12 ޖެނުއަރީ 2021 - 22:29
މޯލްޑިވްސް ކަރެކްޝަނަލް ސާވިސްގެ ބަންދުގައި ހުރި މީހަކު، ގަޑިއަށް ޝަރީއަތަށް ހާޒިރުނުކޮށްގެން އެ އިދާރާ 250ރ. އިން މިއަދު ޖޫރިމަނާކޮށްފި އެވެ.
ކުޑަކުއްޖެއްގެ ހަށިގަނޑުގައި ޖިންސީ ނިޔަތެއް އޮވެގެން ގަސްތުގައި އަތްލުމުގެ ދައުވާގެ އަޑުއެހުމަށް ހެނދުނު 10:00 އަށް މީހަކު ކޯޓަށް ހާޒިރުކޮށްދިނުމަށް އެދި ކަރެކްޝަންސް އަށް ޗިޓު ފޮނުވި އެވެ. ނަމަވެސް އެ ދައުވާ ލިބޭ ފިރިހެން މީހާ ކޯޓަށް ހާޒިރުކޮށްދިނީ އަޑުއެހުން ތާވަލްކުރި ގަޑީގެ އެތައް އިރެއް ފަހުންނެވެ.
އެހެންވެ ޝަރީއަތްކުރުމާ ބެހޭ ޖިނާއީ އިޖުރާއަތުގެ ގަވައިދުގެ ދަށުން 250ރ. އިން ވަނީ ޖޫރިމަނާކޮށްފަ އެވެ. އެކަމަކު އެ އަޑުއެހުން ކެންސަލްނުކޮށް ތާވަލްކުރި ގަޑީގެ ފަހުން ހާޒިރުކުރިއަސް މައްސަލައިގެ އަޑުއެހުން ކުރިއަށް ގެންދިޔަ އެވެ.
ކްރިމިނަލް ކޯޓުގެ އަޑުއެހުމަކަށް ޕްރޮސެކިއުޓާ ޖެނެރަލްގެ އޮފީހުގެ ވަކީލުން ހާޒިރު ނުވުމުން އެ އޮފީސް ވެސް މީގެ ކުރިން 250ރ. އިން ޖޫރިމަނާ ކޮށްފައި ވެ އެވެ.
މިދިޔަ ބުރާސްފަތި ދުވަހު ޕީޖީ އޮފީސް ޖޫރިމަނާކުރީ ކުޑަކުއްޖަކަށް ޖިިންސީ ގޯނާކުރި ކަމުގެ ތުހުމަތުގައި ބަންދުގައި ހުރި މީހެއްގެ ބަންދު މުރާޖާ ކުރަން ތާވަލްކުރި އަޑުއެހުމަށް ޕީޖީ އޮފީހުން ވަކީލަކު ހަމަޖައްސާފައިނުވާތީ އެވެ.