12 ޖެނުއަރީ 2021 - 15:19
އަދާލަތު ޕާޓީގެ ރިޔާސީ އިންތިހާބު އޮންލައިންކޮށް ބާއްވަން ނިންމައިފި އެވެ.
އެ ޕާޓީގެ ރައީސާއި ނައިބު ރައީސް ހޮވާ އިންތިހާބު މި މަހުގެ 31 ވަނަ ދުވަހު ބާއްވާނެ އެވެ. އަދާލަތު ޕާޓީގެ މެމްބަރެއްގެ ގޮތުގައި މާދަމާގެ ކުރިން ރަހިސްޓްރީވެފައިވާ އެންމެންނަށް މި އިންތިހާބުގައި ވޯޓުލުމުގެ ހައްގު ލިބޭ އިރު، މިހާތަނަށް 7،000 އަށް ވުރެ ގިނަ މީހުން ރަޖިސްޓްރީވެފައިވާ ކަމަށް އެ ޕާޓީގެ މީޑިއާ ކޮމިޓީ މެމްބަރަކު "މިހާރު" އަށް ވިދާޅުވި އެވެ.
އޭނާ ވިދާޅުވީ އޮންލައިންކޮށް އިންތިހާބު ބާއްވަން ނިންމީ ކޮވިޑް-19 އާ ގުޅިގެން ރައްކާތެރިކަމުގެ ފިޔަވަޅެއްގެ ގޮތުގައި ކަމަށެވެ. އަދި މިދިޔަ މަހު ވެސް އެ ޕާޓީގެ ދާއިރާ މެމްބަރުން ކަނޑައަޅަން ބޭއްވި އިންތިހާބެއްގައި އޮންލައިންކޮށް ވޯޓުލުން ކުރިއަށް ގެންގޮސްފައިވާ ކަމަށް ވިދާޅުވި އެވެ.
"ވޯޓުގެ ކަންތައް ހަމަޖައްސަނީ އެމެރިކާގެ ކުންފުންޏަކާ ގުޅިގެން،" އޭނާ ވިދާޅުވި އެވެ.
މި އިންތިހާބުގައި ވޯޓުލާ އަދާލަތު ޕާޓީގެ މެމްބަރުންނަށް، ވޯޓު ލާން ހާއްސަ ލިންކެއް ފޮނުވާނެ އެވެ. ވޯޓު ލެވޭނީ އެ މީހާގެ އައިޑީ ކާޑު ނަންބަރާއި އަދާލަތު ޕާޓީން ދީފައިވާ ނަންބަރެއް އެއްގޮތްވެ، އެ މީހެއްގެ ވަނަވަރު ކަށަވަރުވުމުންނެވެ.
މީގެ އިތުރުން އަދާލަތު ޕާޓީގެ ގޮފިތަކަށް، އެ ރަށެއްގައި ވޯޓު ފޮށި ބަހައްޓަން އެދެވޭނެ ކަމަށާއި އެކަމަށް މާދަމާ ހުޅުވާލާނެ ކަމަށް އޭނާ ވިދާޅުވި އެވެ. ގޮތްޕެއްގައި މަދުވެގެން 30 މެމްބަރުން ހިމެނެ އެވެ.
އަދާލަތު ޕާޓީގެ ރިޔާސީ އިންތިހާބު ބާއްވަން އިއުލާންކުރުމަށް ފަހު، އަންހެނުންނަށް ވެސް އެ ދެ މަގާމަށް ވާދަކުރެވޭނެ ގޮތަށް ޕާޓީގެ އަސާސީ ގަވާއިދު ބަދަލުކުރީ މިދިޔަ ހޮނިހިރު ދުވަހެވެ.