25 ނޮވެމްބަރ 2020 - 14:54
އިންޑިއާ އާއި ގދ. ތިނަދޫ އަދި އައްޑޫ ސިޓީއާ ދެމެދު މޯލްޑިވްސް ސްޓޭޓް ޝިޕިން (އެމްއެސްއެސް) އިން ކާގޯ ދަތުރުތައް ފަށައިފި އެވެ.
މި ދަތުރުތައް ފަށަން އެކުންފުނީގެ އެމްވީ ބޮންތި2 މިހާރު ވަނީ އިންޑިއާގެ ޓުޓިކޮރިންއަށް ފުރައިފަ އެވެ. މި ބޯޓުން މުދާ ގެންނަން ބޭނުންވާ ފަރާތްތަކަށް އެމްއެސްއެސް އިން ވަނީ ބުކިން ހެއްދުމުގެ ފުރުސަތު ވެސް ހުޅުވާލައިފަ އެވެ.
އައްޑޫ ސިޓީގައި އޮންނަ ހިތަދޫ ޕޯޓް ލިމިޓެޑުން ކުރި ޓްވީޓެއްގައި ބުނީ މިއީ އައްޑު އާއި ހުވަދު އަތޮޅަށް ލިބޭ ކުރިއެރުމެއް ކަމަށެވެ. އަދި މި ދަތުރުތަކުގެ ސަބަބުން ރާއްޖޭގެ ދެކުނުގެ ރައްޔިތުންނަށް ހެޔޮ އަގުގައި ބައެއް މުދާ ލިބޭނެ ކަމަށް ވެސް ބުންޏެވެ.
މި ދަތުރުތައް ފެށުމާ ގުޅިގެން އިންޑިއާއިން ވެސް ވަނީ މަރުހަބާ ކިޔައިފަ އެވެ. ރާއްޖޭގައި ހުރި އެ ގައުމުގެ އެމްބަސީން ބުނި ގޮތުގައި މިއީ އިންޑިއާގެ ދެކުނާއި ރާއްޖޭގެ ދެކުނާ ވިޔަފާރީގެ ގޮތުން ގުޅުވާލަދޭނެ ދަތުރުތަކެއް ކަަމަށެވެ.
އިންޑިއާގެ ކޮޗިން އާއި ކުޅުދުއްފުއްޓާ ދެމެދުގެ މިހާރު ވެސް އަންނަނީ މުދާ އުފުލަމުންނެވެ. އިންޑިއާގެ ބޯޓަކުން އެ ދަތުރުތައް ފެށީ ސެޕްޓެމްބަރު 26 ގަ އެވެ.