10 ޖެނުއަރީ 2021 - 11:50
ޖަކާޓާ (ޖެނުއަރީ 10) - ވެރިރަށް ޖަކާޓާ އިން ފުރިތާ ކުޑަ އިރުކޮޅެއްގެ ތެރޭގައި ގެއްލުނު އިންޑޮނީޝިއާގެ ފަސިންޖާ މަތިންދާ ބޯޓު ކަނޑަށް ވެއްޓުނު ކަމަށް ބެލެވޭ ތަން ދެނެގަނެފައިވާ ކަމަށް އެ ގައުމުގެ ކަމާބެހޭ ފަރާތްތަކުން ބުނެފި އެވެ.
ބަޖެޓް އެއާލައިނެއް ކަމަށްވާ ސްރިވިޖާޔާ އެއާގެ ބޯޓު ރާޑަރުން ގެއްލިފައި ވަނީ ފުރިތާ ހަތަރު މިނިޓް ފަހުންނެވެ. ވެސްޓް ކަލިމަންޓަން ޕްރޮވިންސްގެ ޕޮންޓިއަނަކަށް ދަތުރުކުރަމުން ދިޔަ ބޯޓުގައި 62 މީހުން ތިއްބެވެ. އޭގެ ތެރޭގައި 50 ފަސިންޖަރުންނާއި 12 ފަޅުވެރިން ހިމެނެ އެވެ. ފަސިންޖަރުންގެ ތެރޭގައި ހަތް ކުޑަ ކުދިންނާއި ތިން ކުއްތުކުދިން ވެސް ހިމެނެ އެވެ.
އިންޑޮނީޝިއާގެ އޮފިޝަލުން މިއަދު ބުނީ ބޯޓުގެ ފްލައިޓް ރެކޯޑަރުގެ ސިގްނަލް ދެނެގަނެވިފައިވާ ކަމަށެވެ. ސިގްނަލް ލިބޭ ކަމަށް ބެލެވޭ ތަނަށް މިހާރު ވަނީ ކަނޑުގެ ސިފައިންގެ ޑައިވަރުންނާ އެކު 10 އުޅަނދެއް ފޮނުވައިފަ އެވެ. ރެސްކިއު ޓީމަށް އެހީތެރިވުމުގައި ހަތަރު މަތިންދާ ބޯޓު ވެސް ދަނީ ހަރަކާތްތެރިވަމުންނެވެ.
"ދެ ޕޮއިންޓަކުން ސިގްނަލް އެބަ ލިބޭ. އެއީ ބޯޓުގެ ކަޅު ފޮށިން ކަމަށް ބެލެވޭ،" އިންޑޮނީޝިއާގެ ސާޗް އެންޑް ރެސްކިއު އެޖެންސީގެ ވެރިޔާ ބަގޫސް ޕުރުހިޓޯ ވިދާޅުވި އެވެ.
މަތިންދާ ބޯޓެއްގެ ފުރޮޅަކާއި އެނޫންވެސް ބައެއް ތަކެތި ފެނިފައިވާތީ އެ ތަކެތި އެނަލައިޒް ކުރުމުގެ މަސައްކަތް ކަމާބެހޭ ފަރާތްތަކުން މިހާރު ދަނީ ކުރަމުންނެވެ. ޖަކާޓާ ފުލުހުންގެ ތަރުޖަމާން ޔުސްރީ ޔޫނުސް ވިދާޅުވީ ރެސްކިއު ޓީމުގެ ފަރާތުން ދެ ބަހެއްގެ ތަކެތި ލިބިފައިވާ ކަމަށާއި އެއް ދަބަހުގައި ހުރީ ފަސިންޖަރުންގެ ތަކެތި ކަމަށް ބެލެވޭ ސާމާނު ކަމަށެވެ. އަނެއް ދަބަހުގައި ހުރީ އިންސާނުންގެ ހަށިގަނޑުގެ ބައިތައް ކަމަށް އޭނާ ވިދާޅުވި އެވެ.
ވެއްޓިފައިވާ ކަމަށް ބެލެވޭ ބޯޓު ޖަކާޓާ އިން ފުރީ އިއްޔެ މެންދުރު ފަހު އިންޑޮނީޝިއާ ގަޑިން 14:36 ގަ އެވެ. ބޯޓާ އެންމެ ފަހުން ގުޅިފައިވާ ކަމަށް ރެކޯޑްކޮށްފައި ވަނީ 14:40 ގަ އެވެ. ޖަކާޓާ އިން ޕޮންޓިއަނަކަށް ދަތުރުކުރަން އާއްމުކޮށް ނަގަނީ 90 މިނިޓެވެ. ފްލައިޓް ޓްރެކިން ވެބްސައިޓަކުން ބުނެފައިވާ ގޮތުގައި ބޯޓު ވަނީ މިނިޓެއްހާ އިރުތެރޭ 3،000 މީޓަރު (10،000 ފޫޓް) އަށް ތިރިވެފަ އެވެ.
ވެއްޓިފައިވާ ކަމަށް ބެލެވޭ ބޯއިން 737-500 ބޯޓުގެ ރަޖިސްޓްރޭޝަންގައިވާ ގޮތުގައި އެއީ 26 އަހަރުވެފައިވާ ބޯޓެވެ. އެއާލައިނުގެ ޗީފް އެގްޒެކެޓިވް ޖެފަސަން އިރްވިން ޖައުވެނާ ވިދާޅުވި ގޮތުގައި ބޯ ވިއްސާރައިގެ ސަބަބުން ބޯޓު ފުރުން 30 މިނިޓަށް ލަސްކުރަން ޖެހުނެވެ. ނަމަވެސް އެއީ ބޯއިން 737 މެކްސް މަރުކާގެ ބޯޓެއް ނޫނެވެ. މިދިޔަ އަހަރު ވަނީ އެ މަރުކާގެ ބޯޓުތަކުގެ ދެ އެކްސިޑެންޓެއް ހިނގައިފަ އެވެ.
ބޯޓު ގެއްލިފައި ވަނީ ޖަކާޓާގެ އުތުރުން 20 ކިލޯ މީޓަރު (12 މޭލު) ދުރުންނެވެ. މިއީ އޮކްޓޯބަރު 2018 ގައި ވެސް ބޯޓެއް ވެއްޓުނު ސަރަހައްދާ މާ ދުރު ހިސާބެއް ނޫނެވެ. އެ ފަހަރު ވަނީ ލަޔަން އެއާގެ ބޯޓެއް ފުރިތާ 12 މިނިޓް ފަހުން ޖާވާ ކަނޑަށް ވެއްޓި 189 މީހުން މަރުވެފަ އެވެ.