08 ނޮވެމްބަރ 2020 - 13:08
މެންޗެސްޓާ (ނޮވެމްބަރު 8) - އިނގިރޭސި ޕްރިމިއާ ލީގުގައި މިރޭ އެންމެ ފަހުގެ ޗެމްޕިއަން ލިވަޕޫލާ ދެކޮޅަށް އަމިއްލަ ދަނޑުގައި މެންޗެސްޓާ ސިޓީ ކުޅޭ މެޗަކީ ފައިނަލެއް ނޫން ކަމަށާއި ޕްރިމިއާ ލީގާއި އެމެރިކާގެ އިންތިހާބު އެއްގޮތް ކަމަށް ސިޓީގެ ކޯޗު ޕެޕް ގާޑިއޯލާ ބުނެފި އެވެ.
ލީގުގެ ދެ ވަނައިގައި ލިވަޕޫލް އޮތީ ހަތް މެޗުން 16 ޕޮއިންޓާ އެކު އެވެ. ސިޓީ މި ވަގުތު ލީގުގެ 12 ވަނައިގައި އޮތީ ހަ މެޗުން 11 ޕޮއިންޓް ހޯދައިގެންނެވެ.
ލިވަޕޫލް މިރޭ ސިޓީ އަތުން މޮޅުވެއްޖެނަމަ ސިޓީއާ ދެމެދު އަށް ޕޮޮއިންޓްގެ ލީޑެއް ލިބޭނެ އެވެ. މިއީ ސިޓީ އަށް ލީގުގެ ރޭހުގައި ލިބޭނެ ބޮޑު ގެއްލުމެއް ކަމަށް ގިނަ ބަޔަކަށް ގަބޫލުކުރެވުނަސް ގާޑިއޯލާ އެކަމަށް އެއްބަހެއްނުވެ އެވެ. ގާޑިއޯލާގެ ނަޒަރުގައި ޕްރިމިއާ ލީގާއި ދާދި ފަހުން ނިމިގެންދިޔަ އެމެރިކާގެ ރިޔާސީ އިންތިހާބާ އެއްގޮތް ކަންތައްތަކެއް އެބަހުއްޓެވެ.
"ތެދެއް މިއީ ވަރަށް ބޮޑު މެޗެއް. މުހިއްމު މެޗެއް. އެކަމަކު މިއީ (މި ލީގަކީ) އެމެރިކާގެ ރިޔާސީ އިންތިހާބު ކަހަލަ ކަމެއް. ހުރިހާ ވޯޓެއް ގުންނަން ޖެހޭނެ. މީގެ މާނަ އަކީ އަދިވެސް ވަރަށް ގިނަ ޕޮއިންޓް ހޯދަން މެޗުތަކެއް ކުޅެން ޖެހޭނެއޭ،" ލީގުގައި މިރޭ އަމިއްލަ ދަނޑުގައި ލިވަޕޫލާ ދެކޮޅަށް ކުޅޭ މެޗުގެ ކުރިން ނޫސްވެރިންގެ ބައްދަލުވުމުގައި ގާޑިއޯލާ ބުންޏެވެ.ަ
ސިޓީއާ އެކު ޕްރިމިއާ ލީގުގެ ޗެމްޕިއަންކަން ދެ ފަހަރު ހޯދާފައިވާ ގާޑިއޯލާ ބުނީ އެހެން ފަހަރުތަކާ ހިލާފަށް މި ފަހަރުގެ ޕްރިމިއާ ލީގުގެ ވާދަވެރިކަން ބޮޑުވާނެ ކަމަށާއި ލިވަޕޫލާއި ސިޓީގެ އިތުރުން ޓޮޓެންހަމް، ޗެލްސީ އަދި ލެސްޓާ ވެސް އަންނަނީ ކުރީގެ ފޯމުގައި މޮޅު ކުޅުމެއް ދައްކަމުން ކަމަށެވެ. މި ވަގުތަށް ބަލާއިރު މެންޗެސްޓާ ޔުނައިޓެޑް އޮތީ ދަށްކޮށް ނަމަވެސް އެ ޓީމުގެ ކޮލިޓީ އަށް ބަލާއިރު ލީގަށް ވާދަކުރެވޭނެ ކަމަށް ގާޑިއޯލާ ގަބޫލުކުރެ އެވެ.
މިދިޔަ އަހަރު ލިވަޕޫލުން ލީގުގެ ޗެމްޕިއަންކަން ހޯދިއިރު އެ ޓީމުގެ ފަހަތުގައި އާދަޔާހިލާފު މޮޅު ކުޅުމެއް ދެއްކި ވާޖިލް ވެން ޑައިކްގެ ކަކުލަށް ސީރިއަސް އަނިޔާއެއްވެ އޭނާ އަށް ވަނީ ސީޒަން ނިމިފަ އެވެ. ސިޓީ އަތުން ލިވަޕޫލް އެންމެ ފަހުން މޮޅުވި މެޗުތަކުގައި ވެން ޑައިކްގެ ދައުރު ބޮޑެވެ. ގާޑިއޯލާ ބުނީ ވެން ޑައިކް ނެތް ކަމުގައި ވިޔަސް ފަސޭހަކޮށްލެވެން ނެތް ކަމަށެވެ.
"ލިވަޕޫލާ އެކު ވިޔަސް ކޮންމެ ޓީމަކާ އެކު ވިޔަސް މެޗެއް އެންމެ ފުރިހަމަވާނީ އެންމެ މޮޅެތި ކުޅުންތެރިން ތިބެގެން. ވެން ޑައިކް ނެތްތަން މެޗުގެ ކޮލިޓީން ވެސް ފެންނާނެ. އެކަމަކު ގަބޫލުކުރަން ޖެހޭ ކަމަކީ ލިވަޕޫލަކީ ތަފާތު މޮޅު ޓީމެއް. އެ މީހުން ކުޅުނު މެޗުތަކުން އެހުރީ އެކަން ފެންނަން. އެޓަލަންޓާ މެޗުގެ ނަތީޖާ އަކީ ވެސް އެ ފަދަ ކަމެއް،" ގާޑިއޯލާ ބުންޏެވެ.
އެންމެ ފަހުގެ ޗެމްޕިއަނާ ދެކޮޅަށް ސިޓީން އަމިއްލަ ދަނޑުގައި އެންމެ ފަހުން ކުޅުނު 10 މެޗުގެ ތެރެއިން ނުވަ މެޗުން ވަނީ މޮޅުވެފަ އެވެ. ގާޑިއޯލާގެ ކޯޗިން ކެރިއަރުގައި އޭނާ އެންމެ ގިނައިން ބަލިވީ ލިވަޕޫލްގެ ކޯޗު ޔާގެން ކްލޮޕްގެ ޓީމުތައް އަތުންނެވެ. ސިޓީގެ އިއްތިހާދު ސްޓޭޑިއަމްގައި ލިވަޕޫލާ ދެކޮޅަށް ކުޅޭ މެޗު ފަށާނީ މިރޭ ރާއްޖެ ގަޑިން 21:30 ގަ އެވެ.