11 ޖެނުއަރީ 2021 - 17:49
ބޮލީވުޑްގެ ބަތަލާ އަނުޝްކާ ޝަރުމާ މިއަދު އަންހެން ކުއްޖަކު ވިހައިފި އެވެ.
ކްރިކެޓް ތަރި ވިރާޓް ކޯލީއާ 2017 ގައި ކައިވެނިކުރި ބަތަލާ ފިލްމީ މަސައްކަތްތަކާ ދުރުގައި ވެސް ހުންނަތާ ދޮޅު އަހަރެއްހާ ދުވަސް ފަހުން އަލަތު ދަރިފުޅަށް ބަލިވެއިން ވާހަކަ ހާމަކުރީ މިދިޔަ އަހަރުގެ އޮގަސްޓް މަހުގެ 27 ގަ އެވެ.
އަނުޝްކާ ވިހެއީ މިއަދު ހަވީރުގެ ވަގުތެއްގައި މުމްބާއީގެ ބްރީޗް ކޭންޑީ ހޮސްޕިޓަލްގަ އެވެ. ވިހެއުމާ ގުޅިގެން އަނުޝްކާ އާއި ވިރާޓްގެ ފަރާތުން ވަނީ ސޯޝަލް މީޑިއާގައި ބަޔާނެއް ވެސް ނެރެފަ އެވެ. ބަޔާނުގައި ބުނީ ދެމައިންގެ ހާލު ވެސް ވަރަށް ރަނގަޅު ކަމަށާއި މިއީ އާއިލާ އަށް ވަރަށް އުފާވެރި ވަގުތެއް ކަމަށެވެ. އަދި މި ވަގުތު އާއިލާ އަށް ވަރަށް ބޮޑަށް ޕްރައިވެސީ ބޭނުންވާ ކަމަށް ވެސް ބުންޏެވެ.
އަނުޝްކާ ވިހޭ ޚަބަރާ އެކު ފިލްމީ ފަންނާނުންނާއި ފޭނުން ވެސް އަންނަނީ މަރުހަބާ ކިޔައި މެސެޖްތައް ފޮނުވަމުންނެވެ.
ފިލްމު "ރަބް ނެ ބަނާދީ ޖޯޅީ" އިން 2008 ގައި ޝާހްރުކް ޚާނާ އެކު ބޮލީވުޑަށް ނުކުތް އަނުޝްކާ އެންމެ ފަހުގެ ފިލްމަކީ 2018 ގައި ޝާހްރުކާ އެކީ ކުޅުނު "ޒީރޯ" އެވެ.
ދާދި ފަހުން ދިން އިންޓަވިއުއެއްގައި ހުނަރުވެރި ބަތަލާ ބުނީ ދަރިއަކު ލިބުނަސް އޭނާ ފިލްމީ މަސައްކަތުގައި ދެމިހުންނާނެ ކަމަށާއި ފަހު ނޭވާއާ ހަމައަށް ވެސް އެކްޓިންއާ ދުރަށް ނުދާނެ ކަމަށެވެ.