެއް ރަށްރަށުގެ ކައުންސިލުން ވެސް އަންނަނީ ޓޫރިޒަމަށް ބިން ދޫކުރަމުންނެވެ. އެގޮތުން މިދިޔަ އަހަރުގެ އޮކްޓޫބަރު މަހު އައްޑޫން 30 ބިމެއް ގެސްޓް ހައުސް ތަރައްގީކުރަން ވަނީ ހުޅުވާލައިފަ އެވެ. ރާއްޖޭގައި ގެސްޓް ހައުސް ވިޔަފާރި އެންމެ ބޮޑަށް ކުރިއަރާފައިވަނީ ކ، އއ، އދ، އަދި ވ އަތޮޅުގަ އެވެ.
މިދިޔަ ޑިސެމްބަރު މަހު ޓޫރިޒަމްގެ ގާނޫނަށް ގެނައި އިސްލާހުގައި ރަށްރަށުން ޓޫރިޒަމްގެ ބޭނުމަށް ބިން ކަނޑައެޅުމުގެ ބާރު ކައުންސިލްތަކަށް ދީފައިވެ އެވެ.
މީގެ އިތުރުން ޓޫރިޒަމާ ބެހޭ ގާނޫނަށް ގެނައި އިސްލާހުގެ ދަށުން ޓޫރިޒަމްގެ ބޭނުމަށް އެކި ރަށްރަށުން ދޫކުރާ ބިމުގެ އަގަށް ބޮޑެތި ބަދަލުތަކެއް ގެނެސްފައިވެ އެވެ. މި ބަދަލުގައި ބިމުގެ އަގު ކަނޑައަޅާފައި ވަނީ ރާއްޖޭގެ އަތޮޅުތައް ހަތަރު ބަޔަކަށް ބަހައިލައިގެންނެވެ. އެގޮތުން އައްޑު އާއި ފުވައްމުލަކަކީ އެންމެ އަގު ހެޔޮކޮށް ޓޫރިޒަމްގެ ބޭނުމަށް ބިން ދޫކުރާ ދެ އަތޮޅެވެ.