01 ޑިސެމްބަރ 2020 - 09:56
ޕެރިސް (ޑިސެމްބަރު 1) - މަޝްހޫރު އަންހެން ރެފްރީ ފްރާންސްގެ ސްޓެފަނީ ފްރަޕާޓް ޔުއެފާ ޗެމްޕިއަންސް ލީގުގެ ތާރީހުގައި އެ މުބާރާތުގެ މެޗެއްގައި އިންސާފުކުރާ ފުރަތަމަ އަންހެން ރެފްރީ އަކަށް ވުމަށް ތައްޔާރުވެއްޖެ އެވެ.
އުމުރުން 36 އަހަރުގެ ފްރަޕާޓް ވަނީ މިދިޔަ ސީޒަނުގައި ޔުއެފާ ސުޕަ ކަޕްގައި ލިވަޕޫލުން ޗެލްސީ ބަލިކުރި މެޗުގައި ރެފްރީކަން ކޮށްފަ އެވެ. މިއީ ޔުއެފާގެ ފިރިހެނުންގެ ފުޓްބޯޅައިގެ ވަރުގަދަ މެޗެއްގައި އަންހެން ރެފްރީއެއް އިންސާފުކުރި ފުރަތަމަ މެޗެވެ. ފްރަޕާޓަށް ޗެމްޕިިއަންސް ލީގުގައި ދިން ފުރަތަމަ މެޗަކީ މާދަމާރޭ އިޓަލީގެ ޓިއުރިންގައި ޔުވެންޓަސް އިން ޔޫކްރޭނުގެ ޑިނަމޯ ކިއޭވްއާ ބައްދަލުކުރާ މެޗެވެ.
ފްރަޕާޓް ވަނީ މިދިޔަ އަހަރު ޖުލައިގައި ކުޅުނު ފީފާ އަންހެން ވޯލްޑް ކަޕް ފައިނަލު މެޗުގައި ވެސް ރެފްރީކަން ކޮށްފަ އެވެ. އޭގެ ކުރިން މިދިޔަ އަހަރުގެ އޭޕްރީލް މަހު ފްރަޕާޓް ވަނީ ފްރާންސް ފުރަތަމަ ޑިވިޝަނުގައި އެމިއެންސް އާއި ސްޓްރޯސްބާގް ކުޅުނު މެޗުގައި ރެފްރީކަން ކޮށްފަ އެވެ. އެ މެޗާ އެކު އޭނާ ވަނީ މި ފަހަރުގެ ފްރާންސްގެ ފުޓްބޯޅަ ސީޒަނުގެ ވަރުގަދަ މެޗުތަކުގައި އިންސާފުކުރާ ރެފްރީންގެ އިސް ޕޫލަށް ޕްރޮމޯޓްކޮށްފަ އެވެ.
މި ސީޒަނުގައި މިހާތަނަށް ފްރަޕާޓް އިންސާފުކުރި ޔޫރަޕްގެ ފުޓްބޯޅައިގެ ފިރިހެނުންގެ މެޗަކީ ޔޫރޮޕާ ލީގުގައި ލެސްޓާ ސިޓީ އާއި ޒޯރްޔާ ލުހަންސްކް ބައްދަލުކުރި މެޗެވެ.
ޔުއެފާ އިން އެންމެ ފުރަތަމަ ފިރިހެން މެޗަކަށް އަންހެން ރެފްރީ އަކު ހަމަޖެއްސީ 2004 ވަނަ އަހަރު އެވެ. އެ ގޮތުން ސްވިޒަލެންޑުގެ އަންހެން ރެފްރީ ނިކޯލް ޕެޓީނިޔާޓް ވަނީ 2004 އިން 2009 އަށް ޔުއެފާ ކަޕް (ޔޫރޮޕާ ލީގު)ގެ ތިން ކޮލިފައިން މެޗެއްގައި އިންސާފުކޮށްފަ އެވެ.
އޭގެ ފަހުން އަންހެން ރެފްރީންނަށް ފުރުސަތު ލިބުން މަދުވެފައި ވަނިކޮށް އަލުން އަންހެން ރެފްރީން ފިރިހެނުންގެ މެޗުތަކަށް ރެފްރީކަން ކުރަން ނެރެން ފެށީ މީގެ 10 ވަރަކަށް އަހަރު ކުރިންނެވެ. ޔޫރަޕްގެ ވަރުގަދަ ފަސް ލީގުގެ ތެރެއިން ފުރަތަމަ ޑިވިޝަނުގައި ފަހަކަށް އައިސް އެންމެ ފުރަތަމަ ފުރުސަތު ދިނީ ޖަރުމަނުގަ އެވެ. އެއީ 2017 ވަނަ އަހަރުގެ ސެޕްޓެމްބަރު މަހު ޖަރުމަނުގެ ފުރަތަމަ ޑިވިޝަނު މެޗެއްގަ އެވެ. ވާޑާ ބްރެމެން އާއި ހާތާ ބާލިން ކުޅުނު މި މެޗުގައި ރެފްރީކަން ކުރީ ޖަރުމަނުގެ އަންހެން ރެފްރީ ބިބިއާނާ ސްޓޭންހޯސް އެވެ.