07 ނޮވެމްބަރ 2020 - 08:13
ވިދިޔާ ބަލަންގެ ފިލްމު "ޝޭރްނީ" ގެ ޝޫޓިންގެ ތެރޭގައި ފިލްމުގެ ކާސްޓްގައި ހިމެނޭ ވިޖޭ ރާޒްގެ ފަރާތުން އަންހެން ކްރޫ މެމްބަރަކަށް ޖިންސީ ގޯނާ ލިބި، އެ މައްސަލަ މިހާރު ބަލަމުން އަންނަ އިރު، ވިދިޔާ ފިލްމު ވަކިވެދާނެ ކަމަށް ބެލެވެން ފަށައިފި އެވެ.
ފިލްމީ ޚަބަރުތައް ގެނެސްދޭ ނޫސްތަކުން ބުނި ގޮތުގައި އަމިތު މަސޫރްކަރް ޑައިރެކްޓްކުރާ ފިލްމުގެ ޓީމުގެ ކުރިމަތީގައި މި ވަގުތު އޮތީ ދެ ގޮތެކެވެ. އެއީ ފިލްމުގެ ޓައިޓްލް ރޯލް ކުޅޭ ވިދިޔާއާ އެކު މަސައްކަތް ކުރިއަށް ގެންދަން ބޭނުންވާ ނަމަ ވިޖޭއާ ނުލައި ފިލްމު ހެދުމެވެ. އަދި އޭނާ ހިމަނައިގެން ފިލްމުގެ މަސައްކަތް ދެން ކުރިއަށް ގެންދާ ނަމަ ވިދިޔާ ފިލްމުން ވަކިވެދާނެ އެވެ.
ބޮލީވުޑްގައި މީގެ ދެ އަހަރު ކުރިން ޖިންސީ ގޯނާގެ މައްސަލަތައް ވަރަށް ބޮޑަށް ހިލި، އެފަދަ ތުހުމަތުގައި އެތައް ބަޔަކު ބޭޒާރުވެފައިވެ އެވެ. އަދި ތުހުމަތުތައް އެޅުނު ފަންނާނުންނާ އެކު މަސައްކަތް ނުކުރަން ވެސް ބައެއް މީހުން ވަނީ ނިންމައިފަ އެވެ. ވިދިޔާ އަކީ ވެސް ބޮލީވުޑްގައި އަންހެން ފަންނާނުންނާއި މަސައްކަތްތެރިންގެ މައްސަލަތަކާ ދޭތެރޭ އަޑު އުފުލައި، ޖިންސީ ގޯނާ ފަދަ އަމަލުތަކާ ވަރަށް ދެކޮޅު ބަތަލާއަކަށްވާތީ އޭނާ ވިޖޭއާ އެކު ދެން މަސައްކަތްކުރުން ވަރަށް ނާދިރު ކަމަށް މީޑިއާތަކުން ބުންޏެވެ.
މަހާރަޝްތުރާ ސްޓޭޓްގެ ގޮންޑިއާގައި "ޝޭރްނީ" ގެ މަސައްކަތް ކުރިއަށް ދަނިކޮށް، ވިޖޭގެ ފަރާތުން ޖިންސީ ގޯނާ ލިބުނު ކަމަށް ބުނެ މައްސަލަ ފުލުހުންނަށް ރިޕޯޓްކުރީ އަންގާރަ ދުވަހު އެވެ. އެ މައްސަލާގައި 57 އަހަރުގެ އެކްޓަރު ހައްޔަރުކުރި ނަމަވެސް ފަހުން ވަނީ ކަފާލާތުގެ ދަށުން ދޫކޮށްލައިފަ އެވެ.
މިކަމާ ބެހޭ ގޮތުން "ޝޭރްނީ" ގެ ޓީމުން އަދި އެއްވެސް ވާހަކައެއް ނުދައްކަ އެވެ. ވިޖޭގެ ފަރާތުން ފެންމަތިވި މައްސަލައާ ހެދި ޝޫޓިން ވެސް މިހާރު އޮތީ ވަގުތީ ގޮތުން މެދުކަނޑާލައިފަ އެވެ. ވިދިޔާ ފޮރެސްޓް އޮފިސަރެއްގެ ރޯލް ކުޅޭ "ޝޭރްނީ" ގެ ޝޫޓިން ގޮންޑިއާގައި މިދިޔަ މަހުގެ ފަހުކޮޅު އަލުން ފެށީ، މާޗް މަހުގެ ތެރޭގައި ޝޫޓިން ފެށިތަނާ ކޮވިޑްގެ ބަލިމަޑުކަމާ ހެދި މަސައްކަތް ހުއްޓާލައި އޮތުމަށް ފަހު އެވެ.
އިންޑިއާ އިން 2018 ގެ އޮސްކާ އެވޯޑްސް ފޮނުވި ފިލްމު "ނިއުޓަން" ގެ ޑައިރެކްޓަރު އަމިތު ހަދާ "ޝޭރްނީ" އަކީ ބުޝަން ކުމާރުގެ ޓީ ސީރީޒުން ޕްރޮޑިއުސްކުރާ ފިލްމެކެވެ. މީގެ ކާސްޓްގައި ޝަރަތު ސަކްސޭނާ ވެސް ހިމެނެ އެވެ.