05 ނޮވެމްބަރ 2020 - 18:35
ވޮޝިންޓަން (ނޮވެމްބަރު 5) - އެމެރިކާގައި ރިޔާސީ އިންތިޚާބު ބޭއްވިތާ ދެ ދުވަސްވީއިރު ވެސް މޮޅުވި ކެންޑިޑޭޓެއް ނޭނގޭތީ އެތައް ބަޔަކު ވަނީ ސުވާލު އުފައްދައިފަ އެވެ.
މުޅި ދުނިޔެ އިންތިޒާރު ކުރަމުން އަންނަ އިންތިޚާބުގެ ނަތީޖާ ލަސްވި ނަމަވެސް އެކަމުގައި ގޯހެއް ނެތް ކަމަށް އޮފިޝަލުން ބުނެ އެވެ. ނަތީޖާ ލަސްވަމުން ދަނީ ޕޯސްޓް މެދުވެރިކޮށާއި، އިންތިހާބުގެ ކުރިން ވޯޓު ލާން ލިބުނު ފުރުސަތުގައި ގާތްގަނޑަކަށް 100 މިލިއަން މީހުން ވޯޓުލުމުން އެ ވޯޓުތައް ގުނަން އިތުރު ވަގުތު ބޭނުންވާތީ އެވެ. ކޮރޯނާވައިަރަހުގެ ސަބަބުން ގިނަ ބަޔަކު އެއްތަންވެ ބޮނޑިވެގެން އުޅުމުގެ ބަދަލުގައި ގިނަ މީހުން އިޚްތިޔާރު ކުރީ ކުރިން ވޯޓުލުމަށެވެ.
އެމެރިކާގެ އިންތިޚާބުގައި މި ފަހަރު 160 މިލިއަން މީހުން ވޯޓުލާފައިވާ ކަމަށް ލަފާކުރެވެ އެވެ. އޭގެ ތެރޭން 101.1 މިލިއަން މީހުން ވޯޓުލާފައި ވަނީ އާލީ ވޯޓިންގެ ގޮތުގަ އެވެ. އާލީ ވޯޓިންގެ 65.2 މިލިއަން މީހުން ވޯޓުލާފައި ވަނީ ޕޯސްޓުންނެވެ. ޕޯސްޓުން ލާފައިވާ ވޯޓުތައް ސިޓީ އުރައިން ކަނޑައި، ޗެކްކޮށް، ވެރިފައި ކުރުމަށް އިންތިޚާބީ އޮފިޝަލުންނަށް އިތުރު ވަގުތު ބޭނުންވެ އެވެ. އެމެރިކާގެ ގިނަ ސްޓޭޓްތަކުގެ ގާނޫނު އޮންނަ ގޮތުން ޕޯސްޓުން ލާ ވޯޓު އިންތިޚާބު އޮންނަ ދުވަހުގެ ކުރިން ގުނާ ނުހެދޭނެ އެވެ.
ޕޯސްޓް މެދުވެރިކޮށް ވޯޓު ލީ މީހުންގެ ވޯޓު އެކި ސެންޓަރުތަކަށް އުފުލުމުގައި، ކޮރޯނާވައިރަސްގެ ސަބަބުން ދަތުރުފަތުރަށް އައި ހުއްޓުމުގައި ބޮޑެތި ލަސްތަކެއް އަ އެވެ. އެހެންކަމުން އިންތިހާބުގެ ދުވަސް ކަަމަށްވާ ނޮވެމްބަރު 3 ގެ ފަހުން ވެސް ވޯޓު ގުނުމުގެ ހުއްދަ ބައެއް ސްޓޭޓްތަކުގެ ކޯޓުތަކުން އޮތީ ދީފަ އެވެ. އެކަން ހުއްޓުވުމަށް ރައީސް ޑޮނަލްޑް ޓްރަމްޕް ވަނީ ކޯޓަށް ވަޑައިގެންފަ އެވެ. ނަތީޖާ އަށް އެންމެ ބޮޑަށް އަސަރު ކުރާނެ ކަމަށް ބެލެވޭ ތިން ސްޓޭޓް ކަމަށްވާ ވިސްކޮންސިން، މިޝިގަން އަދި ޕެންސިލްވޭނިއާގެ ވޯޓު އަލުން ގުނުމަށް ޓްރަމްޕުގެ ފަރާތުން ވަނީ ކޯޓަށް ހުށަހަޅައިފަ އެވެ.
އެމެރިކާގައި މިހާތަނަށް ބޭއްވި އެއްވެސް ރިޔާސީ އިންތިޚާބެއްގައި އިންތިޚާބު ބާއްވާ ދުވަހުގެ ރޭ ވޯޓު ގުނާ ނިމިފައެއް ނުވެ އެވެ.