20 ޖެނުއަރީ 2021 - 12:27
ޓެކްސް ދައްކާ ފަރާތްތަކުގެ ޗާޓަރަށް މީރާ އިން ބަދަލު ގެނެސް އަލުން ޝާއިއުކޮށްފި އެވެ.
ޓެކްސް ދައްކާ ފަރާތްތަކުގެ ޗާޓަރަކީ މީރާއިން ދޭ ހިދުމަތްތަކުގެ ފެންވަރާއި، ޓެކްސް ދައްކާ ފަރާތްތަކާއި އެހެނިހެން ފަރާތްތަަކުން މީރާގެ ފަރާތުން އުންމީދުކުރާ ކަންކަން ހިމަނައިގެން ހަދާފައިވާ ޗާޓަރެކެވެ. މި ޗާޓަރުގައި ޓެކްސް ދައްކާ ފަރާތްތަކުގެ ހައްގުތަކާއި ޒިންމާތައް ވެސް ބަޔާންކޮށްފައި ހުންނާނެ އެވެ.
މީރާ އިން ބުނި ގޮތުގައި މިއީ އެ އިދާރާ އިން ހިދުމަތް ހޯދާ ފަރާތްތަކަށް އެހީވުމަށާއި އެ ފަރާތްތަކުގެ އެހީ ހޯދުމުގެ ބޭނުމުގައި އެކުލަވައިލި ޗާޓަރެކެވެ.
މި ޗާޓަރަށް ގެނައި ބަދަލުތަކުގެ ތެރޭގައި މީރާގެ ހިދުމަތުގެ ފެންވަރުގެ މިންގަޑުތައް އެއަށް އިތުރުކުރުން ހިމެނެ އެވެ. އަދި ޓެކްސްއާ ގުޅޭ ޒިންމާތައް އަދާކުރުމުގައި އެ އިދާރާގެ އޮންލައިން ހިދުމަތްތައް ބޭނުންކުރުމުގެ މުހިންމުކަން ބުނެދީ އެ ވަސީލަތްތައް ބޭނުން ކުރުމަށް ވެސް ވަނީ ބާރުއަޅާފައިވެ އެވެ.
މި ޗާޓަރުގައި ކަނޑައަޅައިފައިވާ ހިދުމަތުގެ ފެންވަރުތަކާ އެއްހަމައަށް މީރާގެ ހިދުމަތްތައް ދިނުމަށް އިސްކަން ދޭނެކަމަށް އެ އިދާރާއިން ބުންޏެވެ. އަދި ޓެކްސް ދައްކާ ފަރާތްތަކަށް ފެންވަރު ރަނގަޅު ހިދުމަތްތަކެއް ފޯރުކޮށްދީ "ޕްރޮފެޝަނަލް" މުއައްސަސާއެއްގެ ގޮތުގައި އަބަދުވެސް އޮންނާނެ ކަމުގެ ޔަގީންކަން އެ އިދާރާ އިން ވަނީ ދީފަ އެވެ.