04 ނޮވެމްބަރ 2016 - 06:14
އިންޑިއާގައި މި އުޅޭ ޑައިރެކްޓަރުންގެ ތެރޭގައި ހިމެނޭ ސަންޖޭ ލީލާ ބަންސާލީ އާއި އަޝުތޯޝް ގޮވަރިކާ ކަހަލަ ޑައިރެކްޓަރުން ރާއްޖޭގައި ވެސް އުޅޭ ނަމައޭ ހިތަށް އަރަ އެވެ. އެކަމަކު މިއީ މާބޮޑު އުންމީދެއް ކަންނޭނގެ އެވެ. ނަމަވެސް ދިވެހި ފިލްމުތަކަށް ލޯބިކުރާ މީހަކަށްވާތީ އަބަދު ވެސް މިހެން ހިތަށް އަރަ އެވެ.
ހަމައެކަނި މި ދެ ޑައިރެކްޓަރުންގެ ފިލްމުތަކަށް ބަލާލިޔަސް، ބޮޑު ސްކްރީނުން ބަލާލަން ވަރަށް ފުރިހަމަ، އެހާމެ މޮޅެތި ފިލްމުތަކެއް ލިބެ އެވެ. ހާއްސަކޮށް އިންޑިއާގެ އާދަކާދަތަކާއި ގަދީމީ ތާރީހާއި ސަގާފަތާ އެކު ލޯބި މަސްހުނިކޮށްގެން އެ މީހުން ގެނެސްދޭ ފިލްމުތަކުގެ ސަބަބުން އިންޑިއާގެ ތާރީހު ދިރުވަން ކުރާ މަސައްކަތަށް ވެސް ބޮޑު ހިތްވަރެއް ލިބެ އެވެ.
ސިނަމާއަކީ ވަރަށް ބާރު ގަދަ އެހާމެ ނުފޫޒު ގަދަ މީޑިއަމަކަށް ވަނީ އެތައް ވައްތަރެއްގެ، އެތައް ވާހަކައެއް ބެލުންތެރިންނަށް ކިޔައި ދެވޭތީ އެވެ. އިންޑިއާގެ ސިނަމާ އަށް ބަލައިފި ނަމަ އެކަން ވަރަށް ރަނގަޅަށް ސާބިތު ވާނެ އެވެ. އިންޑިއާގެ ވާހަކަ މި ދައްކަނީ ދިވެހިން އަދިވެސް އެންމެ ގަޔާވަނީ އިންޑިއާގެ ފިލްމުތައް ކަމަށް ވާތީ އެވެ. ވަކިން ހާއްސަކޮށް ބޮލީވުޑްގެ ފިލްމުތަކެވެ.
ރާއްޖޭގެ މަޝްހޫރު ޑައިރެކްޓަރުންގެ ލިސްޓްގައި ހިމެނޭ އަބްދުލް ފައްތާހަކީ މީގެ ކުރިން ލޯބި/ލޯބީގެ ބިރުވެރި ފިލްމުތަކެއް ބެލުންތެރިންނާ ހަމައަށް ގެނެސް ދިން ޑައިރެކްޓަރެކެވެ. އެކަމަކު ތާރީހީ ހާދިސާއެއްގެ މައްޗަށް ފައްތާހް ފިލްމެއް ޑައިރެކްޓް ކުރަން އުޅޭކަން އެނގުމާ އެކު، ޝައުވެރިކަން ވަރަށް ބޮޑަށް އިތުރުވި އެވެ.
އެ ފިލްމަކީ ކުރީގެ ރައީސް މަރުހޫމް އިބްރާހީމް ނާސިރުގެ ދައުރުގައި ގދ. ތިނަދޫން މީހުން ބާލައި، އެ ރަށް ފަޅުކޮށްލުމާއި އަލުން އެ ރަށް އާބާދުވި އަސަރު ގަދަ ހާދިސާ އަށް ގެނެސްދޭން ފެށި މަސައްކަތެކެވެ.
މި ވާހަކަ ސިނަމާ އިން ބަލާލަން ލިބުމަކީ ރާއްޖޭގެ ސިނަމާއިން އާ ވައްތަރެއްގެ ފިލްމެއް ބަލާލަން ލިބުމެވެ. މާޒީގެ ތެރެއަށް ތެރެއަށް ފީނައި، ފައްތާހު ސްކްރީނާ ހަމައަށް ގެނެސް ދޭން ރޭވި މަންޒަރު، ބަލާލުމުގެ ޝައުގުވެރިކަން ބޮޑުވީ މި ސަބަބާ ހެދި އެވެ.
އެކަމަކު އެ ފިލްމް ހެދޭ ގޮތެއް ނުވި އެވެ. ސަރުކާރުން ވަނީ އެ ފިލްމް ހުއްޓުވާފަ އެވެ.
މި ފަހަކުން ރައްޔިތުންގެ މަޖިލީހުން، އަބުރު ރައްކާތެރިކޮށްދިނުމުގެ ނަމުގައި ފާސްކުރި ގާނޫނާ ހެދި، ފިލްމް ހަދާ މީހުންގެ ކްރިއޭޓިވިޓީ މިހާރު ވެސް ތަޅުލެވިފައިވާ ކަމަށް ދެކޭ މީހުން ބައިވަރެވެ. އެހެންވެ ދިވެހި ސިނަމާ އަށް އައުމަށް ވުރެ ނައުން ގާތް ކިތަންމެ ވާހަކައެއް، ހުރުން އެކަށީގެންވެ އެވެ.
ރާއްޖެއަކީ ކުޑަ ގައުމަކަށް ވިޔަސް މުއްސަނދި ތާރީހެއް އެބަ އޮތެވެ. ކުޅަދާނަ އެތައް ޝަހުސިއްޔަތުތަކެއް އެކި ދާއިރާތަކުން އުފެދުނު ގައުމެކެވެ. އެކަހަލަ ތާރީހީ ހާދިސާތަކާއި މީސްމީހުންގެ ބައޮގްރަފިކަލް ޑްރާމާތައް ދިވެހި ސިނަމާ އަށް އައުމަކީ ހަގީގަތުގައި ވެސް ދިވެހި ސިނަމާ މުއްސަނދިވުމެވެ. ބެލުންތެރިންގެ ޝައުގުވެރިކަން އިތުރު ކުރެވޭނެ ކަމެކެވެ.
ރާއްޖޭގެ ސިނަމާގައި ނަމަ ދިވެހިންނަށް އަބަދު ބަލާލަން ލިބޭނީ ލޯބީގެ ފިލްމުތަކާއި ލޯބީގެ ބިރުވެރި ފިލްމްތައް ކަމަށްވާ ނަމަ، މި ދާއިރާ އޮތް ހިސާބުގައި ކްރިއޭޓިވިޓީ "ބަނދެވިފައި" އޮންނާނީ އެވެ.
ތާރީހީ ހާދިސާތަކާއި ދިވެހިންގެ ތެރޭގައި މަޝްހޫރު ބޯދާ ވާހަކަތަކާއި މަޝްހޫރު މީސްމީހުންގެ ވާހަކަތައް ސްކްރީނުން ބަލާލަން ލިބުން "ނަމައެއްގެ" ގޮތުގައި އޮންނާނީ ބާވަ އެވެ؟
މިސާލަކަށް ޕޯޗްގީޒުންގެ އަޅުވެތިކަމުން ރާއްޖެ މިނިވަންކުރަން ބޮޑުތަކުރުފާނު ކުރެއްވި ޖިހާދާއި ހޮޅިންގެ އަތްދަށުން ރާއްޖެ ސަލާމަތް ކުރެއްވި އަލިރަސްގެފާނުގެ ޖިހާދާއި ނޮވެމްބަރު 3، 1988 ގައި ތަމަޅައިންގެ ބަޔަކު ދިވެހިންގެ ހާއިނުންތަކަކާ އެކު ރާއްޖެ އަރައި ހިންގި އުދުވާނާއި އެންމެ ދެކުނުގެ އަތޮޅުތައް އިނގިރޭސީންނާ ގުޅިގެން ހިންގި ސުވާދިވް ސަރުކާރުގެ ވާހަކަ ފަދަ ހާދިސާތަކަކީ ކުރިމަގު ޖީލަކަށްޓަކައި ވެސް ރައްކާކޮށްފައި ހުންނަން ޖެހޭ އެއްޗިއްސެވެ. މިކަން އެންމެ މުއްސަނދިކޮށް، ކުރެވޭނެ އެއް ގޮތަކީ ސިނަމާ އެވެ. އަދިވެސް މިކަހަލަ ކިތަންމެ ހާދިސާތަކެއް އެބަ ހުއްޓެވެ.
ރާއްޖޭގައި ރަނިކަން ކުރެއްވި ރެހެންދި ހަދީޖާ އާއި ރާއްޖޭގެ ފުރަތަމަ ރައީސް އަމީންދީދީ ފަދަ ބޭފުޅުންގެ ވާހަކަތަކަކީ ބޮޑު ސްކްރީނަށް ގެނެސްފި ނަމަ ބެލުންތެރިންގެ ޝައުގުވެރިކަން އިންތިހާ އަށް ދަމައި ގަންނާނެ ރަހަތަކެވެ.
މަރުހޫމް ސައިކުރާ އިބްރާހީމް ނައީމް ލިޔުއްވާފައިވާ "މަންމަ" ވާހަކައަކީ އަސަރުން ފުރިގެންވާ ހިޔާލީ ވާހަކައެކެވެ. ދިވެހިންގެ ތެރޭގައި އަދިވެސް އެހާމެ މަގުބޫލު ވާހަކައެކެވެ. މި ވާހަކަ އަށް ފިލްމެއް ހެދުމުގެ ވާހަކަތަކެއް ވެސް ދެކެވުނެވެ. މަޝްހޫރު ޅެންވެރިޔާ އައިމިނަތު ފާއިޒާ ލިޔުއްވާފައިވާ ވާހަކަ "ފުން އަސަރު" އަކީ ދިވެހިންގެ ދިރިއުޅުމުގެ ވައްޓަފާޅި އާއި އާދަކާދަ ކިޔައިދޭ ވަރަށް ރީތި މައުސޫމް ލޯބީގެ ވާހަކައެކެވެ. މިއީ ބޮޑު ސްކްރީނުން ބަލާލަން ވަރަށް ފުރިހަމަ ދިވެހިވަންތަކަން ދައްކުވައިދޭ ވާހަކައަކަށް ވާނެ އެވެ.
ރާއްޖޭގެ އެއް ނަންބަރު ވާހަކަ ލިޔުންތެރިޔާގެ ގޮތުގައި ގިނަ ބަޔަކު ދެކޭ ބިންމާ އިބްރާހީމް ވަހީދުގެ ވާހަކަތަކުގެ ތެރެއިން "ގަނޑުފެން" އަކީ ވެސް އާދަޔާހިލާފު ލޯބީގެ ވާހަކައެކެވެ. ބިންމާގެ ފުރިހަމަ ވާހަކަތަކުގެ ލިސްޓު ވަރަށް ދިގެވެ.
ފިލްމު ހަދަން ހުރި ޚިޔާލުގެ ތަކުގެ ވާހަކަތަކުގެ ވާހަކަ ކިތަންމެ ވަރަކަށް ވެސް ދެއްކިދާނެ އެވެ. ދެން އޮތީ ހުސް ސުވާލުތަކެކެވެ. އެއީ މިފަދަ ވާހަތަކަށް ފިލްމް ހަދަން ދިވެހި ޕްރޮޑިއުސަރުންނާއި ޑައިރެކްޓަރުން ބޭނުންވޭ ހެއްޔެވެ؟ އެ ވަރުގެ ގާބިލުކަމެއް އެ މީހުންގެ ކިބައިގައި ހުރިތޯ އެވެ؟
ގާބިލުކަމުގެ ވާހަކަ ދައްކާ ނަމަ، ދިވެހި ޑައިރެކްޓަރުންނަކީ މިހާރު އެއްގޮތަކަށް ވެސް ދެރަ ބައެކޭ ނުބުނެވޭނެ އެވެ. ރިސްކް ނަގަން ކެރޭ ޑައިރެކްޓަރުން ރާއްޖޭގައި މިހާރު އެބަ ތިއްބެވެ.
ޓެކްނޮލޮޖީ އަށް އައިސްފައިވާ ކުރިއެރުމާއި ދިވެހި ފިލްމީ ދާއިރާ ޓެކްނޮލޮޖީ އަށް ދޯޅުވެފައި އޮތް މިންވަރާއި ގެންގުޅޭ ސާމާނުތަކަށް ބަލައިފި ނަމަ، ދިވެހިންނަށް މިހާރު ނެހެދޭނެ ވައްތަރެއްގެ ފިލްމެއް ވަކި އެހެން ބަޔަކަށް ވެސް ހެދޭނެ ހެނެއް ހިއެއް ނުވެ އެވެ.
ބޭނުން ވަނީ ދިވެހިންގެ ތެރޭގައި ހުރި ވާހަކަތައް ދިވެހިންގެ ގޮތުގައި ގެނެސް ދޭނެ ބަޔެކެވެ. އިންވެސްޓްކޮށްގެން މޮޅު އުފެއްދުންތަކެއް ގެނެސް ދޭނެ ބައެކެވެ.
ބޭނުން ވަނީ ރިސްކް ނަގަން ކެރޭ، ބުރަކޮށް މަސައްކަތްކޮށްގެން ފެންވަރު ރަނގަޅު އުފެއްދުންތަކެއް ނެރެވޭނެ ސިކުނޑިތަކެކެވެ. އެ ދުވަހަކުން ދިވެހި ސިނަމާ އިން ވެސް މުއްސަނދިކަމާއި ކުޅަދާނަކަން ފެނިގެން ދާނެ އެވެ. އެކަމަކު ހަމައެކަނި ވިޔަފާރި އަށް ވިސްނުން ބަހައްޓައި، ފަސޭހައިން އާމްދަނީ ކަށަވަރުކުރަން އުޅެގެން އާ މަންޒަރެއް ފެނުމަކީ ނާދިރު ކަމެކެވެ.