19 ޖެނުއަރީ 2021 - 07:57
އެމެރިކާގެ ލޮސް އެންޖެލިސް އިން ޝިކާގޯ އަށް ދިޔަ ގޮތަށް ކޮވިޑް-19 ގެ ބިރަށްޓަކައި އެނބުރި ވަޒަނަށް ނުގޮސް އެމެރިކާގެ އެއާޕޯޓެއްގައި ތިން މަހެއްހާ ދުވަސް ވަންދެން އުޅުނު މީހެއްގެ މައްސަލަ ފަޅާއަރައި އެ މައްސަލާގައި އޭނާގެ މައްޗަށް ދައުވާކޮށްފި އެވެ.
މީޑިއާތަކުން ރިޕޯޓްކޮށްފައިވާ ގޮތުގައި ޝިކާކޯގެ އިންޓަނޭޝަނަލް އެއާޕޯޓް، އޮހާރޭގައި މިދިޔަ އަހަރުގެ އޮކްޓޫބަރު މަހުގެ 19 އިން މި މަހުގެ 16 އާ ހަމައަށް ދިރިއުޅުނީ އިންޑިއާ ދަރިކޮޅުގެ އެމެރިކާ މީހެކެވެ. އުމުރުން 36 އަހަރުގެ އަދިތިޔާ ސިންގް އެއާޕޯޓްގައި ދިރިއުޅުނީ އެއާޕޯޓްގެ އޮޕަރޭޝަން މެނޭޖަރެއްގެ ކާޑު ބޭނުންކޮށްގެން އެތަނުގެ ހާއްސަ ސަރަހައްދެއްގަ އެވެ. އަދި އެއާޕޯޓްގައި އޭނާ އުޅުނީ އެއާޕޯޓަށް ދާ ފަސިންޖަރުންގެ ފަރާތުން ލިބުނު އެހީތަކުންނެވެ.
މިދިޔަ ހޮނހިރު ދުވަހު އޭނާ ހައްޔަރުކުރުމާ ހަމައަށް އެއާޕޯޓްގައި ދިރިއުޅުނުކަން އެއާޕޯޓްގެ އޮފިޝަލުންނަށް ރޭކާ ވެސް ނުލަ އެވެ. އެކަމަކު އޭނާ ހޮނިހިރު ދުވަހު ހައްޔަރުކުރީ ޝައްކުވާ ކަހަލަ ގޮތަކަށް ހަރަކާތްތައް ހުރެގެން އެއީ ކާކުތޯ އެއާޕޯޓްގެ މުވައްޒަފަކު އެހުމުން ކާޑު ދެއްކުމުންނެވެ. އެ ކާޑަކީ އޮކްޓޯބަރު މަހުގެ ތެރޭގައި ގެއްލިގެން ރިޕޯޓްކޮށްފައިވާ އޮތް އެއްޗެކެވެ.
އެހެންވެ އެ ވަގުތުން މައްސަލަ ފުލުހުންނަށް ރިޕޯޓްކޮށް އޭނާގެ މައްސަލައާ މެދު ގޮތެއް ނިންމަން ކޯޓަށް ގެންދިޔައީ އެވެ.
އެ މައްސަލާގައި ޝިކާގޯގެ ކުކް ކައުންޓީގެ ފަނޑިޔާރު ސުޒާނާ އޯޓީޒް ވިދާޅުވީ މި މަރުހަލާގައި އަދިތިޔާ އަށް އޮތް ގޮތަކީ ކަފާލާތަށް 1،000 ޑޮލަރު ދެއްކުން ކަމަށާއި އެހެން ނޫން ނަމަ ދިގު މުއްދަތަކަށް ޝިކާގޯ އިންޓަނޭޝަނަލް އެއާޕޯޓުން ދަތުރުނުކުރެވޭ ގޮތަށް ހަދާނެ އެވެ. އަދި އޭނާގެ މައްޗަށް ވަނީ ހުއްދަ ނެތި އެއާޕޯޓް ކަހަލަ އާންމު މަސްލަހަތާ ގުޅިފައިވާ ތަނެއްގައި ދިރިއުޅުމާއި އެއާޕޯޓުން ވައްކަން ކުރުމުގެ ދައުވާ ވެސް އުފުލައިފަ އެވެ.
"އަދިތިޔާގެ މައްސަލައިން އަހަރެމެންނަށް ފާހަގަކުރެވުނީ އެއާޕޯޓަކީ ދަތުރުވެރިންގެ ރައްކާތެރި ތަނެއް ކަމާ މެދު ސުވާލު އުފެދުން. އެއާޕޯޓަށް ނޭނގި އެހާ ދިގު މުއްދަތަކަށް މީހަކަށް އެއާޕޯޓެއްގައި ދިރިއުޅެވުމަކީ ވަރަށް ބޮޑު މައްސަލައެއް،" ފަނޑިޔާރު ވިދާޅުވި އެވެ. "އަދި އޭނަގެ އެ އަމަލުން އޭނަ އަކީ ނުރައްކާތެރީ މީހެއް ކަމަށް ބެލުމުގެ ފުރުސަތު ވެސް އެބައޮތް."
ނަމަވެސް މި މައްސަލާގައި އެސިސްޓަންޓް ޕަބްލިކް ޑިފެންޑާ ކޯޓްނީ ސްމޯލްވުޑް ވިދާޅުވީ އަދިތިޔާ ޝިކާގޯ އަށް ދަތުރުކުރި ސަބަބެއް ސާފު ނުވާ ކަމަށާއި އޭނާ އަކީ ކުރިން ކުށުގެ އެއްވެސް ރެކޯޑެއް ވެސް އޮތް މީހެއް ނޫން ކަމަށެވެ.
މި މައްސަލަ ފެންމަތިވުމާ ގުޅިގެން ޝިކާގޯ އޭވިއޭޝަން ޑިޕާޓްމަންޓުން ނެރުނު ބަޔާނެއްގައި ބުނީ އަދިތިޔާގެ މައްސަލައިގެ ތަހުގީގެއް މިހާރު ފަށާފައިވާ ކަމަށެވެ.
މީގެ ކުރިން ވެސް ބައެއް މީހުން އެއާޕޯޓްތަކުގައި ދިރިއުޅުނު މައްސަލަތަކެއް ފެންމަތިވެފައިވެ އެވެ. އެގޮތުން 2018 ގައި މެލޭޝިއާގެ ކުއާލާ ލަމްޕޫރް އެއާޕޯޓްގައި ތާށިވި ސީރިއާ މީހަކު 108 ދުވަސް ވަންދެން އެތަނުގައި ދިރިއުޅެފައިވެ އެވެ.