20 ޖެނުއަރީ 2021 - 23:58
ވޮޝިންޓަން (ޖެނުއަރީ 20) - މިއީ އެމެރިކާގެ ދުވަސް ކަމަށާއި ޑިމޮކްރެސީގެ ދުވަސް ކަމަށް އެމެރިކާގެ ރައީސްކަމުގެ ހުވާ މިރޭ ކުރެއްވި ޖޯ ބައިޑަން ވިދާޅުވެއްޖެ އެވެ.
އެމެރިކާގެ 46 ވަނަ ރައީސްގެ ގޮތުގައި ހުވާ ކުރެއްވުމަށް ފަހު ގައުމާ މުޚާތަބް ކުރައްވަމުން ބައިޑަން ވިދާޅުވީ މިއީ ތާރީޚީ އަދި އުއްމީދީ ދުވަހެއް ކަމަށެވެ. ބައިޑަން ވަނީ އެމެރިކާގެ އެއްބައިވަންތަކަމަށާއި އަދި އެމަނިކުފާން ވާނީ އެމެރިކާގެ ހުރިހާ ރައްޔިތުންގެ ރައީސަކަށް ކަމަށް ވިދާޅުވެފަ އެވެ. ނަމަވެސް މަގާމާ ހަވާލުވެވަޑައިގަންނަވާ އިރު ކުރިމަތީގައި އެތައް ގޮންޖެހުމެއް އެބަހުރި ކަމަށް ވިދާޅުވި އެވެ.
މީގެ ދެ ހަފުތާ ކުރިން ކުރީގެ ރައީސް ޑޮނަލްޑް ޓްރަމްޕުގެ ސަޕޯޓަރުން ވަދެ ހަމަނުޖެހުން ހިންގި ޔޫއެސް ކެޕިޓަލްގައި ވާހަކަ ދައްކަވަމުން ބައިޑަން ވިދާޅުވީ އެމެރިކާ އަށް މިހާރު ޖެހިފައި ވަނީ ކޮރޯނާވައިރަހާ ދެކޮޅަށް ފިޔަވަޅު އެޅުމާއި ސިޔާސީ ގޮތުން ގައުމު ބައިބައިވެފައި އޮތް މައްސަލަ ހައްލު ކުރަން ކަމަށެވެ.
"މިއަދު، ޖެނުއަރީ މަހުން މި ދުވަހު، އަޅުގަނޑުގެ މުޅި ރޫހު ގުޅިފައި ވަނީ އެމެރިކާ އެކަތިގަނޑަކަށް ހަދަން. ރައްޔިތުން އެއްބައިކޮށް، ގައުމުގެ އެއްބައިވަންތަކަން ގާއިމް ކުރަން. މިކަމުގައި އެމެރިކާގެ ކޮންމެ ރައްޔިތަކު ވެސް އަޅުގަނޑަކަށް އެހީވުމަށް އެދެން،" ބައިޑަންގެ 21 މިނިޓުގެ ތަގްރީރުގައި ވިދާޅުވި އެވެ. "ކުރިއަށް ދެވެން އޮތީ ސުލްހައިގެ މަގުން."
ކުރިމަތިލާން ޖެހޭ ބައެއް ގޮންޖެހުންތަކަށް އިޝާރާތް ކުރައްވަމުން، ވިންޓަގެ ދުވަސްތައް ގުނަމުންދާއިރު ވައިރަހުގެ އެންމެ ނުރައްކާ ދުވަސްތަކާ ކުރިމަތިލާން ޖެހޭ ކަމަށް ވިދާޅުވި އެވެ. އެހެންވެ މި ބަލިމަޑުކަމާ އެމެރިކާގެ އެންމެން އެއް ގައުމެއްގެ ގޮތުގައި ކުރިމަތިލުމަށް އެދިވަޑައިގެންނެވި އެވެ.
ކެޕިޓަލް އިމާރާތުގައި ބައިޑަން ހުވާ ކުރެއްވުމުގެ ރަސްމިއްޔާތު ބޭއްވި އިރު މި މަހު 6 ވަނަ ދުވަހު ޓްރަމްޕުގެ ސަޕޯޓަރުން އެ އިމާރާތަށް ވަދެ ހިންގި ހަމަނުޖެހުންތައް ގިނަ ބަޔަކު ސިފަ ކުރަނީ ޑިމޮކްރެސީ ގުޑުވާލި ހާދިސާއެއްގެ ގޮތުގަ އެވެ. އެ ހަމަނުޖެހުމުގައި ފަސް މީހަކު މަރުވި އެވެ.
"މިއަދު އަޅުގަނޑުމެން މިތަނުގައި ތިބިއިރު މީގެ ދުވަސްކޮޅެއް ކުރިން ވަނީ ހަމަނުޖެހުން ހިންގި ބަޔަކު ވަދެ މި މުހިންމު ތަނުން އަޅުގަނޑުމެން ބޭރުކޮށްލެވޭތޯ މަސައްކަތްކޮށްފައި. އެކަމެއް ނުވި. ނުވެސް ވާނެ. މިއަދަކު ވެސް ނުވާނެ. މާދަމާ ވެސް ނުވާނެ. ދުވަހަކު ވެސް ނުވާނެ. ދުވަހަކު ވެސް ނުވާނެ،" ރިޔާސީ އިންތިޚާބުގައި ބައިޑަން ހޯއްދެވި ކާމިޔާބީ ކޮންގްރެސް އިން ރަސްމީކޮށް ބަލައިގަތުމަށް ބޭއްވި ބައްދަލުވުން ހުއްޓުވަން ޓްރަމްޕަށް ސަޕޯޓްކުރާ ފަރާތްތަކުން ހިންގި ހަމަނުޖެހުމަށް އިޝާރާތް ކުރައްވައި އެމަނިކުފާން ވިދާޅުވި އެވެ.
ބައިޑަން ވިދާޅުވީ އެމެރިކާ އަށް ވަނީ ސިޔާސީ ގޮތުން ހައްދުފަހަނަޅައި ދިއުމާއި ދޮން މީހުންނަކީ މާމަތިވެރި ބައެއް ކަމަށް ގަބޫލް ކުރުމާއި އެތެރޭގެ ޓެރަރިޒާމާ ކުރިމަތިލާން ޖެހިފައި ކަމަށެވެ. އަދި އެކަންކަމުގެ މައްޗަށް ކާމިޔާބު ހޯއްދަވާނެ ކަމަށް ވިދާޅުވި އެވެ.
އެމެރިކާގެ ފުރަތަމަ އަންހެން ނައިބް ރައީސް ކަމަލާ ހަރިސް އަށް ތައުރީފް ކުރައްވަމުން ބައިޑަން ވިދާޅުވީ އެއީ ތާރީޚީ ކަމެއް ކަމަށެވެ.
"މީގެ 108 އަހަރު ކުރިން އަންހެނުން ވޯޓުލުމާ ވެސް ދެކޮޅަށް އެތައް ބަޔަކު އަޑު އުފުލި. އެކަމަކު މިއަދު އަޅުގަނޑުމެންނަށް ފެނިގެން އެ ދިޔައީ އެމެރިކާގެ ތާރީޚުގައި ފުރަތަމަ ފަހަރަށް އަންހެން ނައިބް ރައީސަކު ހުވާ ކުރި މަންޒަރު - ކަމަލާ ހަރިސް. އެހެންވެ ކަންކަން ބަދަލު ނުވާނެ ކަމަށް އަޅުގަނޑަށް ނުދަންނަވާ،" ބައިޑަން ވިދާޅުވި އެވެ.