28 ނޮވެމްބަރ 2020 - 11:59
ތެހެރާން (ނޮވެމްބަރު 28) - އީރާނުގެ އެންމެ ސީނިއާ ނިއުކްލިއާ ސައެންޓިސްޓް މުހްސިން ފަޚްރިޒާދާ އަވަހާރަކޮށްލައިފި އެވެ.
އޭނާ ރޭ އަވަހާރަކޮށްލީ ދަމަވާންދު ކައުންޓީގެ އަބްސާދު ޓައުންގައި ދިން ހަމަލާއެއްގައި ޒަޚަމްވެގެން ހޮސްޕިޓަލްގައި ފަރުވާ ދެމުން ދަނިކޮށެވެ. ހުޅަނގުގެ ޖާސޫސީ އިދާރާތަކުން ބުނާ ގޮތުގައި އީރާނުގެ ނިއުކްލިއާ ހަތިޔާރުގެ ޕްރޮގްރާމުގެ ފަހަތުގައި ހުންނެވި އެންމެ އިސް މޭސްތިރިއަކީ ފަޚްރިޒާދާ އެވެ. އީރާނުން ބުނެފައި ވަނީ އެ ގައުމުގެ ނިއުކްލިއާ ޕްރޮގްރާމް ހިންގަނީ ސުލްހަވެރި ބޭނުންތަކުގައި ކަމަށެވެ.
އީރާނުގެ ޚާރިޖީ ވަޒީރު ޖަވާދު ޒަރީފް ވަނީ އެ ގައުމުގެ އެންމެ ވަރުގަދަ ސައެންސްވެރިޔާ އަވަހާރަކޮށްލަން ދިން ޓެރަރިސްޓް ހަމަލާ ބައިނަލްއަގުވާމީ މުޖްތަމައުން ކުށްވެރި ކުރުމަށް ގޮވާލައްވައިފަ އެވެ. ފަޚްރިޒާދާ އަވަހާރަކޮށްލަން ދިން ހަމަލާގެ ތުހުމަތު ޒަރީފް އަޅުވާފައި ވަނީ އިޒްރޭލުގެ ބޮލުގަ އެވެ.
އީރާނުގެ ނިއުކްލިއާ ޕްރޮގްރާމާ ގުޅޭ ގޮތުން އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އެޕްރީލް 2018 ގައި ދިން ޕްރެޒެންޓޭޝަނުގައި ވަނީ ފަޚްރިޒާދާގެ ނަން ފާހަގަކޮށްފަ އެވެ. ފަޚްރިޒާދާ އަވަހާރަކޮށްލުމާ ގުޅޭ ގޮތުން އިޒްރޭލުން އެއްވެސް އެއްޗެއް އަދި ބުނެފައެއް ނުވެ އެވެ.
އީރާނުގެ ޑިފެންސް މިނިސްޓްރީން އިއްޔެ ނެރުނު ބަޔާނެއްގައި ބުނެފައި ވަނީ ފަޚްރިޒާދާ ދަތުރު ކުރެއްވި ވެހިކަލަށް ހަތިޔާރު އަޅައިގެން ތިބި ޓެރަރިސްޓުންގެ ބަޔަކު ހަމަލާދީފައިވާ ކަމަށެވެ. ޓެރަރިސްޓުންނާއި ފަޚްރިޒާދާގެ ބޮޑީގާޑުންނާ ދެމެދު ހަމަލާތައް ބަދަލު ކުރުމަށް ފަހު، ފަޚްރިޒާދާ ވަރަށް ބޮޑަށް ޒަޚަމްވެގެން ހޮސްޕިޓަލަށް ގެންދިޔަ ކަމަށް ބުނެފައިވެ އެވެ.
"އެކަމަކު މެޑިކަލް ޓީމުގެ މަސައްކަތުން ވެސް ފަޚްރިޒާދާގެ ފުރާނަ ސަލާމަތް ކުރެވޭ ގޮތެއް ނުވި. ކުޑަ ވަގުތު ކޮޅެއްގެ ތެރޭގައި އޭނާ ވަނީ އަވަހާރަވެފައި،" ޑިފެންސް މިނިސްޓްރީން ބުނެފައިވެ އެވެ.
އީރާނުގެ މީޑިއާތަކުން ބުނެފައި ވަނީ ހަތިޔާރު ހިފައިގެން ތިބި މީހުން ވަނީ ފަޚްރިޒާދާ އިންނެވި ކާރަށް ހަމަލާދީފައި ކަމަށެވެ. ފާސް ނިއުސް އެޖެންސީން ބުނި ގޮތުގައި އަބްސާދު ޓައުންގައި ދަތުރުކުރި ކާރެއް ވަނީ ގޮއްވާލައިފަ އެވެ. އަދި ޓެރަރިސްޓުންގެ ތެރޭން ތިނެއް ނުވަތަ ހަތަރު މީހުން މަރާލާފައިވަ ކަމަށް ވެސް ވަނީ ބުނެފަ އެވެ.
އޭނާ އަކީ އީރާނުގެ އެންމެ މަޝްހޫރު ނިއުކްލިއާ ސައެންސްވެރިޔާ އެވެ. ފަޚްރިޒާދާ އަކީ ޑިފެންސް މިނިސްޓްރީގެ ރިސާޗް އެންޑް އިނޮވޭޝަން އޮގަނައިޒޭޝަނުގެ ވެރިޔާ އެވެ. އަދި އިސްލާމިކް ރިވޮލިއުޝަނަރީ ގާޑްސްގެ ސީނިއާ އޮފިސަރެއް ވެސް މެ އެވެ. އީރާނުގެ ނިއުކްލިއާ ހަތިޔާރު ޕްރޮގްރާމުގައި އެންމެ ނުފޫޒް ގަދަ ފަރަތަކީ ފަޚްރިޒާދާ ކަމަށް ހުޅަނގުގެ މީޑިއާތަކުން އަބަދުވެސް ތުހުމަތު ކުރެ އެވެ. އިޒްރޭލުގެ ސިއްރު ލިޔުންތަކުން 2018 ވަނަ އަހަރު ހާމަވެފައިވާ ގޮތުގައި އީރާނުގައި ނިއުކްލިއާ ޕްރޮގްރާމްތައް ހިންގުމުގައި އެންމެ އިސް ފަރާތަކީ ފަޚްރިޒާދާ އެވެ. ބޮޑުވަޒީރު ނަތަންޔާހޫ ވަނީ އީރާނުގެ ނިއުކްލިއާ ޕްރޮގްރާމުގެ ވެރިޔަކީ ފަޚްރިޒާދާ ކަމަށް 2018 ވަނަ އަހަރު ވިދާޅުވެފަ އެވެ. އަދި އޭނާގެ ނަން އެންމެން ވެސް ހަނދާން ބެހެއްޓުމަށް ނަތަންޔާހޫ ވަނީ ގޮވާލައިފަ އެވެ.