20 ޖެނުއަރީ 2021 - 12:43
ވޮޝިންޓަން (ޖެނުއަރީ 20) - ވެރިކަމަށް ވަޑައިގެން ކުރެއްވީ ވަރަށް އުނދަގޫ މަސައްކަތްތަކެއް ކަމަށާއި ރައްޔިތުން އެމަނިކުފާން އިންތިޚާބު ކުރީ އެ މަސައްކަތް ކުރައްވަން ކަމަށް ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
ހަތަރު އަހަރުގެ ދައުރު މިއަދު ފުރިހަމަ ކުރައްވައި ވައިޓް ހައުސް އިން ނުކުމެވަޑައިގަންނަވާއިރު ވެސް ޓްރަމްޕް ވަނީ ނޮވެމްބަރު މަހުގެ އިންތިޚާބުގެ ނަތީޖާ ގަބޫލް ކުރައްވަން ދެކޮޅު ހައްދަވައިފަ އެވެ. އާ ރައީސް ޖޯ ބައިޑަން މިއަދު ހުވާ ކުރައްވާނެ އެވެ.
ޓްރަމްޕުގެ ވެރިކަމުގެ ފަހު ދެ ހަފުތާ ދިޔައީ އެމެރިކާ މިއިން ޒަމާނެއްގައި ވެސް ނުދެކޭ ފަދަ ހަމަނުޖެހުން ގަނޑެއްގެ ތެރޭގަ އެވެ. ކޮންގްރެސްގެ ބައްދަލުވުމެއް މި މަހު 6 ވަނަ ދުވަހު ކުރިއަށް ދަނިކޮށް ޓްރަމްޕަށް ތާއީދުކުރާ ފަރާތްތަކަށް ކޮންގްރެސްގެ ޗެމްބަރަށް ވަދެ ހިންގި ހަމަނުޖެހުންތަކުގައި ބައެއް މީހުން ވަނީ މަރުވެފަ އެވެ.
ޔޫޓިއުބުގައި ޓްރަމްޕް އާއްމު ކުރެއްވި ވީޑިއޯއެއްގައި ވަނީ ސިޔާސީ ހަމަނުޖެހުމަށް ޖާގަ ނެތް ކަމަށް ވިދާޅުވެފަ އެވެ. ޓްރަމްޕް ވިދާޅުވީ އެމެރިކާގެ ތާރީޚުގައި ވެސް ގައުމުގެ އިގްތިސާދު އެންމެ ރަނގަޅުވީ އެމަނިކުފާނުގެ ވެރިކަމުގައި ކަމަށެވެ.
"އަޅުގަނޑު ފަޚުރުވެރިވާ އަނެއް ކަމަކީ ފަހުގެ ތާރީޚެއްގައި ހަނގުރާމައެއް ނުފަށާ އެމެރިކާގެ ފުރަތަމަ ރައީސްގެ ގޮތުގައި މަގާމުން ވަކިވެގެން ދިއުން،" ވައިޓް ހައުސް ދޫކުރައްވައި ފްލޮރިޑާ އަށް ދިރިއުޅުން ބަދަލު ކުރައްވާ ޓްރަމްޕް ވިދާޅުވި އެވެ.
ވެރިކަމުން ފައިބައިވަޑައިގަތުމުގެ ކުރިން ޓްރަމްޕް މިއަދު ވަނީ ކުށްވެރިންގެ ތެރޭން 73 ފަރާތަކަށް މައާފް ދެއްވައިފަ އެވެ. އޭގެ ތެރޭގައި ޓްރަމްޕުގެ ކުރީގެ އަރިސް ބޭފުޅެއް ކަމަށްވާ ސްޓީވް ބެނޮން ވެސް ހިމެނެ އެވެ.
ކޮންގްރެސްގައި ހިންގި ހަމަނުޖެހުންތަކާ ގުޅިގެން ޓްރަމްޕް މިހާރު ވަނީ އިމްޕީޗްކޮށްފަ އެވެ. ޓްރަމްޕަކީ އެމެރިކާގެ ތާރީޚުގައި ވެސް ދެ ފަހަރަށް އިމްޕީޗްކުރި ފުރަތަމަ ރައީސް އެވެ. މަގާމުން ވަކިވެވަޑައިގަތް ނަމަވެސް ޓްރަމްޕުގެ ޝަރީއަތް ސެނެޓުގައި ކުރިއަށް ދާނެ އެވެ.