12 ޖެނުއަރީ 2021 - 22:36
ކޮވިޑް-19 އިން ރައްކާތެރިވުމަށް އަޅާފައިވާ ފިޔަވަޅުތަކަށް ބޮޑެތި ލުއިތަކެއް ދިން ފަހުން އެ ބަލި ޖެހޭ މީހުން އަނެއްކާ ވެސް އިތުރުވާން ފަށައިފި އެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިރޭ ބުނީ، އިއްޔެ ހަވީރު 6:00 އިން މިއަދު ހަވީރު 6:00 އާ ދޭތެރޭ 2،768 ސާމްޕަލް ޓެސްޓުކޮށްފައިވާ ކަމަށެވެ. އޭގެ ތެރެއިން 59 މީހަކު ޕޮޒިޓިވްވެފައި ވެ އެވެ. އެއާއެކު، ރާއްޖޭގައި ކޮވިޑް ޖެހުނު މީހުންގެ އަދަދު 14،218 އަށް އެރީ އެވެ.
އަލަށް ޕޮޒިޓިވްވެފައި ވަނީ މާލެ ސަރަހައްދުން 33 މީހަކާއި ރަށްރަށުން 20 އަދި އޮޕަރޭޝަނަލް ރިސޯޓުތަކުން ހަ މީހެކެވެ.
ބަލިން 37 މީހަކު ރަނގަޅުވެފައިވާތީ މި ވަގުތު ކޮވިޑަށް ފަރުވާ ހޯދަމުން އަންނަނީ 760 މީހުންނެވެ. ކޮވިޑުން ރަނގަޅުވި މީހުންގެ ޖުމްލަ އަދަދަކީ 13،402 އެވެ.
އިއްޔެ ވެސް ކޮވިޑަށް ޕޮޒިޓިވްވި މީހުންގެ އަދަދު ހުރީ 50 ގަ އެވެ. އޭގެ ކުރީ ދުވަހު 44 މީހަކު ޕޮޒިޓިވްވެފައި ވެ އެވެ.
އާއްމު ސިއްހަތުގެ ތަޖުރިބާކާރު ޑރ. ޝީނާ މޫސާ ވަނީ ކޮވިޑަށް ޕޮޒިޓިވްވާ މީހުން މި މަހު ކުޑަކޮށް އިތުރުވާނެ ކަމަށް ވިދާޅުވެފަ އެވެ. އޭނާ ވިދާޅުވީ މި މަހު ކޭސްތައް އިތުރުވާނެ ކަމަށް ބެލެވެނީ ދީފައިވާ ލުއިތަކާއެކު އާ އަހަރު ފާހަގަކުރުމަށް ބައިވަރު ހަރަކާތްތައް ހިނގާފައިވާ ހުރުމުން ކަމަށެވެ.
ކޭސްތައް މަދުވުމާ ގުޅިގެން ދިން ލުއިތަކުގެ ތެރޭގައި, ނެގެޓިވް ނަތީޖާއަކާ އެކު ރާއްޖެ އިން ބޭރުން މާލެ ސަރަހައްދަށް އަންނަ މީހުން ކަރަންޓީނުވާން ނުޖެހޭ ގޮތަށް ހަމަޖެއްސުމާއި ގިނަވެގެން އެއްވެވޭނެ މީހުންގެ ލިމިޓް ދޫކޮށްލައި ހަފްލާތައް ބާއްވަން ހުޅުވާލުމާއި ދިވެހިން ރިސޯޓުތަކަށް ދާން ހުއްދަދިނުން ހިމެނެ އެވެ.